Babilonianmaya aina yaakat Jerusalénkan tentakmau
25
Sedequías apu jas nueve uwí ejé, tura nuiya diez nantun achik diez tsawan pujai, Babilonianmaya apu Nabucodonosor Jerusalénnumia ainajai maaniattsa ashi nina suntaari ainajai wuwaiti. Tuma jeaa yaakat Jerusalénkan tentakaruiti, tumawar warukar maaniawartasa watai ainan najankaru ainawai. 2 Babilonianmaya suntar aina yaakat Jerusalénkan tenteawar matsataig Sedequías apu jasmauri once uwí jeawaiti. 3 Babilonianmaya suntar aina yaakat Jerusalénkan tentakar nukap tsawan pujuina asarmatai, nu uwítin cuatro nantun achik nueve tsawantin yumain atsusuiti. Tuma asamtai shuar aina tsukai waitaina. 4 Nu tsawanta nuik Babilonianmaya suntar aina yaakat Jerusalén pegmara apakmaunam kuchamrar chigkawaruiti. Nuna turawarmatai israelita aina sapijmakaru ainawai, tumaina asar Babilonianmaya suntar aina yaaktan tentakar pujuinaig, apu Sedequías nina suntaari ainajaimak Jerusalénnum waitainam jimar apatka pegkramunam ni pujusa inamtainam ajari yagkur aina arakmau ajakua nunini káshi jiintraru ainawai. Tumawar entsa Jordánnum nugka paka amaunmani jinta weamunam tsekegkiaru ainawai. 5 Turasha Babilonianmaya suntar aina apu Sedequíasan patatukaru ainawai. Turawar Jericó pakarin amaigkiaru ainawai. Nuna turuinakai nina suntaari ainaka pampagkar tsekenak ashi ikukiaru ainawai.6 Turawarmatai Babilonianmaya suntar aina apu Sedequíasan achikaruiti. (Tura nuiyasha nina uchiri ainancha achikaruiti.) Turawar Hamat nugkanam yaakat Riblánam apu Nabucodonosor pujau asamtai, nui ejéniaru ainawai.
Turawarmatai apu Nabucodonosor Sedequías waittsatnurin pachis etserkauwaiti. 7 Tura Sedequíasa uchiri ainanka nisha wainaig maawaru ainawai. Nuna turawarmatai Sedequíasa ji ukuitkatarma, tusa tinaiti. Tusa takai jiin ukuitkaru ainawai, turawar yaakat Babilonianam jukiartasa cadenajai jigkawaru ainawai.
Babilonianmaya suntar aina Yuus ememattasa iruuntai jean yumpuarmau
(2Cr 36.17-21; Jer 39.8-10; 52.12-30)
8 Nabucodonosor nina kuitamnun suntar ainan apurin Nabuzaradán naartin ajakua nuna, yaakat Jerusalénnum akupkauwaiti. Nu turamu Nabucodonosor apu jasmauri diecinueve uwí tura cinco nantun achik siete tsawan ejé ai jeawaiti. 9 Tuma Nabuzaradán suntar ainan, Yuus ememattasa iruuntai jea nu, apu pujusa inamtai jea nu, tura shuar eme anentsa iitai jee ainasha ashi ekemaktarma tusa takai, ekemararu ainawai. 10 Nuna turawar Babilonianmaya suntar aina apujai yujaina yaakat Jerusalén pegkra tentakmau ajakua nuna yumpugkaru ainawai.
11 Nuna tura Nabuzaradán nina suntaari ainajai israelita ainan yaakat Jerusalénnum juakaru ainan ashi achirar Babilonia nugkanam yarumainak, mantamawaraij tusar ashamainak, Babilonianmaya apun nitak weamtukaru ajakarua nuna tura warí takatain najanin ainancha achirar yaruakaruiti. 12 Turasha shuar pegke kuitrinnuchu aina nuna, uva arakmau ainan, tura chikich árak arakmau ainancha nuparin takariarti tusa ikukiaru ainawai.
13 Babilonianmaya suntar aina Yuus ememattasa iruuntai jeanam takastin, jiru bronce tutaijai najankamu irunun, jea jeamku jirujai ajinkamu ainan, jea jeamkattsar nugka tair jiru aepamu ainan, tura entsa shikitai najanamu uun ajakua nunasha ashi tsaikaru ainawai. Nuna turawar jiru bronce ainan Babilonia nugkanam yaruakaruiti. 14 Nuiyasha yuku chumpia juutai ainan, palana ainan, cucharón ainan, tijera ainan, Yuus emematku takatai broncejai najankamu ainancha ashi yaruakaruiti. 15 Turusag Nabuzaradán nina suntaari ainajaimak incienso yara ekematai orojai najanamu ainan, tura tazón jiru plata tutaijai najanamu ainancha yaruakaruiti.
