4 Apu Josías, Hilquíasan, sacerdote apurin, sacerdote chikich ainan tura waitin kuitamin ainan, yuus Baal tutai, Asera, tura ya aina emematku takatai aina Yuus ememattasa iruuntai jeanam iruna nu jiirtaarma, tusa tinaiti. Tusa takai ashi jiiraru ainawai. Turawar Jerusalénkan ikukiar entsa Sedrón tutain yantamen epeawaru ainawai. Turawar nuna yukurinka yaakat Betelnum jukiaru ainawai. ^a 5 Josías eke apu jatsaig Judánam yaunchuk apu ajakarua nuka Jerusalénnum tura chikich yaakat aina Judá nugkanam irunmaunmasha nita yuusrimtai ememattasa iruuntai jea ainanam, tura nain ainanmasha nekas yuuschau aina emematainak incienson epeawartinan sacerdoten anaiya jakaruiti. Nu sacerdote ainaka Baalan, etsan, nantun, ashi ya ainan emematainak incienson epejakaruiti. Tuma jakaru asarmatai nu sacerdote ainan apu Josías chicharuk: “Atumka yamaika sacerdoteka achattarme. Tuma asarum inciensoka epeashtattrume”, tusa tinaiti.

6 Josías, Yuus ememattasa iruuntai jeanam yuus Asera tutai a nu jukitarma, tusa tinaiti. Tusa takai yuus Asera tutain jukiar yaakat Jerusalénkan ikukiar entsa Cedrónka yantamen epeawaruiti, turam yuku jasuiti. Tumamtai nuna yukun jukiar nita ikumatairin ukatkaru ainawai. 7 Nuiyasha Yuus ememattasa iruuntai jea ajakua nuna arin, chikich aak ainasha ajakuiti. Nu aak ainanam nekas yuuschau ainan emematainak wayainajai mai aishmagkuk takanijaku aina nuna, tura nuwa aina nita yuusrimtairi Aseran emematainak nugkurtintrin apau ainasha nuig puju jakaruiti. Sacerdote ainan tura waitin kuitamin ainan, nu aak aina teaktarma, tusa Josías tinaiti.

8 Nuna tusa inaiyak, Leví weantu sacerdote aina, Judá nugkanam yaakat iruna nuiya yaakat Jerusalénnum ashi kaunkarti, tusa Josías tinaiti. Tusa timau asar ashi kaunkarmatai Josías nitan chicharuk: “Atum yaakat Guebanam nagkama yaakat Beersebanam, incienso aina atum epejakuittrum nuka, shir pegkerchauwaiti”, tusa tinaiti. Nuna tusa sacerdote ainan tura waiti kuitamin ainan, tagku aina patasar epeakur iwanch ememattin Jerusalénkan waitirin najankatarma tusa apu Josué timatai najankamu, yaakat Jerusalénkan waitirin menanmani irunu jakua nunasha ashi yumpuartarma, tusa tinaiti.

9 Josías sacerdote nekas yuuschau ainan emematainak incienso ainan nainnum epejakaru ainan chicharuk: “Atumka chikich sacerdote ainajai pan levadurajai pachimtsuk inaraamu yaakat Jerusalénnum yuattarme. Turasha yaakat Jerusalénnum Yuus ememattasa iruuntai jea arin tagku aina maa patasa epetai a nuigka, yamaika atumka tagku aina maarmeka epeashtattrume”, tusa tinaiti.

10 Nuiyasha nugka Ben-hinomnum yuus Moloc tutain emematainak uchi aishmagkun nuna turachkusha uchi nuwankesha maawar epeawarai tusarum nita yuusri emematku patasa epetairi yumpunkarum ikutarma, tusa apu Josías ujumak shuar ainan ishiakuiti. 11 Josías eke apu weatsaig Judá weantu ainanam yaunchuk apu ajakarua nuka, caballowa numamtin ainan najanawar tura carretancha najanawar etsan emematainak uwekama jakaruiti. Nu carretaka tura caballo ainasha Yuus ememattasa iruuntai jea arin, suntara apuri Natánmelec naartin ajakua nuna waitirin tijuch ajakaruiti. Nu caballowa numamtin najanamu iruna nuka utsagtarma turakrum carretaka ekemaktarma, tusa tinaiti.

