3 Kəl ngə chama nda tə təra naya ku shanguɗə gwa takəu. Kwatə takə nda ya la'a vanya mala tsatlə tə dagərya sərshishi dəzəu, ana kəra cha məɗəfə ba'a tələm məɗəfa, nda na tləm həyatəvi tsəka'a dza cha. 4 Mala nda tə pəndzə dzaki nda lipəlalipəla ana dəzə nyi, cha ɓatlətə ɓatlə na sə mbəlmbəl nda nja ɓatlə na bəjingha, ba'a hangu nda kwa mbəl gagaɗa, ana kata inda kwa mbəla. Cha gəzəya ɗeɗika nə bəjingha ku cha cha, chaɓə na sər həɗə ana hiɗa kasalikur nyi inda. 5 Janə sənda tsəfətsəfə nyi ku nyama cha. “Babila dəgaləu, amanya ka zawar ana dəhə sər həɗə nə dunəya.”

6 Ya la'a ənda mala nda wi na mashi nji karti ana nə njir bəzə Mafakə Mənakə təkəra Yesu.

Nda ya la'a nyi, ya mər məngəl gagaɗa. 7 Kəl ngə chama nda tə nar ɗa, “Mya gwa'atə ko mər məngəla? Yo dəkəbiya nghə sə ɗəwaɗəwa nda təkəra mala nga, ana təkəra sərshishi ngə cho dlə na kəra cha məɗəfa, ba'a tələm kumə nga. 8 Sərshishi ngə ka la'a nga, a da ɗakaɗa, kəl ja, sakana a da cha wa, cho zəbiya ku ka'u nda ɓələnyi da wa cho təra kyo tah. Nji nda na ngya tə dunəya tsəu nda fwatə ku ghəyar dunəya a da nja tsəfəu tləmən nda ku likatəkatə nə pi wa, nda kwa mər məngəl ma nda la'a sərshishi nda, aka ɗakaɗa a da cha, sakana a da cha wa, kəl ja, cho ɓəla shili.

9 “Sə na kwa gwa'a ngabiya ana dəma. Kər məɗəfə inga nanda ngə dəgəldəgəl məɗəfə inda mala nda tə ngya ti. 10 Ya na nda ingə təl məɗəfə inda tsəu. Təl tufu dlati, zhang kwa səm təlkur sakana, ana vanyi tsəu kəla shili, kəl ja, macha da shili təlkur nyi kwa ɗa nə bəji kushiu. 11 Sərshishi nda ɗaka ɗa nda, ya sakanə a da cha wa, nacha ngə chisəkunya təl inda. Ku pama məɗəfə inda biya cha ya cho təra kyo tah.”

12 “Tələm kumə ingə ka la'a nga təl kumə inga, inda a da ta ghəya səm təlkur wa, kəl ja, nda kwa da səm təlkur nə saka zhang kə'i sərshishi nda. 13 Jigadəma kənda zhang, ya nda kwa nənyi gyalkur kənda ana təlkur kənda nə sərshishi nda. 14 Nda kwa pa Zər Gam, kəl ja, Zər Gam ka nji'inda cha nga, ana nji'inda cha ɗəmətsi, ana nji'inda kwa nəu nyi na jiri, kwa kura nda aka nacha ngə Tlakə təkəra tlakə i'i ana Təl təkəra təl i'i.”

15 Kəl ngə chama nda tə nar ɗa, “Ɓiti inda ka la'a nda, tangnda zawar nda tə ngya tə nda, nji ingə pampaməu, ana daɓədzər nji ɗanghəu, ana kala hə'i ba'a nya pampaməu. 16 Sərshishi nda ana tələm kumə inda ka la'a nda, ndo ngyar zawar nda. Nda kwa səɗənda nyi dura'a, nda kwa ɗə kum nyi ana nda kwa nginda nyi na hu'u. 17 Aka Hyel wurtə chiu ku ɗufwa nda nda nyabiya jigadəma nyi, təwa dləukər nda nənyi gyalkur kənda nə sərshishi nda cha səm təlkur, kəl ma ɓwanya Hyel tə nyabiyadza. 18 Mala nda ka la'a nda nacha ngə mələm dəgal nda kwa səm təlkur təkəra ka təl ka təl nə dunəya.”