2 SAMUEL
Saúl jakamun David antuk útmau
1
Saúlan filisteo aina maaniamunam maawaru ai, David amalecita ainajai maanik nitan nepetak yaakat Siclagnum waketki jimar tsawan pujusuiti. 2 Saúl maaniaku pujamunmaya, tres tsawara ai chikichik shuar tsekegnaiti. Tuma wake mesemar nekapeamurin iwainmamuk nugkutairin jak, tura muuken nugkajai yukug Davidtan jearnaiti. Tuma eme anentas iiyak tikishmatrauwaiti. 3 Turam David chicharuk:“¿Tuiya winame?” tusa tinaiti.
“Tusa tama ni chichaak: Filisteo ainajai maaniakun pujaun tsekegkin taajai”, tusa tinaiti.
4 “Tama David chicharuk: Uruk nagkamasa nu pachisam ujatkata”, tusa tinaiti.
“Takai ii shuar ainan, filisteo aina nukap maawarmayi. Antsu chikich ainaka tsekeararmayi. Tura Saúlnasha nina uchiri Jonatánjai maawarmayi”, tusa tinaiti.
5 Takai David nina chicharuk: “¿Saúl nina uchiri Jonatánjai maamusha itursamea nekame?” tusa tinaiti.
6 Tusa tama ni chichaak:
“Wika Gilboa murariin maaniamunam wemajai. Tumakman filisteo suntar aina caballonam entsatkau aina, tura carretenam wenasha Saúlan jearsattak weriarmayi. Tumainai Saúl maa maaniakua shir pimpikin asa, kakaamainchau nekapuk nina nagkirin ushukrus wajamai. 7 Tuma wajau ayanma iimsatajkama, wina waitak untsurkamai. Turutamtai werin ni wajamunam jearmajai. Warinma yaimainaitjam nu turutta”, tusan timajai. 8 Tama Saúl chichartak: “¿Amesha yaitam? tusa turutmayi. Turutkai wii ayakun, wika Amalec shuaraitjai”, tusan timajai. 9 Tama ni chichartak: “Jakataj takuncha jamain nekapeatsjai. Ame wári jui taam mantuata, shir senchi pimpikin asan jakattsan wakerajai. Tumaknasha jatsjai, tusa turutmayi. 10 Takai werin jeaan ashi jaka tepaun wainkamjai. Turan semainchau asamtai maamjai. Turan ni etsegkrutairin, tura kuntunam patakemtairin jukin apuru jui itajai”, tusa tinaiti.
11 Tama David nuna antuk apur jakayipi, tusa wake mesemar nekapeak, ni nugkuarmaurin jaanchin jaakuiti. Tura shuar chikich aina nijai pujuinasha turusag nita nugkuarmaurin jaanchrin jaakaru ainawai. 12 Tumawar Saúl nina uchiri Jonatánjai mantamna asamtai, senchi wake mesemar nekapenak útaina. Nuiyasha Yuus etegkamu israelita suntar aina jinawaru asamtai, nuna enentaimtusarsha útaina. Tumaina asar yurumkan yutsuk kintamraruiti. 13 Tumawar nuna nagkankar, shuar chichaman etsereak tan, David chicharuk: “¿Amesha tuiyampaitam?” tusa tinaiti.
Tusa tama ni chichaak: “Wika chikich nugkanmaya Amalec shuaraitjai”, tusa tinaiti. 14 Tusa takai David senchi kakaar chicharuk: ¿Amesha urukamtai apu atii tusa Tuke Pujuwa nu etegkamusha ashamtsuksha maame? tusa tinaiti. 15 Nuna tusa ni shuar ainanmayan untsuk chicharuk: ¡Ju shuar maata! tusa inaruiti. Turamu asa nuna umiak nu shuaran maawaiti. 16 Nutika maakai David nuna shuaran chicharuk: Apu atii tusa Yuus etegkamu maamuram amek etsertumaku asam mantamnattame. Ameka ame pegkerchau takasmaunam mantamname, tusa tinaiti.
David wake mesemar pujus kantamamu
17 Saúl nina uchiri Jonatánjai jakauwaiti. Tuma asamtai David wake mesemar nekapeak útuk pujus kantamtain jiiknaiti. 18 Nuna tura Judá weantu ina patai aina nu ashi jintintatarma, tusa tinaiti. Nu kantamtaigka Jaser tutainam aarmauwaiti. Nu kantamtaigka nagki tutainti. Nu kantamtain aak: 19 ¡Israel shuar,
kakaram aina jinawar nain ainanam tepetar jainawai!
yaakat Gatnum etserkairpa.
Tura yaakat Ascalónnumsha
nu pachisrumka etserkairpa.
Filisteo nuwa aina nu shir aneasaraig.
Shuar Yuusan eme anentas iichu aina nuna nawantri aina shir anenak jiistamawaraig.
21 Gilboa naintri ainanam ii shuar aina ijinawaru ainawai.
Nu nain ainanmagka yumi pegkesha yutukchatnaiti,
tura sanarkashtinaiti.
Nu nain ainanam ii shuar kakaram ainan ijinawaruiti.
Ina apuri Saúl maanitan yacha ajakua nuna,
Yuus etegkamua nuna imanchau amajkaru ainawai.
22 Saúl tura Jonatánjai nita shuari kakaram ainan tuke majakaruiti.
Maanitnum wearu waketainakka nita nagkirinka
shuar kakaram ainan mainak numpa amaju jakaruiti.
wina shir anetair ainawai.
Nitaka churuwin nagkasau,
leónkan nagkasau senchirtin ainawai.
Iwáku pujusarsha kanakcharu ainawai,
tumasarag mai metek waitas jakarai.
24 ¡Wii shuar ainan nawantri ainata, Saúl mantamnamunam úttarma!
Saúl suramajakuitrume.
Jaanch shir pegkeran ni suramajakuitrume.
Iwarmamkar pujusarti tusa shaukan orojai najanamun suramajakuitrume.
25 ¡Ii shuar aina imau wári aina nusha
urukamtaig ina shuari aina maamsha asara!
Jonatánnasha nain ainanum maawarai.
26 ¡Wina yatsuru, Jonatánka,
amina enentaimtusan wake mesemar pujajai!
¡Shir amajtuyame!
Nuwa aina shir amajkartina nu inagkasam shir amajtuyame.
27 ¡Ii shuar aina imau wári ainayat ijiniam asayi!
¡Nagki ainancha kupirar ikukiaruiti! tusa tu kantamawaiti.