Chama ana Zər Likatəkatə nda
10
Ngə ya la'a vanya dəgalər chama Hyel kwa səya kya huɗamələm, nja ɓandə nyi na ləmbəkəu ba'a katsakərpar gya kəra cha, huɗəma cha wi pəchi, ana hya cha tsəu wi shimbal hu'u gəɗəgəɗa. 2 Ana zər likatəkatə mbəɗəmbəɗə ku cha cha, cha diya hir chisəma cha ku fa'a dəgal ana hir matsala cha atə hə'i, 3 ngə cha nga na kurakə dzəgam dzəgam wi ngə ləvari kwa ghərti. Nda cha nga, ngə kuraka dəradlə məɗəfə inda ndəra. 4 Nda dəradlə məɗəfə inda ndəra, yo gwa'a tsəfa, kəl ja, ngə ya ngatə kurakə səya kya huɗamələm tə na, “Ɗəwanda sə'ingə dəradlə məɗəfə inga na nga, ngwa ka tsəfə wa.”5 Ngə chama nda ya la'atə diya hya cha zhang tə fa'a ana zhang tə hə'i nda tə har chisəma cha shi huɗamələm. 6 Ngə cha səmfəla na tləmər nacha nda na pi ba'anawa, nda tə mər huɗamələm ana hə'i ana fa'a dəgal ba'a dəhə sə'inda kwa, ngə cha na, “A tsə'u njo ɗə bəji səkə wa! 7 Kəl ma məɗəfəkunya chama nda tə mbəɗiya papam nyi, njo nyabiya sə ɗəwaɗəwa nə Hyel, wi nda cha nar nyi nə mavi'i nyi, njir mətakər.”
8 Ngə kurakə nda ndər na'a səya kya huɗamələm nda ɓəla ɓwanya na'a ga na, “Ma'i ka yi hətə likatəkatə mbəɗəmbəɗə ngə ku cha chama ngə ta'i tə fa'a ana hə'i nga.”
9 Ngə ya yada chama nda ga nar nyi cha na'a zər likatəkatə nda, cha nar ɗa, “Hətə ka ɗənya. Cho ɗa ɗəwatə ku taka, kəl ja, ku nya ka cho ɗa nənəm wi mwamwa chiɗi.” 10 Ngə ya dləutsə likatəkatə nda ku cha chama nda ga ɗənya, cha ɗa nənəm ku nya ya wi mwamwa chiɗi, kəl ja, nda ya ɗənya cha mərtə taya ɗəwatəu. 11 Əngə nja nar ɗa, “Tuku ko takər səkə təkəra nji pampaməu, hə'i, nya pampaməu ba'a nji təltəl.”