18
1-8 (-)Samarianmaya shuar ainan Asirianmaya shuar aina nepetkamu
9 Ezequías apu jas Judá weantu ainanam inamuk cuatro uwí pujai, tura Elá uchiri Oseas apu jas Israel shuar ainanam inamuk siete uwí pujai, Asirianmaya apu Salmanasar nina suntaari ainajai yaakat Samarian tentakuiti. Tura maaniawaiti. 10 Nuka maa maaninakua tres uwí ejéniaruiti, tuma Samarianmaya ainan nepetak yaaktanka nita jukiaru ainawai. Nunaka Oseas apu jasmaurin nueve uwí ején ai, tura Ezequías apu jasmaurin seis uwí ején ai turawaru ainawai. 11 Asirianmaya shuar ainan apuri Almanasar nina suntaari ainajai, israelita ainan nepetak achir nina nugken Asirianam yaruakuiti. Nuna tura Habor nugkanam yaakat Halah tutainam matsasuiti. Chikich ainanka entsa Gozán tutai yantamen matsasuiti. Tura chikich ainanka medo ainan yaaktarin matsasuiti. 12 Israelita aina tumawaru aina nunaka, Yuus nitajai chichaman umikua nuna, tura chicham umiktin ainan Moisés Yuusan umirin ajakua nu aarmauncha umikcharu asar tumawaruiti.
Senaquerib Judá weantu ainajai maaniamu
13 Ezequías apu jas Judá weantu ainanam catorce uwí inamuk pujai, Senaquerib Asirianmaya shuar ainan apuri jasuiti. Tuma nina suntaari ainajai Judá weantu ainajai maanik nepetak yaakat ainan pegmara tentea apakmau ainan atainiar nitanu amajsaru ainawai. 14 Nuna tura asamtai Judá weantu ainan apuri Ezequías, Sirianmaya shuar ainan apuri Laquisnum pujuttamaun chichaman akuptak: “Wii pegkerchaun takasjai. Wina nugkarui pujam nuka amina suntarumjai jinkim wetá. Tura nuiya jinki weakminka, urutma akirkati tusamek turuttam nunaka imatiksanak akittajme”, tusa tinaiti. Tusa chicham akupkamun Asirianmaya apu antuk, ayu tusa Ezequíasan nueve mil novecientos kilo jiru plata tutai kuit najanamun nuiyasha oron novecientos noventa kilon surusti, tusa tinaiti.
15 Nuna tusa timatai Yuus ememattasa iruuntai jeanam jiru plata tutai kuit najanamu aunka ashi juki, tura apu pujusa inamtai jeanmayancha yaruak susauwaiti. 16 Nuiyasha Yuus ememattasa iruuntai jean waitiri ainan orojai ukatka najanamuri ainan, tura waiti nujamkatnuri aina orojai najanamuri ainancha, Asirianmaya apu Senaquerib ajakua nuna susauwaiti. 17 Turamaitiat Ezequíasa suntaari ainajai maaniatarma, tusa apu Senaquerib yaakat Laquisnum pujus, nina suntaari apuri eme anentsa iitairi ainan suntar maanitan yacha ainajai yaakat Jerusalénnum ishiakuiti. Nu turamu aina yaakat Jerusalénnum jeawar, entsa Guiheón tutai pukuni jinu akaikiti tusa nugka taimu nuna yantamen entsa pajamrau amaunam shuar aina jaanchin nijawar pegker amaju jaku aina nui pujusaruiti. 18 Nui pujusar apu Ezequías taati tusar nigka wetsuk, Eliaquim, Hilquíasan uchirin jea apu pujusa inamtainam warí aina irunun kuitamin ajakua nuna, Sebná chicham umiktin aina aarmaun kuitamin ajakua nuna tura Joah, Asaf uchiri papiin ajakua nuna nitajai igkuniaktarma tusa akupkauwaiti.
19 Nu aina jeawarmatai, Asirianmaya apu akupkamu ainanmaya chikichik chichaak: Ina apuri Senaquerib apu Ezequíasan chichaman akuptak: ¡Ameka emeka anenmamaitsume! 20 Chicham pegker chichamua nuka maanita nekaujai metekchauwashit tuka enentaimsaipa. ¡Amina yainmamain atsau asamtai, ameka wijaigka kajernaimaitsume! 21 Ameka egiptonmaya aina yainkartatua tu enentaimu iiyajme. Egiptonmaya apu yainkati tusa enentaimunka, tagkan ushukrutai chipakau ushukram uwejan chigkamaina numamtuk yaichuiti.
