Miya Hirgyaɗi kya Huɗamələm
19
Ahir nga, ngə ya ngatə kurakə wi nə daɓədzər nji ɗang kya huɗamələm kwa na,“Haleluya!
Dləuya ana səli ana gyalkur nə Hyel kəmən nga,
2 aka nəuma nyi jiri ya tsa'atsa'a.
A tlanda nyi tə cha nəuma nə zawar dəgal
nda səwandə dunəya ana kasalikur nyi.
A kinda tə cha səkur mələr mashi mavi'i nyi.”
3 Ətsəu, nda ɓəla na ana kurakə dzəgam dzəgaməu,
“Haleluya!
Ear nda kwa biya ku Babila
kwa ɗəzə shi ba'anawa.”
4 Njirawawa'a mətləkumnyi parnya fwaɗə inda ana sə pipi fwaɗə inda tə piya huɗə Hyel ga hətə nyi səli, nacha nda tə ngya ku dzəga təlkur. Nda kwa na,
Aɗəmja, Haleluya!
5 Ngə kurakə tə biya ku dzəga təlkur nda, kwa na,
Fala ma Hyel kəmən,
nahi mavi'i nyi dəhəu,
nahi nda kwa ləvər nyi,
ngulisha'a ka njirawawa'a!
6 Kəl ngə ya ngatə kurakə wi nə daɓədzər nji ɗanghəu, wi kuraka dəl səyasəya ana dəradlər par 'ual'ualəu, kwa na,
Haleluya!
Aka Hyel Tlakən mən
Ndər Gyalkur kwa səm təlkur.
7 A mən mər hirgyaɗi gagaɗa
məna hətə nyi səli!
Aka bəjir gha mala Zər Gam shili ti,
ya gambəl nyi ɓatliya tə kərnyi.
8 Nja nənyi dzaki mənakə nda pərtə
ka cha pəndzi.
Dzaki mənakə nga nacha ngə tlər tsa'atsa'akur nə nji karti.
9 Kəl ngə chama nda tə nar ɗa, “tsəfəti. ‘Njir papa'akur ngə nji'inda nja nga ka səm ladər gha mala Zər Gam!’ ” Ngə cha tsakətə na, “Nənnə ngə ɓwanya jiri nə Hyel.”
10 Kəl nga ya piya huɗə nyi ka ya hətə nyi səli. Kəl ja, cha nar ɗa, “A'a, ngwa ka həsəli na'a wa! Naya mava Hyel ya, wi ngə kə nga, ana ka zamə nghə ka kwamə nghə nda kwa pə ɓwanya təkəra jirikur kənda ku Yesu. Ka həsəli kəl nə Hyel! Aka sənda takər təkəri nga, nacha ngə ka ga nja pəbiya ɓwanya bwa'abwa'a təkəra Yesu.”
Ndər Dlə Taku Pərtəu
11 Ngə ya la'a huɗamələm tə mbəɗa, ya kəl janə taku pərtəu, ndər dlənyi njo nga nyi Jirikur ana Jiri. Cho mər nəuma ana jiri ana dla'a. 12 Lya cha wi kyara hu'u, ana pahuɗə kər ɗang ku kəra cha. Tləm da tsəfətsəfə nyi dzə nyi nda a ndə do zəndə wa kəl nacha sənyi. 13 Cha handzə ləkutə dzəgam nda nja chiu ku mashi, ya tləm nyi ɓwanya Hyel. 14 Ləvaləva huɗamələm kwa nəu nyi, kwa dlə taku pərtəu ga pəndzə dzaki pərtə mənakəu, chichinyi. 15 Katsakər tsəltsəl kwa biya ku nyacha, nda cho tsa'unda njir dunəya ni. “Cho səm təlkur na zəwa lyang.” Cho ɓəchibiya ɗimɗimir huɗətlar Hyel Ndər Gyalkur, wi ngətə ɓitir anap kwa biya ku mbwar ɓəchi nyi. 16 Tləm nənnə tsəfətsəfə nyi tə ləkutə nyi gang na eacha, “Təl təkəra təl i'i, ana Tlakə təkəra tlakə i'i.”
17 Kəl ngə ya la'a chama Hyel ta'i tə pəchi, nda tə nga dəhəu eakə inda kwa fəl biya huɗamələm na kurakə dzəgam dzəgaməu, “Anda ma, tsəmtə ma dzə dəhə tə mbwar zhang, aka ladər dəgal nə Hyel. 18 Aka ga hya səm kumur dza təl i'i, ka midala, njir dunama, taku ana njir dlə taku, ana dəhə kumur dza nji, dimur nji ana mavi'i, zər ana ndəradəgaləu.”
19 Kəl ngə ya la'a sərshishi nda ana ka təl ka təl nə dunəya, ana ləvaləva kənda i'i tə tsəmtədzə dəhə tə mbwar zhang, ka nda pa ndər dlə taku nda ana ləvaləva nyi. 20 Kəl ja, ngə nja səya sərshishi nda, ana njir mətakər gəzhi inda tə mər səshinshin tə nyanyi. Ana chulkə ngə na səshinshin cha shandənyi kər nji'inda tə dləutsə lamba sərshishi nda, ga hətə nyi səli nə sənda nja hərtə pabiya nyi. Tsa'a kya'a nda nja pəu nda gu hu'u ibir lyang nda pa'a kwa tah. 21 Kiɗəkər ləvaləva inda həyadzə nja kuɗənda na katsakər nda tə biya ku nya ndə nda kwa dlə taku nda, ya ngə dəhə kwadəga tə ndzuməkər dzə təkəra kumur dza nda.