23
1-3 (-)4 Wisha chikich shuar wiakach aina imau atajai
tuka enentaimipa.
5 Ame shir enentaimtusam iiyaakmeka,
shuar wiakach aina nuna waríri ainaka pinchu nanaak weak megka
19 Uchiru, wina chichamur antukam metek umikta.
Nu tumakum Yuusa nuke umirkata.*
20 Jiistamainak umutain umarartasa irunmaunumka pachinkaipa.
Shuar náki asa takatsuk pujus,
chikich takasmaunmayan yu yujau aina nuna pujuti unuimatraipa.
21 Jiistamainak umutain umuinak nampen ainaka,
aya yutanak enentaimtin
tura náki ainasha kuitri atsurmau asar waitin ainawai.
22 Amina apa tura nukusha jakai tusa kuitamramawaru asarmatai yaigta.
Turakum nita untach jasarmataisha nakittsuk yaigta.
23 Chicham nekasa nu,
yachamat tura unuimata nusha inaisaipa.
24 Uchi pegker tura yacha akaigka,
aparigka shir aneas pujuwaiti.
25 Amina apa tura nukusha
shir anentrusti tusam pegkera nuke takasta.
26 Uchiru,
wina pujutur iisam amesha pegker aina nuke unuimarta.
27 Tumakum nuwa akika takataijai pujuta nuka
pegkerchau asamtai,
nu pujutka unuimattraipa.
Nu nuwaka wa taimu init awa numamtinaiti.
28 Nu nuwaka kasa shuaran kasarkattsa shir iisu asa,
aruma nui kasarna numamtuk nukap shuar ainan pegkerchaun takamtiknaiti.
29-30 Shuar tunaun takau aina nuka nampekar útainak, maaninak,
tura jinum kapantrar tsawain ainawai.
Tumaina asar senchi waitin ainawai.
Tura umutai chikich ainancha nekapin ainawai.
31 Umutai aina umakmesha
shir nukapka umaraipa.
Iman asamtai shuar ainaka wakeruinak
umarar nampen ainawai.
32 Turasha nuka nápi shuaran asai maina numamtuk
waittanam jukartinaiti.
33-34 Umutai umaram nampeakmeka,
shuar barconam egkemar wesa
nayants senchi tsukatkai ashamak waurkamnau nekapna numamtuk,
pegkerchau takat aina nuke ima senchi wakerittame.
35 Nampekam wekamin suimramawarmataisha
nekaprashtatme.
Tumakum nampeta nuka inaimainchau nekapu asam
nu nukap umu jat nekapmainaitme.