12 Nuiyasha apu Manasés sacerdote ainan tura waitin kuitamin ainan, tagku aina maar patasar epeakur antra yuusrimtai aina ememattinan Yuus ememattasa iruuntai jea arin jimar najanatarma tusa takai najanamu ainan, tura Josías eke apu weatsaig Judá nugkanam chikich apu inamajakarua nu, tagku aina maar patasar epeakur antra yuusrimtai aina nu ememattin Yuus ememattasa iruuntai jeanam apu Acaz pujamu yakintin najanatarma tusa takai najanawaru aina nusha ashi tsairtarma, tusa apu Josías tinaiti. Tusa takai tsaikar jukiar entsa Sedrón tutainam utsagkaru ainawai. 13 Salomón israelita ainan apuri jas inamuk pujujakua nui, yaakat Jerusalénnum etsa watainmani, Olivosa naintrin nugkani yuus Astarté tutain Sidoniosnumia shuar aina ememattin, yuus Quemós tutain moabita aina ememattin tura yuus Milcom tutain amonita aina ememattin najanatarma tusa takai najankamu iruna nuka pegkerchau ainawai. Tuma asamtai nu ainanka Yuus nakitawai, tusa Josías tinaiti.

14 Nuiyasha nita ememattai kaya aina nusha tsaiktarma, tura nita ememattai numi ajigkari ainasha ashi yumpuartarma. Nu turarum shuara ukunchi aina yaruakrum nu kaya aina irunujakmaunam, tura numi ajigkari aina wajajakmaunam matsastaarma, tusa tinaiti.

15 Israelita ainan apuri Jeroboam naartin Nabat ajakua nuna uchiri nekas yuuschau emematainak iruuntratnun tura tagku aina maa patasa epeatin najanatarma, tusa takai yaakat Betelnum najanawaru ainawai. Nu turamunam israelita aina nekas yuuschaun eme anentas iiyainak, ememataina asar tunaun takajakaruiti. Josías Betelnum wuwaiti. Tuma nui jeawar nekas yuuschau aina emematku iruuntain, tura tagku aina maa patasa epetaincha tsaikar juyujuyuntu amajsar ekemakaruiti. Tura yuus Asera tutai najanamu nui atatmaun nunasha ekemakaruiti.

16 Josías yaakat Betelnumia waketki wesa nain jeachtachu amaunam ikuumatai atatmaun wainkauwaiti. Tura shuar nijai yujan chicharuk: “Au ikumatai aiya shuara ukunchi aina jukirum itartuatarma”, tusa tinaiti. Tusa takai ukunch ainan jukiar ejétuawaru ainawai, turam nuna juki Betelnumia aina tagkun maawar patasa epetaiya juka pegkerchauwaiti, taku nui irumar Josías epeawaiti. Yuusa chichamen etserin, Yuus akattram etserkauwa nuka tu uminkauwaiti. 17 Nuna tura Josías chichaak: “¿Au najanamu wajaun wainaj ausha warimpaita?” tusa tinaiti. Tusa takai Betelnumia shuar aina chichainak: “Apu, ame yamai Betelnumia shuar aina nita yuusrimtairi ainan emematainak tagku ainan maa patasa epetairi ajapeen irunu tsairkam utsagkaum aitkatnun, Judánmaya taa chichaman emtika etserkauwa nu ikusmauwaiti”, tusa tiaruiti.