22 Yuus emematku tagku aina maa patasa epetai aina chikichnum irunu utsagkuitme. Nu turakum Jerusalénnumia shuar aina, tura Judá weantu ainasha yaakat Jerusalénnum tagku aina maa patasa epetai a nuig, tagku ainan maa epenak Yuusnaka emematiarti tusam tinu asam, ii ainati ememattai Yuus inka yainmaktatji tusamka tumaitsume. 23 Wina apur Senaqueribjai chicham umikta. Nu turawakminka amina suntarum aina nu dos mil entsamak maanimain akaigka caballo ainan dos mil susatjame. 24 Ame Egiptonmaya caballo aina tura suntar caballonam wekas maanin aina nu yainkati tusam takumsha, Asirianmaya suntar shir kakakchau aina nukesha awakkam etsekemaitsume. 25 Nuiyasha ameka Yuus nitajai maaniktarma tusa tichamaitak, ijai maaniattsa kaunkachiash tuka enentaimipa. Inka Yuus nitajai maniakum ijinata tusa turamin asamtai yujaji. Tusa tuinawai tusarum apu Ezequías ujaktarma, tusa tinaiti.
26 Tusa takai Eliaquim, Sebná tura Joah nu aina Asirianmaya apu akupkamun chicharuk: “Yaakat Jerusalén pegkramunam shuar yaki pujuina nu ashi antuinawai. Tuma asamtai wait aneasam hebreo chichamjaigka aujkartusaipa. Antsu arameo chichamjai aujkartusta, ika arameo chicham chichau ainaji”, tusa tuina. 27 Tusa tuinakai Asirianmaya suntara apuri nitan chicharuk: “Atumjai tura Ezequíasjai metek nitasha, yumaintri tura umumaintrisha atsurmau asar, tsukamainak nita ijinak yuawartin, tura kitamainak nita shikinak umarartin asamtai, Asirianmaya apuka ima atumnak tura Ezequíasak ujaktarma tusanka akuptamkashmaji, antsu ashi shuar aina ujaktarma tusa akuptamkamji”, tusa tinaiti.
28 Nuna tusa inaiyak Asirianmaya suntar ainan apuri hebreo chichamjai senchi chichaak: “Asirianmaya apu chikich ainan nagkasauwa nuna chichame antuktarma. 29 Ezequías tsanurmawairum, nigka wina suntarun nepetkagka atumnaka ayamrutmamaitsurme. 30 Ezequías atumin chichartamuk, Yuus nekaspapita tusarum titarma. Yuuska, ju yaaktan Asirianmaya apu yumpugti tusagka tsagkamkashtatui”, tusa turamrume.
31 Tusa turamkurmincha Ezequíaska nekaspapi tawa tirpa, winaka Asirianmaya apu atumin chichaman ujakti tusa akuptukmayi. Nuka juwaiti: “Maanitsuk pujusmi tusa wijai chichasti, tumawar wina inatair arti, nuna tumawar shir pujusar chiki chikichik nita arakmaunmayan uvan, higo ainan yuartatui, tura entsancha nita taimunmayanak umiartatui”. 32 Tuma pujuinan wii taruan nita nugken trigo aina, uva aina, pan najana yumain aina, vino najana umumain aina, olivo aceiteri aina, napa yumiri aina iruna nujai metekmamtinum, chikich nugkanam yaruaktatjai. Nuigka jinutsuk shir pujusartatui. Turasha Ezequíaska atumin tsanurmak, Yuus yainmaktatji tusa turamrum nuka anturkairpa. 33 ¡Asirianmaya apu Senaqueribpan suntaari ainajai maniakai chikich nugkanmaya ainan yuusri aina nitan ayamrukuka pegkesha atsawai! 34 Yaakat Hamatnumia yuusrimtairi aina, yaakat Arpadnumia yuusrimtairi aina, yaakat Sefarvaimnumia yuusrimtairi aina, yaakat Henánumia yuusrimtairi aina tura yaakat Ivánumia yuusrimtairi ainasha yaakat Samarianmaya shuar ainancha Asirianmaya apu Senaqueribpa suntaari ainajai maniakaisha ayamrukcharu ainawai. 35 ¡Atum yaakat Jerusalénnum pujuinatirmeka inka Yuus ayamrutmaktatji tuka enentaimirpa! tusa tinaiti.
36 Takaisha aimkacharti tusa apu tinu asamtai, yaakat Jerusalén pegkramunam yaki shuar aina irunusha pegkesha aikcharu ainawai. 37 Nu tusa tamaun antukar Eliaquim, Sebná, tura Joah nu aina wake mesemar nekapenak jaanchrin jakaru ainawai. Tumawar Asirianmaya suntar ainan apuri timaun pachisar Ezequíasan ujakartasa wearu ainawai.