Taɗər Urshalima
21
Kəl ngə ya la'a taɗər huɗamələm ana taɗər dunəya, aka tangərmar huɗamələm nda ana tangərmar dunəya nda tərabiyati, ya fa'a dəgal tsəu tərati. 2 Ya ngə ya la'a mələm karti nda, taɗər Urshalima, kwa səya kya huɗamələm hya'atə tsa Hyel, ɓatləɓatlənyi mənakə wi ngə tə gambəl kwa ɓatlə ka sal nyi. 3 Ngə ya ngatə kurakə dzəgam dzəgam hya'atə ku dzəga təlkur nda, kwa na, “Sakan ja mbwar ngya Hyel ɗatə ku pama nji, ya cho ngya kə'i nda nda kwa ɗa ka nənyi na nji, ya Hyel na kərnyi kwa ngya tsa'a kə'i nda cho ɗa ka Hyel kənda. 4 Cho təɗəbiya dəhə sələm ku lya nda. A tsə'u tə ndara huɗətla ndara tiwi ndara ɓwaɓwatə da wa, aka sə halhal i'i tərabiyati.”5 Nacha nda tə ngya ku dzəga təlkur nda tə na, “Janə yo mərtə sə dəhə taɗəu!” Ngə cha na, “Tsəfəya sə na, aka ɓwanya na sər dləukər cha ya jiri.”
6 Ngə cha nar ɗa, “A wurti! Naya ngə Alfa ana Omega ghəyanyi ana udiya nyi. Ndə nda kwa ngatə hili yo nənyi ɓiti nda kwa biya ku tsədzəɗə ɓitir pi ga'a. 7 Dəhə ndə nda tə kura cho fa'aki na sə'inə dəhəu, ya yo ɗaka Hyel nyi, nacha tsəu cho ɗa ka zər ɗa. 8 Kəl ja, njir ləvəra ana nji kəla jirikur ana njir za səu, ana njir tsa ndəu ana njir mər kasalikur ana njir tsakəza ana njir həsəli nə katəu, ana dəhə njir tla gəzhi, mbwar ngya kənda nacha ngə hu'u ibir lyang nda pa'a kwa tah. Nacha ngə mətləkunya tah.”
9 Zhang ku huɗa chama məɗəfə inda na kətasə məɗəfə nyinyi na batəbatər təmachi məɗəfə inda tə shili da ya ga nar ɗa, “Anda yo char nghə gambəl, mala Zər Gam.” 10 Ngə cha təra naya ku shanguɗə gyatə mə dəgal ya dzəgaməu, ngə cha char ɗa Mələm Karti nda, nacha ngə Urshalima, kwa səya kya huɗamələm hya'atə tsa Hyel. 11 Mələm nda kwa mbəl na gyalkur Hyel, ya pərtəkura cha wi kata nda na səli, wi jaspa, ɗyaɗyang wi dəmal. 12 Bangu mələm nda səsəməu, ya dzəgaməu, ana nyaki kwabəmətləu, ana chama kwabəmətləu, kala nyaki na chama kwa ɓəla. Ngə ja tsəfətə tləmər nyavi kwabəmətlə nə Isra'ila anya nyaki inda. 13 Nyaki makərə təwa zədər pəchi, makərə təwa təɗər pəchi, makərə təwa holma ana makərə təwa vwa. 14 Nja səya hya bangu mələm nda tə hangu kwabəmətləu, ya a tə ngə nja tsəfətə tləmər changhabal kwabəmətlə nə Zər Gam nda.
15 Zəwa dəkə səu nə bəjingha da tsa chama nda tə ndər naya nda, ka cha dəkətə mələm nda, nyaki ana bangu bangunyi. 16 Mələm nda, dlaɓəkura cha ana Dzəgaməkura cha məlmələu, nda cha dəkətə mələm nda na zəwa dəkə sə nda, ngə cha uya kwa ɗa mel 1,500a dzəgaməkur nyi ana dlaɓəkur nyi ana ta'ikuracha sə zhang. 17 Ngə cha dəkətə səsəmkura bangu mələm nda ngə cha uya hi 216 wi nda ndə kwa dəkə səu, əngə chama nda dəkətə tsəu.
18 Nja hər bangu nda ana jaspa, mələm nda tsəu ana bəjingha tsa'amunyi nja həra, ɗyaɗyang wi dəmal. 19 Hyavi mələm nda nja ɓatlətə nyi mənakə na chulkə hangu nda na səli. Tangərmanya hangu jaspa, mətləkunya hangu safira, makərkunya hangu agat, fwaɗəkunya hangu emaral. 20 Tufkunya hangu onis, kwakunya hangu karneliya, məɗəfəkunya hangu kərissolata, chisəkunya hangu berila, dləkunya hangu tofasa, kumkunya hangu kərisofa, kwabəzhangkunya hangu jasin, ba'a kwabəmətləkunya hangu ametis. 21 Dəhə nyaki kwabəmətlə inda ana sə mbəlmbəl kwabəmətlə nja ɓatla, kala nyaki ana sə mbəlmbəla, laku dəgal nə gwa ku mələm nda ana bəjingha tsa'amunyi nja ɓatla, ɗyaɗyang wi dəmal.
22 A da ya la'a mbwa'alə Hyel ku mələm nda wa, aka Hyel Tlakəu Ndər Gyalkur ana Zər Gam ngə mbwa'alə mələm nda. 23 Aka mbəl nda səlir Hyel kwa mbəla, mələm nda do gwa'a pəchi ndara hya ka ga cha mbəl wa, ya Zər Gam nda nacha ngə təkəsə mələm nda. 24 Njir dunəya kwa ma'i ku vimbəlmbəl nyi, təl dunəya i'i tsəu kwa gwa na səli kənda ku mələm nda. 25 Vu'i na pəchi a da njo haɗə nyaki mələm nda wa, aka a vu'i da ku nda wa. 26 Njir dunəya kwa shili na gyalkur ana səli ku mələm nda. 27 A vanya sə hiɗahiɗa da kwa gwa ku mələm nda pa'a wa, ndara ndə nda tə mər sər kuzhi ndara sər shakər, kəl nda nji'inda tləmən nda tsəfətsəfə nyi ku likatəkatə nə pi nə Zər Gam.