SALMOS
LIBRO I
(Sal 1–41)
Shuar Yuusan umirin Yuusan umirchau ainajai pachisa timau
1
Shuar Yuusan umirin aina,shuar pegkerchaun pachis
jintinkartamun unuimartasa wakerichu,
tura tunaun takau aina nujai metekchau asar,
tura shuar Yuusan umirchau wishikkartin aina nujai iruunar wishikkartu jakchau asar,
shir aneasar pujusartin ainawai.
2 Tumawartin asar nitaka
Yuusa chichamen uminak ninak tuke enentaimtuinawai.
3 Shuar tu pujauka numi
entsa yantamen metsagkrumainchaunam araamu nerektintri tsawan jeakai nukap neren,
tura nukeesha kaachua numamtuk ni takamurigka ashi pegkerak atinaiti.
4 Antsu Yuusan umirchau ainaka tuka pujuinatsui.
Nitaka trigo saepen nase umpui
utsaina numamtuk waittsartin ainawai.
5 Tuma asar Yuusan umirkacharu ainaka
Yuusa umirin ainajaigka nayaimpinmagka iruuntrarka pujuschartin ainawai.
6 Antsu shuar pegker ainanka ni umirmau asa,
Yuus kuitamui.
Turasha shuar tunaun takau ainaka
Yuus umirtan nakitraru asar, waittan jukiartin ainawai.