Dlar Babila
18
Ahir nga, ya la'a vanyi chama kwa səya kya huɗamələm, ana gyalkur dəgaləu, nda səli nyi kwa mbəl səya təkəra dunəya. 2 Cha nga na kurakə bang ana dunama ga na,“A dlati, Babila mələm dəgal dlati!
A ɗa tə cha ka mbwar ngya kwadzaɓi i'i
ana mbwar ngya kala shanguɗə ɗimi,
mbwar ngya kala chulkə eakə dəgur nda njo həɗə tsari.
3 Aka dəhə mələm wi tə na
mwaɓər kasalikur nacha.
Təl nə dunəya i'i tə mər kasalikur nacha,
ana njir shafəli tə mər gəna gagaɗə
təwa mwaɓər kasalikur nyi.”
4 Kəl ngə ya ngatə vanyi kurakə tə səya
kya huɗamələm kwa na.
Na'awa nji, biyama ku Babila,
tsa hya da gwa ku bikə nyi,
tsa təmachi nyi da uya hi.
5 Aka səpəla'a nyi ɓutə tə dzə duməu
tsa'a kya huɗamələm,
ya Hyel ɗənghatə tə səɗimi nda cha məra.
6 Dəkəunyi ma ku kətasə nyi wi nda cha mər nə hi,
kinda nyi ma zhaka mətləu
təkəra sənda cha mərtə hi.
Gwaɗətə nyi ma zhaka mətləu
sənda kwa kina ɗa nacha aku ɗeɗika nyi.
7 Nənya ma ɓwaɓwatə gagaɗa ana huɗətla
tang wi nda da cha nənyi waha ana səli nə kərnyi.
Aku ɗufwa cha cha kwa wovi cha kwa na,
Ya kwa ngya wi kwatam, a da ya malafi wa,
ya sə do gwa'atə yo mər sə'ingu wa.
8 Aka ənga təmachi nyi
kwa ghahəya nyi pəchi zhang.
Tah, sə'ingu ba'a huɓwa.
Hu'u kwa nginda nyi,
aka Hyel Tlakə nda kwa
mərtə nyi nəuma ana gyalkur cha.
9 “Ma ka təl ka təl nə dunəya inda tə mər kasalikur, ana səm məsəɗakəkur ka cha tə la'a ear hu'u nda kwa nginyi, nda kwa tiwi ana sə'ingu aka cha. 10 Nda kwa ta'ita nda naɗəu aka nda kwa ləvər ɓwaɓwatə nyi, nda kwa tiwi nda kwa na,
Kirpəu! Kirpəu mələm dəgaləu,
Babila mələm nda na gyalkur!
Aku saka zhang tə nghə shili ti!
11 “Njir shafəli nə dunəya nda kwa tiwi ana sə'ingu təkəra cha aka a ndə da kwa ɗəl sər shafəli kənda səkə wa. 12 Ka bəjingha, azurfa, ana hangu nda na səli. Ana kata nda na səli, ana pa'ua nda njo ɗəl na kwaba ualəu, ana pa'ua lipəlalipəla, ana kuləkəu. Ana dəhə wu nda kwa shi'uni kwitəkwitəu, ana hira chiwar, ana wu fiɗəfiɗə nda njo ɗəl na kwaba ualəu, ana ndzəa, ana lyang, ana hangu nda kwa mbəla. 13 Ana kar kənda nə sənamon, ana kar yaji, ana tulari nə hu'u, ana mur, ana tulari nə luba, ana ɓitir anap, ana mal zaitun, upwa ana alkama, tla, ana kətəng i'i, taku i'i, ana charkaina taku i'i, ana mavi'i, ana pya nji.a
14 “Nda kwa na, ‘Sə mənakə inda ka fətə ɗufwa kə tə inda tərati, dəhə gəna nghə ana gaɗagaɗakur nghə wurti, ya tsəu ko ɓəla uya wa.’ 15 Njir shafəli inda kwa ɗəlnda sə'inə kwa uya gəna kənda tsa cha kwa ta'ita nda naɗə na ləvəra tsa ɓwaɓwatə nyi. Nda kwa tiwi ana sə'ingu 16 nda kwa ləlla nda kwa na,
Kirpəu! Kirpəu, mələm dəgal nga,
nda Parakə tə pəndzə dzaki mənakəu,
lipəlalipəla ana dəzə nyi,
ana inda kwa mbəl wi bəjingha,
ana hangu nda na səli ba'a kata!
17 Aku saka zhang chulkə ngə na gəna səwati!
“Kala gau nə ngiɗə param, dəhə njir ngiɗə param, nji'inda kwa ma'i ku param, ana dəhə nji'inda kwa uya sər ngyar dunəya kənda tə ɓiti, nda kwa ta'i naɗəu. 18 Nda la'a nda ear hu'u nda kwa ngi nyi, nda kwa tiwi, nda kwa na, ‘vanya mələm da wi mələm dəgal na?’ 19 Nda kwa tsəkə hə'i ku kəra nda ga nda char huɗətla kənda, nda kwa tiwi məsazau ana sə'ingu nda kwa na,
Kirpəu! Kirpəu, nakə mələm dəgal,
tangnda nji'inda na param tə
ɗana gəna təwa gəna nyi!
Aku saka zhang a kikilti.
20 Mər hirgyaɗi təkəra cha huɗamələməu!
Mər ma hirgyaɗi, nahi nji karti,
ana ka changhabal, ba'a njir mətakər!
Hyel kinda hi tə səkur sənda cha mərtə hi.”
21 Kəl ngə chama nda na dunama tə hətə hangu nda dəgalkur nyi wi nə bəra ga vakətə gwatə fa'a dəgal, ngə cha na,
“Ana chulkə ngə na dunama
Njo vakənda Babila nda mələm dəgaləu,
a da njo ɓəla uya nyi səkə wa.
22 Sə tsatsa nə njir na miya na zəmbəl,
ana njir mbəɗə mbalau ana njir mbəɗə papam,
a da njo tsə'u ngatə kuraka nda wa.
A da njo ɓəla ngatə njir ɓatlə səu
mada chulkə sər mi wa,
a da njo ɓəla ngatə kuraka bəra wa.
23 A tsə'u njo ɓəla la'a təkəsə kwa mbəl ku kə wa.
A tsə'u njo ngatə kuraka gambəl
ndara sal gambəl ku kə wa.
Njir shafəli nghə na nda ngə
shimbal dunəya sakanda.
Təwa tsakəzə ngha,
nja shandənyi kər nə dəhə njir dunəya.
24 Mashi njir mətakər ana nji karti,
ana nə dəhə nji'inda nja kuɗənda tə dunəya,
a da wulya ka.”