Judá weantu ainan Yuus ayamrukmau
19
Tuma jeawar Asirianmaya apu timaun pachisar apu Ezequíasan ujakaru ainawai. Turam nuna antuk apu Ezequías wake mesemar nekapeak jaanchrin jaakuiti. Tura nunaka inaiyak wake mesemar pujaku nugkutain jaanchin nugkuruiti, tuma Yuusan ememattasa iruuntai jeanam nina aujsattsa wuwaiti.2 Nu uwítin yaakat Jerusalénnum chikichik shuar Yuusa chichamen etserin Isaías naartin puju jakuiti, nina aparigka Amós naartin ajakuiti. Ezequías Yuusan aujas inaiyak, Eliaquiman, warí ainan kuitamin ajakua nuna, Sebná chicham umiktin ainan aarmaun kuitamin ajakua nuna sacerdote eme anentsa iitai ainan jaanch wake mesemar pujaku nugkutai aina nugkurum werum Isaíasjai chichastasrum wetaarma. 3 Tumarum ni pujamunam jearum chicharkurum: “Yamaika nuwa uchin jurertintri jeamtai najaimak kakamainchau nekapna numamtuk, senchi waitainaku natsaamainaji. 4 Asirianmaya apu suntara apurin akupkamu, amina Yuusrumin pachis pegkerchaun chichakma nuna nisha anturmamkashmashi. Nuna anturmamkau akugka amina Yuusrum waittan nina susati tajai. Tura israelita aina eke iwáku pujuina nuna pachis Yuusan aujsati”, tusa tinaiti.
5 Tusa takai apu Ezequíasa atutairi aina, Isaíasjai chichasartasa wearu ainawai. 6 Tuma jeawar Isaíasan ujakaru ainawai. Turam nuna antuk, Isaías nitan chicharuk: Wii chichaman akuptaj nu atumin apuri Ezequías ujaktarma: Yuus chichaak: Asirianmaya apu wina pachitas pegkerchaun chichaka nuka ashamkaipa. 7 Wii ninka chikichik shuaran chicham pegkerchaun ujakti tusan akuptuktatjai. Turam nuna antuk nina nugken waketkimtai nuiya shuar aina maawartatui, tusa Yuus tawai tinaiti.
8 Asirianmaya suntara apuri nina apuri Senaquerib yaakat Laquisnum pujau yaakat Libnanmaya shuar ainajai maaniattsa wu tamaun antukuiti. Nuna antuk nina apurijai igkuniaktasa yaakat Jerusalénnum pujau nisha wuwaiti. 9 Asirianmaya apu nui pujus, Etiopíanmaya apu Tirhaca nina suntarijai amina suntarum ainajai maaniattsa winitramainawai tusa tamaun antukuiti. Nuna antuk apu Ezequías ujaktarma tusa chichaman etserin ainan ataksha akupkauwaiti 10 Nu papiinum aak: “Ezequíasa, israelita ainan apuriya ame Yuus umirnaitam nu wina pachitas Asirianmaya apuka yaakat Jerusalénnaka yumpugchattawai tusa taku tsanurmawaigka. 11 Asirianmaya apu aina chikich nugkanmaya shuar ainajai maaninaksha tuke nepetma jakarua nuka ameka nekame. ¡Tuma asam ii ainatinka ina Yuusri yainmaktatji tuka enentaimipa! 12 Wii weantu apu ajakarua nu, yaakat Gozánnumia shuar ainajai, yaakat Aránnumia shuar ainajai, yaakat Résefnumia shuar ainajai tura yaakat Telasarnumia shuar ainajai maaninak nepetujakarua nuisha nu yaaktanmaya ememattai yuus ainaksha nitanka ayamrukcharuiti. (Yaakat Telasarnum shuar pujujakarua nuka nugka Bet-edénnumia ajakaruiti).
13 Tura yaakat Hamatnumia apuncha, yaakat Arpadnumia apuncha, yaakat Sefarvaimnumia apuncha, yaakat Henánumia apuncha tura yaakat Ivánumia apuncha ijinawaru ainawai”. 14 Asirianmaya apu Senaquerib akupkamu suntara apuri aina yaakat Jerusalénnum apu pujusa inamtai jeanam jeawaruiti. Tumawar apu Sedequíasan papi aarmaun susaruiti, turam juki aujas umik Yuus ememattasa iruuntai jeanam wuwaiti. Tuma nui wayaa Yuusa emtin nuna papiin atir aepsauwaiti.
15 Nuna tura Yuusan chicharuk: “Israel shuar ainan Yuusriya amina inamtairmeka querubín ainanam awai. Ashi nugkanam shuar aina iruna nuna Yuusrimka ima ameketme. Nayaim tura nugka ainasha ame najanawaitme. 16 Yuusa tuke pujuwa antukta, apu Senaquerib Yuusa amina pachitmas pegkerchaun aar wina akupturka ju amesha enentaimtusam iista. 17 Yuusa, nekas Asirianmaya apu ainaka shuar ainan ijinuk yaaktari ainancha yumpuntraru ainawai. 18 Tura nu shuar aina yuusrimtairi tablajai najanamu ainan tura kayajai najanamu ainancha jijai aestukaru ainawai. Turasha nunaka shuar aina najanamu nekas yuuschau asarmatai turawaru ainawai. 19 Ina Yuusriya, Asirianmaya suntar aina ina ijitmawaij, ame agkanmamtikartuata. Turukratawakmin chikich nugkanmaya shuar ainasha, nekas Yuus Tuke Pujumka ima ameketam nuna nekarmawarti”, tusa tinaiti. 20 Tusa tinu ai Ezequíasan chichaman ujakti, tusa Isaías chichaman etsernun akupeak: “Ame Israelan Yuusri, aujsaum nunaka anturkajai”, tusa turamui tinaiti.
