4 Nuiyasha amina uchiram ainan pujuti pegker asar chichaman metek uminak, wina ima senchi anentainak, ima winig enentaimsar pujuinak, winau pegker aina nunak nekawar, wii wakeramua nunak takainakaigka,^* amina pataim aina nuiya apu tuke artinaiti, tusa Yuus wina turutna nuna metek umikti. 5 Suntara apuri Abner, Ner ajakua nuna uchirin, tura Amasá, Jéter ajakua nuna uchirijai, Seruía uchiri Joab maawa nu kajinmatkipa. Nunaka maaniamunam ni shuar ainan maawaru asarmatai, ikmaktajai tusa maaniamuka atsaig turawaiti. Tuma asamtai ni magkartuamuri pachisam tumainmeka ametme. 6 Nuka ame yacha asam, uruk turumainaitam turusmek agkan shir pujus jakati tusamka tipa. 7 Antsu Gaadnumia shuar, Barzilaí uchiri ainaka, amina yatsum Absalón, wina mantuattsa pataturkai tsekegki wekai nita kuitamrukaru ainawai. Turutawaru asarmatai nitaka wait anentrarta, turakum ame ekemsa yutairmin ekentsam ayurawarta. 8 Tura chikichnasha tajame, Benjamín weantu Guerá uchiri, Simí yaakat Bahurimnumia puja nu, shir pegkerchau chichartukuiti. Nuna turutawaitiat Manahaim pujaun waketkin winai wina igkunkattsa entsa Jordánnum taawaiti. Tumamtai Yuusa naarin pachisan maachtatjame tusan wii tinaitjai.

9 Turasha nuka waitat sutsukka inaisaipa. Ameka yachaitme iman asam iturkattam nuka ame nekata. Turasha nuka waitas jakati tusam titá, tusa David tinaiti.

10 David jakauwaiti, tumamtai yaakat Jerusalénnum nina uuntri aina ikumajakmaunumag ikusaru ainawai. 11 David Israelnum cuarenta uwí inamrauwaiti: Yaakat Hebrónnum siete uwí inamrauwaiti. Yaakat Jerusalénnum treinta y tres uwí inamrauwaiti. 12 David jakamtai Salomón apu jas israelita ainan shir inajakuiti. 13-46 (-)