2 Yuus ememattasa iruuntai jean Salomón jeamkauwa nuka: Esanti veinti siete metros ajakuiti. Tura wagkantigka nueve metros ajakuiti. Antsu yakintigka trece metros y medio ajakuiti. 3 Tura Yuus ememattasa irumtai jea yama nagkamchaku waitai ajakua nuna wagkantinka, nueve metros ajakuiti. Tura esantigka cuatro metros nagkaiki ajakuiti. 4 Turasha iimsatin aina nu jeanam chigkaimu ajakarua nuka jirujai takasmau ajakaruiti. 5 Tura nuiyasha sacerdote aina nui pujusar takakmasartin asarmatai nu jea jeamkamua nuna yantamen achimtik jeamkauwaiti. Tura tresa imajin tesawaiti. 6 Nu jea yama nagkamchak tesamua nuna wagkantigka dos metros, nuiya nagkaiki veinticinco centímetros ajakuiti. Tura chikich ajapeen tesamu ajakua nuka dos metros, nuiya nagkaiki setenta centímetros ajakuiti. Tura chikich inagnaku tesamu ajakua nuna yakintigka tres metros, nuiya nagkaiki quince centímetros ajakuiti. Nu jea jeamkatnun nugkani neka nekapmakua shikapchinam inagnakuiti. Nuna turawa nunaka Yuus ememattasa iruuntai jean, númi aina iju chigkawai tusa turawaiti. 7 Yuus ememattasa iruuntai jean jeamkaru aina nuigka, kaya pakamka umikmau ainajai takaina asarmatai, martillo ainajai, hacha ainajai tura chikich jiru najanamu aina nujaigkisha awatmaunka antukcharuiti. 8 Tura Yuus ememattasa iruuntai jea jeamkamunam achimtikra chikich jeamkamu ajapeen ajakua nuna waitirigka untsurnumani ajakuiti. Antsu nui wayar chikich jeanam yaki wataigka tentea iwakmau ajakuiti.

9 Yuus ememattasa iruuntai jean ashi umikaruiti, tura inagnainak jea ukurin cedro nakarmaun patararuiti. 10 Tura jea warí aina chumpiatin jeamkamu ajakarua nuka, Yuus ememattasa iruuntai jeanam shir achimtikra ashi tentakmau ajakuiti. Turasha chiki chikichik jea tesamu ajakarua nuna yakintigka dos metros, nagkaiki veiticinco centímetros ajakaruiti. 11 Nuna umikarmatai Yuus Salomónkan chicharuk: 12 Wina emematrittsa iruuntai jea jeamkaum nuna pachisan tajame: Wina chichamur metek umiakminka, amina apan turatnaitjai tusan anajmatawaitaj nuna amijai metek umiktatjai tusan tajame. 13 Tura israelita ainatirmeka wii etegkamu ainarme, tuma asaakrumin pegkesha ikukchatnaitjarme, tusa tinaiti. 14 Yuus ememattasa iruuntai jean Salomónka inatairi aina umikaru ainawai. 15 Jea initkenka cedro nakarmaun tanishmar shir umikuiti. Antsu nugkanmagka númi pino tutai nakarmaujai papaa shir umikuiti. 16 Nuiyasha jea nagkatkamunam yaki nagkama cedro nakarmaujai shir tanishmar tesawaiti. Nu tesamuka shir Pegker tutai ajakuiti. Tura nuna esantinka nueve metros tura wagkantisha nueve metros ajakuiti. 17 Antsu chikich tesamuka Pegker tutai ajakuiti. Nuna esantigka dieciocho ajakuiti. 18 Antsu Yuus ememattasa iruuntai jea jeamkamua nuna inittrigka cedro tanishmarmaunam yagkur aina tura numi nere aina nakumramu ajakuiti. Ukurinigka cedro anujtura takasmau asa kaya ainaka pegke wainna jakchauwaiti.