21 Yuus Asirianmaya apun chicharuk: Yaakat Jerusalénnumia shuar ainaka, chikichik nuwa agkantu wishimaina numamtuk, ame Jerusalénnum taa waketkumin muuken peas wishikramainawai. 22 ¡Ameka wina pegkerchau chichartukume! ¡Wina pegkerchau chichartakum amek eme anenmamsam senchi chichakume! ¡Israel shuar ainan Yuusri Pegkeraitaj nu pachittsam pegkerchau chichartukume! 23 Amina suntarumi apuri aina titá tusam ame timau asar wina pachittsar pegkerchaun chichakarai.
Ame chichakum: “Winaka maaniaku wekatai carro aina shir nukap arutu asamtai, nu ainajai
nainnumsha wakajai.
Nain Líbano tutai yaki tsakarua nuisha wakan
cedro yaki tsakaku ainan
tura númi pino tutai shir pegker ainancha tsupirmajai.
Nain yaki tsakaku ainanmasha imanai wakan
jardínnum númi arakmau irunna numamtuk
irununcha wainkamjai”, tusam tame.
24 Chikich shuar ainan nugken nugkan tain yumirmatan najankan nu ainanmayan entsan umarmajai,
tura Egiptonmaya entsa ainancha
najatkan muku amajsarmiajai, tusam timame. 25 Tumatin arti tusan wii timau asa tumaina nu nekamainaitme.
Ju yamai nagkama junaka
yaunchuk nagkamsan tumatin atii tusan wii umikuitjai.
Tuma asamtai yaakat pegmara tentakmau aina
kakaar ayamrumamainchau,
senchi sapijmau tura natsaamin ajakaru ainawai.
Tumau asarmatai árak yama tsapaina ajanam irunu najatka ijinmaina numamtuk,
tura jea tuntupen nupa tsapak atatmaun etsa sukua ijinna numamtuk nitaka ijinawaitme.
27 Wika ame chikich nugka ainanam wekam nuna, tura ame takaamuram ainancha ashi nekajai. Tura wina ame senchi kajertukum nunasha nekajai. 28 Ame kajenaitam nuna tura ememauwaitam nunasha nekajme,
tura asan patakemtain nujimin netuattajme.
Nuiyasha wechamnau amajsattajme,
nuna turan ame tamunmanig awaigkittajme.
Yuus turamui tusa Isaías tinaiti.
29 Nuna tusa inaiyak Isaías apu Ezequíasan chicharuk:
“Wii tajam nu uminkatnuka ju uwí atata nu
tura chikich uwí atata nuisha
trigo nitak tsapak nerekmatai nuna jukar yuartatui.
Antsu tres uwí atata nuigka árak aina atumek ararum nerekmatai juttarme,
tura uva aina ararum nerekmatai nu jukrum yuattarme. 30 Judá weantu aina jinacharu pujuina nuka, árak kagkapena wajas nerena numamtuk pampagkartatui. 31 Jerusalénnumia ainaka tsukajaigka ashika jinachartatui,
ujumak shuar aina iwáku juakartatui. Yuus ashi senchirtina nu nitan anea asa nunaka turattawai”, tusa tinaiti.
32 Yuus timaun Isaías apu Ezequíasan chichaman akuptak: “Sirianmaya apu Senaqueribka yaakat Jerusalénnaka utuashtatui.
Chikichik flechankesha nagkimashtatui.
Ajamaka maanitain ajamaksha utuashtatui.
Tura yaakat pegkramunam wakattsasha wataincha najanashtatui. 33 Yaakat Jerusalénnumka waitsuk ni taamunmanig waketkittawai, tusa Yuus tawai tinaiti.
34 Wina umirtin David ajakua nujai chichaman umiku asan,
tura chikich shuar ainasha wina umirtukarti tau asan,
ju yaaktanam pujuinanka wii kuitamkattajai
tura wii ayamrukartatjai”, tusa Yuus tawai tinaiti.
35 Yuus tinu asa, nayaimpinmaya shuar ainan nuu kashitinig ishiakuiti. Turam Asirianmaya ainan ciento ochenta y cinco mil suntar ainan ijinawaruiti. Turamu tepetar jainan tsawarar wainkaru ainawai. 36 Nu tumawarmatai Asirianmaya apu waketki yaakat Nínivenam jeawaiti, tuma nui pujusuiti. 37 Nui pujus nita yuusri ememattasa iruuntai jeanam chikichik tsawantin Senaquerib wayaawaiti. Tuma ni yuusrimtairi Nisroc tutain emematuk pujaun nina uchiri Adramélec tura Sarézer nu aina maawaruiti. Nuna turawar nugka Araratnum tsekegkiaruiti. Tura maawarmatai nina uchiri Esarhadón apu jasuiti.