Salomón yaakat Tironmaya apu Hiramjai chichaman umikmau
5
Salomón apu jasu tusa tamaun, Tironmaya apu Hiram antukuiti. Tuma nijai chichastasa nina inatairi ainan Salomón pujamunam akupkauwaiti. Nunaka yaunchuk Davidtan tuke ane jaku asa turawaiti. 2 Nu aina jeawar Salomónjai chichasaru ainawai. Tumawar waketainakai Salomón apu Hiraman chichaman akuptak: 3 Wina apar David Yuusan ememattasa iruuntai jean nina shuarijai maaniak agkan pujachu asa, jeamkachua nuka nekame. Turasha Yuus nina shuari ainan nepetkati tusa tama nepetkauwaiti. 4 Turasha yamaika ina Yuusriya nu agkanmamtikramaji. Turutma asamtai jutijai maanimainka ina shuari ainasha, tura iturchat ainasha pegke atsawai. 5 Tuma asamtai, wina apar Davidtan ina Yuusriya nu chicharuk: “Wina emematrittsa iruuntai jean ame jakaakmin amina uchiram apu jastata nu jeamkattawai. Nuna tinu asamtai wii yamaika jeamkattsan wakerajai”, tusa tinaiti. 6 Tusa tinu asamtai, amina inatairam aina cedro ainan Líbano tutaiya nuiyan tsupirarti. Tura wina inatair ainancha nitan yaigtina akuprattajai. Turasha amina inatairam aina nita takamunam urutam akikta tusamek turuttam nunaka imatiksanak akiktajai. Nuna taja nunaka ii shuar ainaka Sidónnumia shuar aina tablan tsupitan yacha aina imauchu asamtai tajai, tusa tinaiti. 7 Tusa chicham akuptukam Hiram antuk shir senchi shir aneasuiti. Tuma asa senchi chichaak: “Davidtan uchirin apu atii tusa yachamatan Yuus susau asamtai, nigki ememattai atii”, tusa tinaiti.8 Tusa Hiram Salomónkan chichaman akuptak: “Ame chicham akupturkamun antukjai. Tuma asan ame turutam nunaka imatiksanak cedro ainan tura pino ainajai akuptuktatjame. 9 Wina inatair aina Líbanonam tsupirar nayantsanam utsawartatui. Turawar papagmawar ame tuig itaata tusamek titam, imanai wina inatair aina ejéniartatui. Tura atirarmatai ame yaruaktatme. Turasha ame wina akirmainaitam nuka wijai shuar takau aina nu yuawartin susarta”, tusa tinaiti.
10 Tusa tinu asa Hiram, Salomón seammaunka turusag cedro ainan tura pino ainajai susauwaiti. 11 Turamtai Salomón Hiraman nijai takau ainan yuatnun cuatro millones cuatrocientos mil litros trigo ainan, tura cuatro mil cuatrocientos litros olivosa nerenia aceite jukamu ainan chiki chikichik uwítin Salomón Hiraman sujakuiti. 12 Yuus ni anajmatawa turusag Salomónkan yachamatan susauwaiti. Tura Hiramsha maaniachmi tusa Salomónjai chichaman umikaruiti. Tumawaru asar maanitsuk pujujakaruiti.
13 Apu Salomón takat aina takantsati tau asa, ashi Israel shuar ainan chichaman akupturuiti. Turamu asar treinta mil shuar iruuntraruiti. 14 Tumawarmatai diez mil shuar aina Líbano tutainam shiakar chikichik nantu pujusar Cedrón tsupirarti tusa ishimajakuiti. Turamu asar nu shuar ainaka chikichik nantu takasar nita pujutairin waketkiar jimar nantu nita jeen pujujakaruiti. Nuna takata apurigka Adoniram naartin ajakuiti. 15 Tura nuiyasha setenta mil shuar aina cedro nakarmaun yanainak pujuina. Tura ochenta mil shuar aina kayan nakainak nain pujuina. 16 Nuiyasha apu shuar takainakai iin ainaka tres mil trescientos shuar ajakuiti. 17 Tura Yuus ememattasa iruuntai jea eapka jeamtin kaya uun aina kaya pakamkamu ainajai utitarma tusa ni shuar ainan ishiakuiti. 18 Turamu asar jea jeamin Salomónka inatairi aina, tura Hiraman inatairi ainajai, tura shuar yaakat Guebalnum matsamin ainajaimak Yuus ememattasa iruuntai jean jeamkatnun cedro ainan nakarar, tura kaya ainancha nakarar pakamkar umikaru ainawai.