19 Tura Salomón, tesamu shir Pegker tutain umikuiti. Nunaka Yuus chichaman umikua nu egkeatnun turawaiti. 20 Tura tesamu shir Pegker tutaiya nuna inittri esantigka nueve metros ajakuiti. Tura wagkantisha nueve metros ajakuiti. Tumasag yakintisha nueve metros ajakuiti. Antsu Yuus ememattasa patasa epetain Salomón cedro nakarmaujai najana orojai ukatkauwaiti. Tura tesamu shir Pegker tutaiya nuna emtin apujsauwaiti. 21 Tura nuiyasha Yuus ememattasa iruuntai jean, tura tesamu shir Pegker tutaincha aya orojaig ukatkauwaiti. Tura nuna umik waitirin cadena aya orojaig najanamun netua inaisauwaiti. 22 Tura nuna ashi ukatak umik, Yuus emematku patasa epetaincha turusag aya orojaig ukatkauwaiti.

23 Tura nuiyasha tesamu shir Pegker tutaiya nui atinan jimar querubínkan númi olivo tutain nakumak umikuiti. Nu ainan yakintigka cuatro metros ajakuiti. 24 Chiki chikichik querubínkan nanape dos metros, nagkaiki veinticinco centímetros ajakuiti. Tuma asar jimar apatka nekapman cuatro metros, nagkaiki ajakuiti. 25 Nu jimar najanamu aina nuka nekapmam metek ajakaruiti. Tumaina asar nu iimtinak ajakaruiti. 26 Tura nuna esantigka cuatro metros, nagkaiki ajakaruiti. 27 Salomón nuna juki tesamu shir pegker tutaiya nuna ajapeentrin apujsauwaiti. Tura nuna nanape ainaka yapas ajakaruiti. “Chikichka mena nanapejai tanish nujinmani aun antias” ajakuiti. Antsu “chikichka untsur nanapejai tanish nugkani aun antias” ajakuiti. Tura tesamu shir Pegker tutainam mai nanapek antinias ajakuiti. 28 Nu ainan Salomónka inatairi aina aya orojaig ukatkaruiti.

29 Tura nuiyasha Salomónka inatairi aina, Yuus ememattasa iruuntai jean tanishri initani, tura nuna ukurincha querubín ainan, kampanak tutai ainan, yagkur ainancha nakumraruiti. 30 Tura jea shir pegker tutai init nugkanam cedro nakara paparmau ainanam, tura arijaimak turusag orojai ukatkauwaiti. 31 Antsu tesamu shir Pegker tutai waitirigka númi olivo tutai najatamu ajakuiti. Nu waiti aina anujkatin numi ajinkamurigka cinco ajakuiti. 32 Jimar waitiri ajakua nuka númi olivo tutaijai najankamu ajakuiti. Nu ainanam querubín aina nanamtin nakumramu ajakuiti. Nuiyasha kampanak aina yagkur aina nakumramu ajakuiti. Nu ainasha orojai ukatkamu ajakuiti. 33 Tura Yuus ememattasa iruuntai jea waitiri ajakua nusha turusrik metek nekapma anujkamu ajakuiti. 34 Nu jimar waiti najanamu ajakua nuka númi pino tutaijai najanamu ajakuiti. Nu waiti jimara nuka mai uranujakuiti. 35 Tura nuisha querubín aina, kampanak aina, yagkur aina, nakumramu ajaku ainawai. Nu ainasha orojaig ukatkamu ajakuiti. 36 Nuiyasha jea aarin agkantu amaunam atrio tutain kaya nakara pakamamu ainajai tresa imania patarar najanawaruiti.

37 Salomón apu jas cuatro uwí inamuk pujau asa, nantu Zif ta nui Yuus ememattasa iruuntai jean jeamtasa nagkamawaiti. 38 Yama nagkamchak apu jas puju jaku nui nagkama nekapmamka once uwí ejé nantu Bul ta nui Salomón Yuus ememattasa iruuntai jean jeamnaiti. Yuus ememattasa takatai aina nunaka shir umitnaka ashika siete uwí umikuiti.^b