24
1-7 (-)Babilonianmaya aina apu Joaquínkan nina suntaari ainajaimak achira yaruakmau
8 Joaquín dieciocho uwí aramu apu jas Judá nugkanam inamrauwaiti. Tura Jerusalénnumka tres nantu inamrauwaiti. Nina nukurigka Nehustá tutai ajakuiti. Yaakat Jerusalénnumia shuar Elnatán ajakua nuna nawantri ajakuiti. 9 Joaquínsha Yuus nakitamun nina apari pegkerchau takájakua turusag takasuiti.
10 Nu tsawantinka, Babilonianmaya apuka Nabucodonosor ajakuiti. Judánmaya suntar aina yaakat Jerusalénnum pujuina nujai maaniatarma tusa nina suntaari ainan ishiakuiti. Nu turamu aina jeawar, yaaktan tenteawaru ainawai. 11 Turawar maaninak pujuinai, apu Nabucodonosorsha jeawaiti.
12 Tumamtai Judánmaya ainan apuri Joaquín, nina nukuri, suntara apuri aina, nina atutairi, tura shuar eme anentsa iitai ainajaimak mantamawaraij tusar ashamainak, Babilonianmaya apun nitak weamtukaruiti. Tumawarmatai nitanka achiruiti. Nuka Nabucodonosor apu jasmaurin ocho uwí ején ai tumawaiti.
13 Warí akik aina Yuus ememattasa iruuntai jeanam irunun, tura apu pujusa inamtai jeanmayancha ashi yaruakuiti. Tura apu Salomón turatarma tusa takai Yuus ememattasa iruuntai jeanam orojai najankamu ajakarua nunasha ashi tsaikuiti. Yuus tumatnaiti tusa tina nuka tu uminkauwaiti. 14 Tura nuiyasha suntara apuri ainan, suntar maanitan yacha ainan, takatai aina najantan yacha ainan, tura jiru hierro tutain najanin ainancha ashi yaruakaruiti. Ashi irumramka diez mil shuar ainan yaruakaruiti, shuar pegke kuitrinnuchu aina nuke Jerusalénnumka juakaru ainawai. 15 Nuiyasha apu Joaquínkan, nina nukurin, nina nuwe ainan, suntara apuri ainan, tura shuar eme anentsa iitai ainajaimak yaakat Babilonianam yaruakaru ainawai. 16 Apu Nabucodonosor diez mil shuar ainan achir yaruakua nuigka suntar maanitan yacha aina siete mil ajakaruiti. Nuiyasha takatai ainan najanin aina, tura jiru hierro tutain najanin aina mil ajakaruiti.
17 Tura apu Nabucodonosor Joaquínkan apari yachin Mataníasan Judá weantu ainan apuri amajas yaakat Jerusalénnumag apujsauwaiti. Nuna tura naarin yapajtak Sedequías atii, tusa tinaiti.
Sedequías Judánmaya ainan apuri jas inamramu
18 Sedequías Judá weantu ainan apuri jasua nuigka veinti uno uwí arujakuiti. Yaakat Jerusalénnumka once uwí inamrauwaiti. Nina nukurigka Jeremíasan nawantri Hamutal naartin yaakat Libnanmaya ajakuiti. 19 Turasha apu Joaquín pegkerchau ainan takájakua tumasag, nisha Yuusa chichamen umitsuk pegkerchau ainan takasuiti. 20 Nuna tuma asamtai yaakat Jerusalénnumia ainan, tura Judá nugkanmaya ainancha, Yuus shir senchi kajerak yaitsuk inaisauwaiti. Chikich tsawantin Sedequías, Babilonianmaya apu Nabucodonosor ajakua nuna kajerkauwaiti.