Fa Dəbu
20
Kəl ngə ya la'a chama kwa səya kya huɗamələm, ana sər mbəɗə nya ka'u nda a ɓəlinyi da wa nda ku cha cha ga gəzəya dzəra lyang. 2 Ngə cha səya pwabu məlləm nda, pwabu ɗəɗəm nda, nda njo nani sərtakə ana Shantan, ga mbiya nyi nə fa dəbu. 3 Ngə chama nda vakəu nyi go ka'u nda a ɓəlinyi da wa nda, ga haɗənda ga nyu'unda, atsa cha da tsakətə shakər nə nji səkəu, kəl ma fa dəbu nda wura. Ahir nga, tuku njo ɓəla dəliya nyi nə bəji kushiu.4 Ya la'a dzəga təlkur i'i ana nji'inda nja nənda gyalkur mər nəuma nə nji tsətsatlə tə ngya kwa. Ana ya la'a pya nji'inda nja tlanda kəra nda aka nda bəzə Mafakə Mənakə təkəra Yesu, ana aka ɓwanya Hyel. A da nda həsəli nə sərshishi nda ndara sənda nja hərtə pabiya nyi wa, ya a da nda dləutsə lamba nda ku nyama nda ndara tə cha nda wa. Nda ɓəla ɗa na pi ga mər təlkur ka Kəristi nə fa dəbu. 5 (Alenya nji kuɗəkuɗə da ɓəla ɗa na pi wa, kəl ma fa dəbu nda tə wura.) Nacha ngə tangərmar hya'atər nji kuɗəkuɗa. 6 Njir papa'akur nga, ya nji karti, nji'inda kwa ɗa ku huɗa nji'inda ku tangərmar hya'atər nji kuɗəkuɗa. Mətləkunya tə da na gyalkur təkəra nda wa, kəl ja, nda kwa ɗa fərist nə Hyel ana nə Kəristi, nda kwa səm təlkur tsa'a kə'i cha nə fa dəbu zhang.
Nja Kura Shantan
7 Ma fa dəbu nda tə wura, njo dəlanda Shantan ku jarum, 8 aka ga cha shakər nə nji ku ngum fwaɗə nə dunəya, nacha ngə Gog ana Magog, cho tsəmtə nda ka pa. Ɗangkura nda wi ngə tə məshishi'ua nya dəl. 9 Nda wiɗətədzə tə dunəya ga ɓandə nji karti nə Hyel, ana mələm nda cho nyida. Kəl ja, hu'u tə səya kya huɗamələm ga ngəɗənda nda. 10 Kəl ngə nja vakəu sərtakə, nda shandə nda kər go hu'u ibir lyang, mbwa nda nja vakəu sərshishi nda ana njir mətakər gəzhi. Njo nənda ɓwaɓwatə vu'i na pəchi ba'anawa.
Batəbatər Nəuma
11 Əngə ya la'a dzəga təlkur pərtə dəgaləu, ana ndə nda tə ngya kwa. Ngə hə'i ana huɗamələm tə sa, a ndə da ɓəla la'a wa. 12 Ya ngə ya la'a nji kuɗəkuɗa wawa'anyi ka shiɗəɗənyi, ta'ita'i mar dzəga təlkur nda, ngə nja mbəɗiya likatəkatə i'i. Kəl ngə nja mbəɗiya vanya likatəkata, nacha ngə likatəkatə nə pi. Nja mərtə nyi nəuma nə nji kuɗəkuɗə ana sənda nja tsəfətə ku likatəkatə nda, məlməl na sənda nda məra. 13 Fa'a dəgal tə wuniya nji kuɗəkuɗə nda ku cha, tah ana mbwar ngya njikə mambəl tə wuniya nji kuɗəkuɗə inda ku nda, ngə nja mərtə nyi nəuma nə kala ndə məlməl na sənda cha məra. 14 Kəl ngə nja vakəu tah ana mbwar ngya njikə mambəl gwatə ghadar hu'u ibir lyang nda pa'a kwa tah, nacha ngə mətləkunya tah. 15 Ya kala ndə nda pa'a nja uya tləm nyi tsəfətsəfə nyi ku likatəkatə pi nda, nja vakəu nyi gwatə ghadar hu'u ibir lyang nda.