9
Tufkunya chama nda mbəɗiya papam nyi, ngə ya la'a sasəlga nda təɗə kya huɗamələm səya hu'i nda, ngə nja nənyi sər mbəɗə nya ka'u nda a ɓəlinyi da wa nda.a 2 Nda cha mbəɗiya ka'u nda, ngə ear tə biya kwa wi ear batə səu, nga haɗiya pəchi ana huɗamələm dərdla'a. 3 Ngə ndzəkwa tə zəbiya tə dunəya ku ear nda, ngə nja nə nda gyalkur dah wi nə idah gwangula. 4 Nja nar nda ngwa nda da takasiya sar nda təkəra hə'i, ndara wua ana kala sə tsətsə wa, kəl nda nji'inda pa'a na hatimi nə Hyel ku nyama nda. 5 Ada nja nənda gyalkur kuɗənda nji wa, kəl nda nda nənda ɓwaɓwatəu nə hya tufu. Ɓwaɓwatə nda nda kwa sa, wi ngə tə idah gwangula kwa izza. 6 Aku bəji nga nji kwa gwa'a tah, ya a da nda kwa uya wa, nda kwa chim tah, kəl ja, tah kwa hwi tsa nda.7 Ndzəkwa inda tə pabiya taku nda nja ɓatliya ka ki dla'a. Aku kəra nda vanya sə da wi pahuɗə mba kər bəjingha, huɗəma nda tsəu wi nə ndəu. 8 Shishi kənda wi nə mahi'i, ana hira nda tsəu wi nə ləvari. 9 Nja mbuya hatla nda na ləkutəu pa, ana kurakər babəka nda wi hya charkaina taku inda kwa ki dla'a. 10 Shi'ua nda na gəda kwa wi nə idah, ya ku shi'ua nda tsəu gyalkur da nə nənyi ɓwaɓwatə nə nji hya tufu. 11 Chama nda nja fəkər təkəra ka'u nda a ɓəlinyi da wa nda ngə wi təl kənda ana tləm nyi ku nya njir Yahuda, “Abaddon,” aku nya njir Heleni tsəu, “Apoliyon.”b
12 Tangərmar ɓwaɓwatə tərabiyati, ya tsə'u tanyi mətləkunyi kwa shili.
13 Kwakunya chama nda tə mbəɗiya papam nyi, ngə ya ngatə kurakəu kwa biya ku ngum fwaɗə nə dzəgana bəjingha nda mar Hyel, 14 kwa na nə kwakunya chama nda na papam nda, “Pəliya chama fwaɗə inda nja mbiya nya dəl dəgal nə Yufəretis nda!” 15 Ngə nja pəliya chama fwaɗə inda nja fiya ka nəna bəji ana pəchi na ana hya na ana fa na aka nda kuɗənda zhang ku makər nə ɗangkura nji. 16 Ɗangkura ləvaləva dla'a na taku kwa ɗa miliyan gharəu mətləu, əngə sənda nja nar ɗa.
17 Aku shi'uni pəchi ɗa ya la'a taku ana njir dlənda, ləkutə pa kənda dəzə njong wi hu'u gəgəɗa, wi ɓitir chacha ba'a ibizər ibizər. Kəra taku inda wi nə ləvari, hu'u tsəu ana ear kwa biya ku nya nda ba'a vanya sə kwa ngi wi hu'u kwa shi'uni ɗimi. 18 Nja kuɗənda zhang ku makər nə nji ana ɓwaɓwatə pampam makər inda kwa biya ku nya nda inda. 19 Gyalkur taku inda aku nya nda ana shi'ua nda, aka shi'ua nda wi pwabu, kər da tə shi'u inda ka ga nda nənyi ɓwaɓwatə nə nji ni.
20 Həyadzər nji'inda pa'a tə kuɗə na ɓwaɓwatə nda, a da nda tubi tsa sə'inda nda mər na cha nda ba'aka sakangə wa, wi ka həsəli nə kwadzaɓi, katə nda nja mər na bəjingha ana azurfa ana ndzəa, ana hangu ana katə nda nja fiɗə na wua, inda pa'a kwa la'a sə ndara ngatə ndara ma'i wa. 21 Ya a nanda tubi tsa kuɗə nji, ana tsakəza, ana kasalikur ndara həl wa.