14 Eliseo shir senchi ja asa jakattak pujaun, israelita ainan apuri Joás iistasa werinaiti. Tuma jeari útuk pagkuk chicharuk: “¡Apaachi, apaachi! Israel shuar ainanmagka ameka suntar nukap asa senchirtina iman ajakuitme”, tusa tinaiti. 15 Tusa tama Eliseo apun chicharuk: “Arcoram flecha ainajai jukita”, tusa tinaiti. Tusa tama arcon, flecha ainajai apu jukinaiti. 16 Turamtai Eliseo chicharuk: “Flecha ekenkattsam umintsata”, tusa tinaiti. Tusa tama flechan ekenkattsa uminai, Eliseo apu kunturin achirkauwaiti. 17 Tura chicharuk: “Iimsatin etsa watainmani chigkaimu a nu uraita”, tusa tinaiti. Tusa tama iimsatin chigkaimun apu urainaiti, turamtai Eliseo chicharuk: “¡Yamaika flecharam ekenkata!” tusa tinaiti. Tusa tama apu flecharin ekenkauwaiti, turamtai Eliseo senchi chichaak: “¡Ame Yuusa flechari nepetmauwa nujai, Sirianmaya shuar aina, yaakat Afecnum nepetkattame, turakum ashi ijinattame!”, tusa tinaiti

18 Nuna tusa inaiyak ataksha apun chicharuk: “Chikich flecha aina achikta”, tusa tinaiti. Tusa tama flechari ainan achikuiti, turamtai Eliseo chicharuk: “¡Yamaika flecharam ainajai nugka awatta!” tusa tinaiti. Tusa tama flechari ainajai, apu nugkan tresa imajnia awati inagnakuiti. 19 Nuna turamtai Eliseo apun kajerak chicharuk: “Cincowa imajnia turachkumsha seisa imajnia nugka awatin akumka, Sirianmaya shuar ainaka ashi ijinmain amajkaume”. Turasha yamaika treschikia nugka awatin asam, Sirianmaya shuar ainaka treschikia nepetkattame. 20 Nuna tusa ashi umik Eliseo jakauwaiti, tumamtai nina patai aina ikusaru ainawai. Tuma ai Moabnumia shuar aina, chiki chikichik uwítin kasarainak israelita ainan waitkaina.

21 Chikichik tsawantin israelita aina shuar jakaun ikusartasa nugkan tainak pujusar iimsatajkama Moabnumia shuar kasa aina wininan wainkaruiti. Tumawar nitan ashamainak mantuawai tusar tsekenak, shuar jakaunka Eliseo ikusmau wa amaunam imanai nagkima ikukiaru ainawai. Tura shuar jakau ikukmau Eliseo ukunchin antig anean wajaknaiti. 22-25 (-)