3 Josías apu jas dieciocho uwí inamuk pujus Asalías ajakua nuna uchirin Mesulaman tiragke Safán apu takámun papiinum aain ajakua nuna, Yuus ememattasa iruuntai jeanam jeaam sacerdote apurijai chichasta, tusa akupkauwaiti. Turasha eke akuptsuk chicharuk: 4 “Sacerdote apuri Helquías chicharkum: ‘Israelita aina Yuusnau atii tusa kuitan Yuus ememattasa iruuntai jeanam ejeamun Leví weantu aina waitin kuitamin jukimu ainan kuitan irumrati. 5 Nuna tura shuar aina Yuus ememattasa iruuntai jeamkamua nu pegkerchau jasmatai takainan iin ainan susati. 6 Turam nu kuitjai tablajai takau ainan, tu takastarma tusa jintinkartin ainan tura jean jeamin ainan akikarti. Tura númi ainan kaya ainajai sumakarti. 7 Nu shuar ainaka pegker enentaimkau asarmatai, uruk kuitcha takasurum nu etserkatarma tusarka ticharti’ ”, tusa tinaiti.

8 Sacerdote apuri Hilquías, chicham umiktin aarmau Yuus ememattasa iruuntai jeanam aun wainkauwaiti. Tura apu chichakai papiinum aain ajakua nuna Safánkan ujakuiti, tura susauwaiti. Turam nuna ni juki aujsauwaiti.

9 Nuna tura apun ujaktasa Safán wuwaiti, tuma apun jeari chicharuk: “Apuru, ame chichakum, Yuus ememattasa iruuntai jeanam jiru plata tutai irumramu a nunaka jukiar, Yuus ememattasa iruuntai jea pegkerchau jasmatai iwarainan iin ainan susarti tusam tinaitam nunaka turusag susaruiti”, tusa tinaiti. 10 Tura nuiyasha Safán apun chicharuk: Chicham umiktin aarmaun, sacerdote apuri Hilquías surusmayi tusa apun ujakuiti. Nuna tura chicham umiktin aarmaun juki ejémurin apun aujtusuiti. 11 Chicham umiktin ajakua nuna aujtusam, nuna atuk apu Josías shir senchi wake mesemar nekapeak jaanchrin jakuiti. 12 Nuna turamuik Hilquíasan, Safánkan uchiri Ahicaman, Micaíasan uchiri Acboran, apu chichakai papiinum aain ajakua nuna Safánkan tura suntara apuri Asaíasan, nu ainan chicharuk: 13 “Wetarma. Tumarum wina pachittsarum, shuar aina pachisrum, ashi Judá weantu aina pachisrum tura chicham umiktin aarmau wainnaka nu pachisrumsha Yuus iniastarma. Ina uuntri ajakaru aina nu ju chicham umiktin aarmauwa nuna umikchamunam Yuus ina senchi kajertamkachjiash nu nekaatarma”, tusa tinaiti.

14 Yaakat Jerusalénnum chikich barrio yamaram najanamunam Saluma nuwe Yuusa chichamen etserin Huldá naartin pujujakuiti. Nina aparigka Ticvá naartin ajakuiti. Tura nina apachrigka Arhás naartin ajakuiti. (Salumka sacerdote nugkutairi ainan kuitamin ajakuiti). Tuma asamtai chicham umiktin aarmaun pachisar Huldajai chichasartasa Hilquías, Ahicam, Acbor, Safán tura Asaías nu aina wearuiti. 15 Tuma jeawar apu Josías ju pachisa inimsatarum tusa akuptamkamtai taaji, tusa ujakaru ainawai. Nu tusa tama nitan chicharuk: “Israel umirujakmauwa nu Yuus chichaak tawai: Wijai chichasti tusa shuar atumin akuptamkauwa nu chicharkurum titarma”. 16 “Wii, Yuus asan tajai: Chicham umiktinnum Moisés aarua nuna aujmaun Judánmaya apu Josías antuka turusnak yaakat Jerusalénnumia shuar ainanka waittan susartatjai, tura yaaktarincha yumpuntrattajai. 17 Nitaka wina chichamrun umirtutsuk pegkerchaun takainak, chikich yuus nekaschau ainan emematainak incienson epenawai. Tumaina asarmatai nuiya shuar ainanka wika senchi kajerkarjai. Tura asan pegkerchaun taká pujuarti tusanka tutsuk waittan tuke susartatjai”.

18 Judá weantu ainan apuri, Yuus iniastarma tusa atumin akuptamka nu chicharkurum Israel umirujakmauwa nu Yuus chichaak tawai titarma: Wii turattajai tusan tajam nu antukam nekaspapita tusam tinume. 19 Wii nu nugkanmaya shuar ainanka nita yaaktarin yumpuntrattajai, turakun nuiya shuar ainanka pegkerchau chicharkattajai tusan takai nu antukam pegkerchau takat inaisaume. Tura ame, shuar amijai pujuina tura amina uuntrum ajakarua nu tunaun taká jakmauri enentaimtusam wake mesemar nekapeakum útkum janchrum jakume. Nu tumamurmin anturkaujme. Tura asan wii Yuus asan tajame: 20 Aminka iturchat atsamunam agkan jakati, tumamtai nina patai aina nina uuntri ikumajakmaunam ikusarti tusan tajame. Ju yaaktan uruk wii yumpugtajak tura amee shuar ainan waittan uruk susartajak nuka ameka wainkashtinaitme, tusa Yuus turammayi tusarum apu ujaktarma tinaiti.

Tusa takai apu Josías akupkamu aina waketraruiti, tuma jeawar Yuus turammayi tusar apun ujakaru ainawai.