Ɓwanyar Nji Mətləu
11
Ngə nja na'a sər dəkəsəu wi zəwa, ngə nja nar ɗa, “Ma'i ka ki dəkətə Mbwa'alə Hyel ana dzəgana, ana tsəu ka jigabiya njir həsəli nda kwa. 2 Kəl ja, ngwa ka da dəkə mbwa nda biyabibiya wa, aka a nənyi tə nji nə nji'inda pa'a kwa zəndə Hyel, nda kwa dərɓiya Mələm Karti nə hya fwaɗəkumənyi parnya mətləu. 3 Ana yo nənyi gyalkur nə nji mətlə ka nda ɓwanya, aka nda takər nə hanyi 1,260, nda kwa pəndzə guzhalguzhal.” 4 Njir ɓwanya mətlə inga nanda ingə wur zaitun mətlə ana chaka'i təkəsə mətlə inda ta'i mar Tlakə nə dunəya. 5 Macha vanya ndə da nda kwa gwa'a takasiya nda, hu'u kwa biya ku nya nda, nda kwa kuɗənda njir dawa kənda. Əngə tanyi njo kuɗənda dəhə njir dawa kənda. 6 Nji inga gyalkur da tsa nda, nda ndo haɗənda huɗamələm tsa par da shili ku bəji nda nda kwa takər ti, ya gyalkur da tsa nda, nda ndo shandə ɓiti cha ɗa ka mashi ana nda kwa nau gwa'atə dəhə chulkə ɓwaɓwatə ɗa tə dunəya aku kala bəji nda nda kwa i ti.7 Nda nji'inda wurandə ɓwanya kənda, sərshishi nda tə biya ku ka'u nda a ɓəlinyi da wa nda, kwa pa nda, cho kura nda ba'a kuɗənda nda. 8 Njo ngyar kumur dza nda a tə laku nə mələm dəgal nda njo nga Sodom ana Masar, ana mbwa nda nja kukwanda Tlakən nda ti. 9 Aka hanyi makər na manyi nji pampaməu, jul nji ana nya pampaməu ba'a kala hə'i kwa shili ndzam dza nda, ba'a katə tsa nji da haɗiya nda. 10 Njir dunəya kwa mər hirgyaɗi aka tər nji mətlə inda. Nda ɓatliya ladər hirgyaɗi, nda kwa lə ga'a nə kərnənda aka njir mətakər mətlə ingə tə gwa'atənyi ɓwaɓwatə nə njir dunəya. 11 Kəl ja, ahir hanyi makər na manyi nga, səpi tə hya'ati tsa Hyel ga gu ta nji'inda ngə nda hya'atə tə ta'i. Ngə ləvər tə səya nji'inda tə la'a nda gagaɗa. 12 Ngə nda ngatə kurakə dzəgam dzəgam tə səya kya huɗamələm kwa na nənda, “Zəda ma tangna.” Ngə nda gi huɗamələm aku ləmbəkəu, njir dawa kənda kwa ndzam nda.
13 Atə ndawa bəji, hə'i tə dzədzə gagaɗa ngə zhang ku kumə nə mələm tə waza. Nji 7,000 tə kuɗə kwa, nji'inda tə mbəɗə tsəu ləvər tə səya nda ngə nda hətə nyi səli nə Hyel nda kya huɗamələm.
14 Mətləkunya ɓwaɓwatə wurti, makərkunyi kwa shili.
Məɗəfəkunya Papam
15 Məɗəfəkunya chama nda tə mbəɗiya papam nyi, kəl ngə nja ngatə kurakə dzəgam dzəgam tə biya kya huɗamələm, nda kwa na,
“Təlkur dunəya shili ti,
təlkur Tlakən mən ana nə Kəristi nyi,
ya cho səm təlkur nə ba'anawa.”
16 Ngə njirawawa'a mətləkumənyi parnya fwaɗə inda tə ngya ku dzəga təlkur mar Hyel inda tə piya ma nyi ga hətə nyi səli nə Hyel, 17 nda kwa na, “Eo usaku nghə Hyel Tlakə ndər gyalkur, ndə nda sakana ana ɗakaɗa, aka a dləutsə təkə gyalkur ngha, ya ghəya təkə səm təlkur. 18 Njir dunəya kwa mər huɗətla, ya huɗətla nghə shili ti. Bəjir mərtə nyi nəuma nə nji kuɗəkuɗə ɗa ti, ana aka ka nənyi zhar mavi'i mətakər ngha, ana nji karti ba'a nji'inda tə hətə nyi səli nə tləm ngha, zər ana ndəradəgal, ana nja zhazhinda nji'inda tə səwandə dunəya.”
19 Ahir nga, Mbwa'alə Hyel nda kya huɗamələm tə mbəɗa, aku mbwa'alə nyi nda, nja la'a gwarara alkawal nyi. Ana sə mbəlmbəl kwa nghənghəɗi, ana kurakəu, ana dəradla, ana dzədzər hə'i, ba'a mindindili wawa'a.