16 Apu Salomón Yuus ememattasa iruuntai jea jeamkurum, jimar jiru ajintatarma tusa takai, jimar jirun ajintawaru aina nuka, entsa shikitai atin un najanatarma tusa takai najanawaru aina nuka, tura jea jeamnaktinnum nugka tairum jiru aepatarma, tusa takai jirun aepawaru aina nuna kijintrigka iman kijinaiti tusarkesha tumainchau ajakaruiti. 17 Yuus ememattasa iruuntai jea jeamkur jimar ajintamu ajakua nuna asantigka ocho metron nagkasau ajakaruiti. Antsu nui ekenir jiru broncejai jean emetratin najanamu ajakua nuna yakintigka jimar metron nagkasau ajakaruiti. Nui jiru bronce tutaijai najanawar pempearar manzanaya numamtin najana apujtusmau ajakuiti. Jimar ajiamu ajakua nuka mai metekak ajakuiti. Tura pegker atii tusa iwarkamu ajakarua nusha aya broncek ajakaruiti.
Babilonianmaya suntar aina Judá nugkanmaya shuar ainan achira yaruakmau
18 Babilonianmaya suntara apuri Nabuzaradán sacerdote shir apuri Seraíasan, tura chikich sacerdote eme anentsa iitai ajakua nuna, tura nuiyasha Yuus ememattasa iruuntai jean waitirin kuitamin tres shuar ajakarua nujaimak achikaru ainawai. 19 Nuiyasha suntar ainan apurin, apun chicharin cinco shuar ajakarua nunasha, suntara apuri suntar ainan naarin aar jurujakua nuna, tura eme anentsa iitai ajakarua nuna setenta shuaran achikaruiti. 20 Nabuzaradán nina suntaari ainajai achirmau ainanka yaruak yaakat Riblánam Hamatnum apu Nabucodonosor pujau asamtai, nui ejéniaru ainawai.
21 Turawarmatai apu Nabucodonosor maatarma tusa takai nina suntaari aina Hamat nugkanam ashi maawaru ainawai.
Judá weantu ainan tu achirar nita nugken ikumtikiar yaja yaruakaru ainawai.
Israelita aina Judá nugkanam ujumak shuar juakaru aina Egipto nugkanam shiakmau
22 Tura apu Nabucodonosor israelita chikich aina Judá nugkanam ujumak juararua nuna inarti tusa chikichik israelitan apu amajsauwaiti. Nuna naarigka Guedalías, aparigka Haicam, Safatánka tiragke ajakuiti.
23 Judánmaya suntara apuri tsekegkiar ikam umkaru ainawai. Tumawaru asamtai Babilonianmaya achira yaruakchamu pujuina nita suntaari ainajai, Guedalíasan israelita ainan apuri atii tusa Babilonianmaya apu Nabucodonosor anaikayi tusa tamaun antukaruiti. Tumawar Guedalíasjai chichasartasa nita atutairi ainajai yaakat Mispánam wearuiti. Nu apu ajakarua nuka ju ainawai: Netaníasan uchiri, Ismael, Coréah uchiri, Johanán, Tanhumetan uchiri, Seraías, nuka yaakat Netofánmaya ajakuiti, tura Jaazanías yaakat Maaca tutainam puju jakua nu. 24 Tumawar apu Guedalías pujamunam jeawaruiti. Tumawarmatai apu Guedalías suntara apuri ainan, tura nita suntaari ainajaimak chicharuk: “Yuusa naarin pachisan tajarme. Juig pujusar apu Nabucodonosor umirkurinka Babilonianmaya ainaka shir amajtamiartatji. Tuma asamtai Babilonianmaya suntara apuri aina nuka ashamkairpa”, tusa tinaiti.
25 Apu Guedalías enentai ichichturmauwaitak, Guedalías apu jas siete nantu ején ai, Judá shuar apu ajakarua nu weantu Ismael, Elisamá tiragke ajakua nu diez shuar ainajai yaakat Mizpánam jeawaiti. Tumawar Guedalíasan maawaruiti, Judánmaya suntara apuri ainan tura Babilonianmaya aina nui pujuinancha maawaru ainawai. 26 Nuna turawarmatai Judánmaya suntara apuri aina, Judánam shuar aina pujuinaka, shuar eme anentsa iitai, tura eme anentsa iishtai ainajaimak, Babilonianmaya ainan ashamainak, Egipto nugkanam ashi tsekegkiaru ainawai.
Babilonianmaya apu Evil-merodac ajakua nu Joaquínkan cárcelnum egketun jiiki apu amajsamu
27 Judánmaya apu Joaquín ajakua nuna achikar Babilonia nugkanam jukiaruiti. Turam nui pujus treinta y siete uwí ejénaiti. Tuma pujai Doce nantun achik veinte siete tsawantin Evil-merodac Babilonianmaya ainan apuri jasuiti. Tuma nu Joaquínkan wait anentar cárcelnum egketun jiiknaiti. 28 Nuna tura shir chichasuiti, tura Babilonianam apu chikich aina nijai achikam cárcelnum egketainan nagkasau atii tusa apu amajsauwaiti. 29 Nu turamu asa Joaquín cárcelnum egkemsa jaanch nugku jakmaurinka inaisauwaiti, tuma jaanch pegkeran nugkur apujai tuke yu jakuiti. 30 Nuiyasha ni atsumamun sumakti tusa, apu Evil-merodac kuitan kashi kashinig Joaquínkan sujakuiti.