Salomón Egiptonmaya apun nawantrin nuatkamu
3
Salomón Egiptonmaya apujai maniachmi tusa chichaman umikuiti, nuna tumak apu nawantrin nuatkauwaiti. Tura juki yaunchuk apu David pujusa inamajakmaunam yaakat Jerusalénnum ejénaiti. Tuma pujus ni pujusa inamratnun yamarman jean jeamkauwaiti, tura iruuntra Yuus ememattai jea atinnasha jeamak umik yaaktancha pegkar tentak umikuiti. 2 Yuus iruuntra ememattai jean eke uminachu asarmatai, israelita ainaka, cananeo aina nain ainanam nita yuusrimtairi ainan yaunchuk eme anentas iiyainak tagku ainan maa epejaku aina nuig, nitasha tagku ainan maa epejaku ainawai.3 Salomónka Yuusan anea asa, nina apari David chichaman umi jakmaunka tumasag umirujakuiti. Turasha tagku ainan tura incienso ainan nain ainanam epejakuiti. 4 Nuiyasha nuigka puju jakchauwaiti, Gabaónnumsha we nain yaki tsakaru amaunam imanai waka tagku ainan mil maa epejakuiti.
5 Tuma pujaun Yuus káshi karanam Salomónkan wantintuk chicharuk: “Ame wari wakeram nu aina seatta, tumakmin ame wakeramu ainanka wii susattajme”, tusa tinaiti.
6 Tusa tama Salomón Yuusan ayak: Wina apar amina inatairam ajakua nu ame turata tusa tamaun metek umiak pegker taká asamtai, pegkernum yaigkuitme. Tura asam nina uchiri apu jas pujus inamrati tusam yamai apu amajtusume. 7 Wina Yuusru, wika amina umirin uchi aig wina apar jakau asamtai, ni apu jas inamrati tusam shir enentaimra takamainchau aig etegtuawaitme. 8 Turasha ame israelita aina etegkauwaitam nuka shir nukap asa nekapmakrisha pegkesha ejémaitsui. Nu iman aina nuna apuri atii tusam etegtuame. 9 Shuar unuimat ame susashmauka, shuar imaju nukap aina nuna apurigka amaitsui. Tuma asamtai pegker aina tura pegkerchau ainasha tukit tusa nekat surusta tusan tajame, tusa tinaiti. 10 Salomón tusa takai Yuus shir anentsauwaiti. 11 Tura Yuus chicharuk: “Nukap uwí pujustajai, wiakach jastajai, tura wina kajertin aina nuka jinati tusam tutsuk, nekata nu pachisam turutu asaakmin, 12 nekatan susattajme. Turakun yaunchuk shuar yacha ajaku aina nuna nagkasau, tura nuiyasha atakka iman achatnun yacha amajsattajme. 13 Wiakach jastasan wakerajai tusam turutchau aminig wiakach amajsattajme, tura eme anentsa iitai amajsattajme. Turamu asam chikich apu aina nu nagkasau ameka atatme. 14 Amina apa David wina chichamrun metek umijakua turusmek, amesha wii wakeramu, tura wina chichamrusha metek umirtakminka, nukap uwí pujusti tusan yaigtatjame”, tusa tinaiti.
15 Salomón shintar karanma tu kanarja tusa nekawaiti. Tuma Jerusalénnum waketki jeaa chicham umikmau Yuusa, arcarin chicham umikmaun egketun wainkauwaiti. Tuma tagku ainan maa epeawaiti, tura tagku ainan maa ajamnaisauwaiti. Nuna tura araka nere jukmau ainan akanak Yuusan suak yutai ainan inamar umik nina atutairi ainajaimak yuawaiti.
Salomónka apu chichaman iwartan yacha ajakuiti
16 Nu tsawantin jimar nuwa akika takatai aina apun jeariaruiti. 17 Tura chikichik nuwa apun chicharuk: “Apu, wika ju nuwa jujai chikichik jeanmag pujuwajai. Tuma nijaig pujusan uchin jurermajai. 18 Tuman tres tsawan pujai nisha uchin jurermayi. Turasha nu jeanmagka chikichka atsumayi, ima jimarchik pujumji. 19 Tura ju nuwa chikichik káshi uchirin teperak maamayi. 20 Tura ajampek ai nantaki, wina uchirun wini tepettamaun juak nina uchiri jakaun juki wii kanaran tepai ayanas aepsauwaiti. 21 Tuma uchin umuntsuattsan káshikmasan nantakin iikman jakaun wainkamjai. Turasha shir tsawarmatai iikman wina uchirchaun wainkamjai”, tusa tinaiti.
22 Takai chikich nuwa chichaak:
“Atsa, wina uchirka iwákui, tura amina uchirmeka jakauwa nuwaiti”, tusa tinaiti.
Takai nuwa yama nagkamchak chichakua nu chichaak:
“Atsa amina uchirmeka jakauwa nuwaiti. Tura wina uchirka iwáka juwaiti tusa apu emtin nitak jianaina”.
23 Tumainakai apu Salomón enentaimas: “Ju nuwaka wina uchirka iwákui, tura amina uchirmeka jakauwa nuwaiti tusampa chichawa. Turasha chikich nuwa ausha numamtukeapi tawa tu enentaimu”. 24 Tumak chichaak:
“¡Kuchii surustarma!” tusa tinaiti.
“Uchi, iwáka nu jimapetuk tsupikam akantsamek susarta”, tusa tinaiti.
26 Takai uchi iwákun nukuri nina uchirin enentaimtus wake mesek apun chicharuk: “¡Apu wait aneasam uchi iwáka juka maawaipa! ¡Ju uchika ju nuwa susata!” tusa tinaiti.
Takai nuwa chikich chichaak: “Nu uchika winauksha tura ninuksha achati jimapetuk tsupiktarma tusam titá”, tusa tinaiti.
27 Takai apu chichaak: “Uchi iwáka juka maawaipa tusa nuwa ta nu nina nekas uchiri asamtai susatarma”, tusa tinaiti.
28 Apu Salomón chichaman pegker epegkamun Israel shuar aina antukaruiti. Tumawar chichaman pegker epegkin atii tusampa Yuus yachamatan susauwaita tusar apu Salomónkan eme anentas iiyaina.