18 Tusa tuinakai Josías chichaak: “Ukunch ainaka achikairpa”, tusa tinaiti. Tusa tinu asamtai Yuusa chichamen etserin Judánmaya tura Samarianmaya ajakaru nuna ukunchinka achitsuk inaisaru ainawai. 19 Israelita apuri aina, yuusrimtai aina iruuntra ememattin Samarianam najankatarma tusa tuinakai najankamu aina irunu. Nuna turawaru asarmatai Yuus nitan senchi kajerujakuiti. Nuna turawaru asarmatai, Josías sacerdote ainajai tura Yuus ememattasa iruuntai jea waitin kuitamin ainajai Samarianam wearuiti. Tuma jeaa yaakat Betelnumia ainan tsaikua turusag nuiya ainancha ashi tsaiku ainawai. 20 Nuna turawarmatai antra yuusrimtai aina emematku iruuntai ainanam sacerdote pujuinanka maawaru ainawai. Turawar shuara ukunchi ainan yaruakar nujaimak irumar nita tagku aina maa patasa epetai ainanmag patasar epeawaru ainawai. Nuna tura apu Josías shuar nijai yujainajaimak yaakat Jerusalénnum waketkinaiti.

21 Chikichik tsawantin apu Josías yaakat Judánmayan ashi shuar ainan chicham umikmau aarmauwa turusrik ina Yuusri emematkur Pascua jiistamami, tusa tinaiti. 22 Nuna tusa takai apu chichaman iwarin israelita ainanam pujujakarua nusha, tura Judá weantu ainan apuri ajakarua nukesha Pascuan tu jiistama jakchamun jiistamawaruiti. 23 Israelita aina Yuusan emematainak yaakat Jerusalénnum Pascuan jiistamawaru aina nunaka Josías apu jasmauri dieciocho uwí ején ai turawaru ainawai.

24 Nuiyasha iwishin ainan tura enentaimas nekau ainancha apu Josías ashi ijinawaiti. Antra yuusrimtai chiki chikichik jeanam irunun, antra yuusrimtai chikich aina Jerusalénnum irunun, tura Judá nugkanam yaakat irunujakua nuiya ainancha tura antra yuusrimtai aina emematku takatai ainan Yuus nakitamu irununka ashi tsaikuiti. Nuna turawa nunaka chicham umiktinan Moisés aarmaun Yuus ememattasa iruuntai jeanam aun wainkauwa nui warina pachisag aarmau aunak sacerdote Hilquías wainkayawa nuna umiak turawaiti. 25 Apu Josías tunau takatan inaiyak, Yuusan ima senchi ane jakuiti. Turak ima ninig enentaimas pujujakuiti. Tura Yuus wakeramua nunak takájakuiti. Chikich imanka yaunchuk apu ajakarua nuiyasha tura nina ukurin apu jasarua nuiyasha tumajakcharuiti.

26 Apu Josías nuna ashi turamtaisha, Manasés yaunchuk pegkerchau takasmaunam Judá nugkanam shuar aina pujuinanka Yuus kajerkamutak pujujakuiti. 27 Tuma asa Yuus chichaak: “Israelita ainan inaisauwaitaj turusnak Judá weantu ainancha inaisartatjai. Yaakat Jerusalénkan wii etegkawaitaj nunasha inaisattajai, tura wina emematrittsa iruuntai jeanam pujaj nunasha ikuktatjai”, tusa tinaiti.

28 Josías apu jas takajakmau ainanka, Judánmaya apu aina takajakmaun pachis ajakarua nuu papiinum Crónica tutainam aararuiti.^* 29 Josías apu ajakua nuu tsawantin, Asirianmaya apu nina suntarijai israelita ainajai maaniattsa weakai, Egiptonmaya apu Necao tutai ajakua nusha nitan yaigtasa entsa Éufratesnum wuwaiti. Tumawarmatai apu Josíascha nitajai maaniattsa nina suntaari ainan yaruak wuwaiti. Tuma wetatmaun yaakat Meguido tutainam jeastatuk wean Egiptonmaya apu Necao igkug maawaiti. 30 Turamtai nina suntaari apuri aina carretanam egkeawar Jerusalénnum ejéniaru ainawai, turawar nita ikumatainam ikusaruiti. Nuna turawar israelita aina, Josíasan uchirin Joacaz ajakua nuna nina apari apu ajakmaunam nina apu anaikaruiti. 31-37 (-)