Kətasə Məɗəfə nə Huɗətlar Hyel
16
Əngə ya ngatə kurakə bang tə biya ku mbwa'alə nda kwa na nə chama məɗəfə inda, “Ma'i ma hya shakənyi kətasə məɗəfə nə huɗətlar Hyel ngə təkəra dunəya.” 2 Chama tangərma nda tə təra ga shabiya sənda ku kətasə təkəra dunəya, ngə mbələkəɗimi nda kwa tə gagaɗa tə biya dza nji'inda na lamba sərshishi nda, ana nji'inda tə hətə nyi səli nə sənda nja hərtə pabiya nyi nda.3 Ətsəu, ngə mətləkunya chama nda tə shabiya sənda ku kətasə nyi təkəra fa'a dəgaləu, ngə fa'a nda tə sha wi mashi ndə tətah, ngə sə pipi nda ku fa'a nda tə kuɗa.
4 Ngə makərkunya chama nda tə shabiya sənda ku kətasə nyi təkəra ɓiti i'i ana tsədzəɗəu, nga sha ka mashi. 5 Əngə ya ngatə chama nda dəgal təkəra dəhə ɓiti kwa na,
“Ndə Karti, ndə tsa'atsa'a,
tsa'atsa'a tanyi ngə nəuma ngə ka tlanda nga
nakə nda ɗəɗəm ana sakana.
6 Aka nda pənda mashi nji karti ngha
ana njir mətakər ngha,
ya ngə ka nənda mashi nda sa
aka nacha ngə wazəba nda tsa'atsa'a na nda.”
7 Əngə ya ngatə kurakə tə biya ku dzəgana kwa na,
“Əngə tanyi cha, Hyel Tlakə ndər gyalkur,
nəuma nghə jiri ya tsa'atsa'a.”
8 Fwaɗəkunya chama nda tə shanda sə nda ku kətasə nyi təkəra pəchi, ngə cha nənyi gyalkur nə pəchi nda ka cha nginda nji na kwakwaɗəkur nyi. 9 Ngə kwakwaɗəkura pəchi tə dədatə kala ndəu, ngə nda pə ɓwanya həyatəvi nə tləmər Hyel, ndə nda kwa gəla təmachi ina, ya ngə nda ngyar tubi ga ngyar hətə nyi səli.
10 Tufkunya chama nda tə shakənyi sənda ku kətasə nyi nda təkəra dzəga təlkur sərshishi nda, ngə təlkur nyi tə gwa ku kutla. Nji tsəu kwa ɗə kyara nda ku ɓwaɓwatəu. 11 Aka ɓwaɓwatə kənda ba'a mbələkəɗimi inda, nda pə ɓwanya həyatəvi nə Hyel nda kya huɗamələm, ga ngyar tubi tsa səpəla'a kənda inda nda məra.
12 Ngə kwakunya chama nda tə shanda sənda ku kətasə nyi nda gwatə fa'a dəgal nə Yufəretis, ngə ɓiti nda kwa tə shi'ua, ka ga cha ɓatliya nyi laku nə ka təl inda tə hya'atə təwa zədər pəchi. 13 Kəl ngə ya la'a məlləm makəra wi gwamba, tə biya ku nya pwabu məlləm nda, ana ku nya sərshishi nda ana ku nya njir mətakər gəzhi. 14 Məlləm inga shanguɗə kwadzaɓi inga, nda kwa mər səshinshin, nda kwa kya da təltəl nə dəhə dunəya, ka cha tsəmtə nda ka nda pa Tlakə tə pəchi dəgal nə Hyel Ndər Gyalkur.
15 “Ndzama, janə yo shili wi ngə tə ndər həl! Ndər papa'akur ngə ndə nda kwa ngya na ɓəla ga ɓatliya dzaki nyi, tsa cha da biya ma'i dura'a na kuzhi.”
16 Ngə nda tsəmiya dəhə təl i'i tə mbwa nda njo nga Armagidonb ana nya njir Ibrani.
17 Məɗəfəkunya chama nda tə uchitə sənda ku kətasə nyi nda sha huɗamələm, kəl ngə nja ngatə vanyi kurakə bang tə biya ku dzəga təlkur ku mbwa'alə nda kwa na, “A wurti!” 18 Kəl jan nghənghəɗir par, ana dla'ar par, ba'a dəradlər par, ana dzədzər hə'i 'ual'ualəu. A chulkə ndana dzədzər hə'i da taa ɗa tə dunəya wa, dzədzər hə'i cha gagaɗa. 19 Mələm dəgal tə təkə makərəu, ngə dəhə mələm wawa'a nə dunəya tə dla. Hyel da tə far na səɗimi nda Babila nda dəgal tə mər wa, ngə cha gwa'atə nda sa ɗimɗimir huɗətla nyi. 20 Kala hə'i nda dəl tə ɓandə ana mə i'i a sati. 21 Mindindili wawa'a nda tədəɓəkur nyi kwa ɗa kilogram tufkumnyi, tə pəpə səya kya huɗamələm səya təkəra nji. Təmachi mindindili ngə tə gwa'atə nji tə ngəl Hyel, aka chul təmachi nda ɗimiɗimi gagaɗa.