Dəl Ɓitir Pi
22
Kəl ngə chama nda char ɗa dəl ɓitir pi, ɗyaɗyang wi dəmal, kwa hwi hya'atə ku dzəga təlkur Hyel ana nə Zər Gam 2 səya ku ghadar laku dəgal nə mələm nda. Anya kala nya dəl nda, wur pi da i'i kwa ya kala hya. Heli wu inda tsəu njo mər tlər ni ka kuzəkə mbandə dəhə nji. 3 A tsə'u shi'u da wa. Dzəga təlkur Hyel ana nə Zər Gam kwa ɗa ku mələm nda, ya mavi'i nyi kwa həsəli nənyi. 4 Nda kwa la'a huɗəma cha ana njo tsəfətə tləm nyi aku nyama nda. 5 A tsə'u vu'i da wa. Ya a da nda kwa gwa'a vimbəlmbəl nə təkəsə ndara nə pəchi wa, aka Hyel Tlakəu kwa nənda vimbəlmbəla. Ya nda kwa səm təlkur ba'anawa. 6 Kəl ngə chama nda tə nar ɗa, “Ɓwanya na, sər dləukər cha ya jiri. Hyel Tlakə nda tə sətə nyi shanguɗə nə njir mətakər nyi, tə sə chama nyi cha dəkarnyi sənda kwa ɗa kacha'ana a nə mavi'i nyi.”Yesu kwa Shili
7 “Ndzam ma, janə yo shili kacha'ana! Ndər papa'akur ngə ndə nda tə nəubiya ɓwanya mətakər nda ku likatəkatə na.”
8 Naya Yohana, naya ngə tə la'a ga ngatə sə'ina, ya nda ya ngatə ga la'a sə'ina, ya piya mar chama nda kwa cha sə'inə na'a ka yo həsəli nənyi. 9 Kəl ja, cha nar ɗa, “Ngwa ka da mər sə ngə wa! Naya ma'a mava ya wi naka ana ka zamə nghə njir mətakər ana dəhə ndə nda tə gəzəya ɓwanya likatəkatə na. Kəl nə Hyel ko həsəli!”
10 Kəl ngə cha nar ɗa, “Ngwa ka da ɗəwanda ɓwanya mətakər nə likatəkatə nə wa, aka bəji ɗatə ləhəu. 11 Ndə nda kwa mər səɗimi, cha biyama na məra, ndə nda kwa mər sər kuzhi, cha biyama na məra, ndə nda kwa mər sənda tsa'atsa'a cha biyama na məra, ndə nda kwa ngya karti tsəu, cha biyama na ngya karti.”
12 Yesu tə na, “Ndzam ma, janə ya kwa shili kacha'ana! Wazəba ɗa tsa'a naya, ya yo nənyi nə kala ndə məlməl na sənda cha məra. 13 Naya ngə Alfa ana Omega, tangərma ana batəbatənyi, ghəyanyi ana udiya nyi.
14 “Njir papa'akur ngə nji'inda tə chinda ləkutə kənda, nda kwa uya gyalkur gwa ku mələm nda təwa nyaki, ya nda kwa gwa səm yayar wur pi nda. 15 Nji nda nja katə nda gwa ku mələm nda, nanda ingə, njir mər zazaɓəkur, bushin, shi'ushi'ukur, njir tsa ndəu, njir nəu katəu, ana dəhə nji'inda kwa nyida gəzhi ya kwa tla gəzhi.
16 “Naya, Yesu, ngə tə sə chama ɗa ga cha nar nghə ɓwanya na aka njir nəuwa. Naya ngə nyandəla Dauda, ana dəsha wurəvi nda kwa mbəla.”
17 Shanguɗə ana gambəl kwa na, “Anda!” Ana dəhə ndə nda tə ngatə tsəu cha na “Anda!” Ana dəhə ndə nda kwa ngatə hili, cha shili, ana ndə nda kwa i, cha dləutsə ɓitir pi ga'a.
18 Naya Yohana ya kwa təɗəhimi nə kala ndə nda tə ngatə ɓwanya mətakər likatəkatə na. Dəhə ndə nda tə tsakəngər vanya səu, Hyel kwa tsakə kənyi təmachi inda nja tsəfətə ku likatəkatə na. 19 Ya dəhə ndə nda tə tanda ɓwanya ku likatəkatə mətakər na, Hyel kwa həbiya nənyi na mbaɗə ku wur pi nda, ana ku mələm karti nda nja tsəfətə ku likatəkatə na.
20 Nacha nda tə dəkə sə'ina tə na, “Əngə tanyi, anə yo shili kacha'ana.”
Aɗəmja, anda, Tlakə Yesu.
21 Papa'akur Tlakə Yesu cha ngya tsa'a ka nji karti nə Hyel, Aɗəmja.