Saúl nina uchiri ainajaimak ijinamu
31
Filisteo aina israelita ainan mura Guilboa tutainam matsatun mainak etsekeararuiti. 2 Turuinak patatukar Saúlan, uchiri Jonatánkan, Abinadabpan tura Malqui-Suáncha ashi uchirinka mantuawaruiti. 3 Tura Saúlnasha shigki atsakamun eketak ijuaruiti. Turam shir senchi ashamkauwaiti. 4 Turam Saúl nina uyunainak nagki ainan takus wekan chicharuk: Kuchiram jukim mantuata filisteo Yuusnauchu aina nu kaunawar mantuinak wishikruraraig, tusa tinaiti. Takaisha ashama asa wika mashtatjame, tusa tinaiti. Takai nina kuchiirinak juki ijumi jakauwaiti. 5 Tumamtai nina uyunak wekasha tumasag nina kuchiirinak ijumi jakauwaiti. 6 Nu tsawanta nui Saúl, nina uchiri tres ajakarua nu tura ni weantu ainajaimak jinawaiti. 7 Nu tumamun chikich israelita aina nain awin matsamin aina, tura Jordán amain matsamin aina, filisteo aina Saúlan uchirijaimak ijinawarai tamaun antukar yaaktarin ikuinak tsekeararuiti. Tumawarmatai filisteo aina, israelita ainan yaaktarin akinkar matsamsaruiti.8 Tumawar kashin tsawarar israelita aina maawarmaj nuna waríri aina yaruakmi, tusar filisteo aina weriar iiyajkama nugka Guilboanam Saúl nina uchiri tres ajaku ainajai jaka tepenan wainkaruiti. 9 Tura muuken tsupirkar, tura nagkiri maanitai ainancha jurukiaruiti. Turawar nita yaaktarin yuusrimtai ainanam shuar aina irumrarum Saúlka jakayi tusarum etseratarma tusa akatak ishiakuiti. 10 Turuinak Saúla nagkiri ainanka yaruak nita yuusrimtai Astarté jeamrukmaunam awayawaruiti. Antsu Saúla iyashin, tura uchiri ainan iyashincha yaakat Bet-san tutai tanishrin yaki nenaawar inaisaruiti. 11 Nu turamun israelita aina Galaad nugkanam yaakat Jabésnum matsamin aina nekaawaruiti. 12 Tuma shuar wári aina nitak etegnaikar káshi weriar Saúlan iyashin tura nina uchiri ainan iyashijaimak jukiar Jabésnum ejéniaruiti. Tura nui ekeemakaruiti. 13 Turawar númi wajamunam ukunch ainanka ikusaruiti. Tura ikusar wake mesemar nekapena asar útainak yurumkan yutsuk siete tsawan pujusaruiti.