Vanya Mala ana Pwabu Məlləm
12
Kəl ngə ya la'a vanya sər muniya dəgal tə ɗa kya huɗamələm, vanya mala da tə pəndzə pəchi ka dzaki, cha piya hya cha tə hya, ga ba nda kəra cha na pahuɗə kər nda nja ɓatlə na sasəlga kwabəmətləu. 2 Huɗə ku ta cha, cha kwa tiwi, aka tə nda ɓəlakərya kwa ta. 3 Ngə vanya sər muniya tə ɗa kya huɗamələm, kəl jan vanyi dəgaldəgalə pwabu məlləm dəzəu, ana kəra cha məɗəfa, ana tələm kuma ba'a pahuɗə kər ku kala kəra cha. 4 Shi'ua pwabu məlləm nda tə tsəkənda zhang ku makər nə sasəlga huɗamələm ga pətə səya tə dunəya. Ngə cha ta'ita nyi mar mala nda kwa gwa'a ya nda, cho səkə mala nda ya ka ga cha ɗənya zər nda. 5 Cha ya zər sal, ndə nda kwa mər təlkur təkəra dəhə nji ana zəwa lyang. Ya ngə nja tsənda zər nda gya da Hyel ana gyo dzəga təlkur nyi. 6 Ngə mala nda tə hwi tanyi gwa takəu, kyatə mbwa nda Hyel tə ɓatliya ka cha, mbwa nda njo tsamartə nyi tə nə hanyi 1,260.7 Kəl ngə pa hya'atə kya huɗamələm, Mika'ilu ana chama nyi i'i tə pa pwabu məlləm nda, pwabu məlləm nda ka chama nyi tsəu kwa pa nda. 8 Kəl ja, nja kura pwabu məlləm nda, a da nja zhaka ngya nda nda ngya kya huɗamələm wa. 9 Ngə nja vakənda pwabu məlləm dəgal nda, nda ɗəɗəm njo nga nyi sərtakəu, ma'a da wa Shantan, nacha ngə kwa shakər nə dəhə dunəya. Ngə nja vakənda nyi səya tə dunəya nanda ka chama nyi i'i.
10 Ngə ya ngatə kurakə dzəgam dzəgam hya'ati kya huɗamələm kwa na,
“Sakan ja dləuya ana gyalkur ana təlkur Hyel kəmən,
ana gyalkur Kəristi nyi shili ti.
Aka ndər gwa'a ka zamən mən na bikəu,
nacha inda kwa wula nda mar Hyel kəmən
vu'i na pəchi,
a vakənda nyi tə nji səya tə dunəya.
11 Nda kura nyi
təwa mashi Zər Gam,
ana ɓwanya nda nda kwa pə təkəra cha,
aka a da nda nyida pya nda ga ləvər tə wa.
12 Aka əngə ja, mər ma hirgyaɗi huɗamələm
ana nahi nda na ngya kwa!
Kəl ja, sər təhuɗə nahi dunəya ana fa'a dəgal,
aka sərtakə səya tə da hi,
ana huɗətla ɗimiɗimi,
aka zəndətə cha ənda bəji nyi wurti!”
13 Manda pwabu məlləm nda la'a a gədlənda nyi tə nji səya tə dunəya, cha gədlə mala nda tə ya zər sal nda. 14 Nja nənyi babəkə mətlə wi nə ambələm nə mala nda, aka ga cha fəl tanyi kyatə mbwa nda nja ɓatliya ka cha ku takə nda, mbwa nda njo tsamartə nyi nə fa makər na manyia ti, tsa pwabu məlləm nda da uya nyi. 15 Ngə pwabu məlləm nda tə dəliya ɓiti wi dəl hya'atə ku nya cha, aka ga mandza təra na mala nda. 16 Kəl ja, hə'i tə hagwa nyi chi nə mala nda, cha mbəɗiya nya cha ga ndasənya dəl nda pwabu məlləm nda tə dəliya ku nya cha nda. 17 Aka ənga pwabu məlləm nda tə mər huɗətla na mala nda, ngə cha təra ka cha tliya pa təkəra həyadzər nguli mala nda, nji'inda kwa mər sənda gadlagadla Hyel kwa na, ana kwa dəkə ɓwanya təkəra Yesu. 18 Ngə pwabu məlləm nda tə ta'ita nyi tə məshishi'ua nya fa'a dəgal.