Aku likatəkatə nə njo nga Takər Yohana na, Hyel tə char nyi takər nə Yohana təkəra pa nda ku pama təlkur nyi ana təlkur Shantan. Aku bəji nda Hyel kwa takər nə Yohana, təl Roma kwa la'a ku ndana bəji wi nacha ngə tə ndiya na gyalkur tə dunəya. Cha tsau nyi bar nə dəhə nji'inda kwa həsəli nənyi. Cha gwa'a kala ndə dləukəri ənda “Təl Roma ngə tlakəu,” təvi nja ngya nda kanda shafəli ndara nda mər alenya sə ku pama nji.

Njir nəu Yesu nənyi tə jiri ənda kəl Hyel ngə Tlakəu, ya kəl nənyi njo həsəli. Manda njir nəu tə ngyar həsəli nə təl Roma, ga na bəra kəl Yesu ngə Tlakəu, ənda cha tə ga hya'ati, ya hətə nyi tənji gi huɗamələm, ngə nja ɗa məndza'u nanda ga kuɗənda ɗang ku huɗa nda.

Likatəkatə na kwa ɗənghatə nyi nə njir nəu ənda ngwa sənda nda kwa la'a ana kwa ɗa na nda da tsəya ɗufwa nda wa. Təl Roma kwa la'a wi dəhə gyalkur tsa cha ya a da əngə wa, aka ənga Hyel kwa tsəɗufəu nə dəhə njir nəuwa ana char nda ənda nacha ngə kwa gəla dəhə səu.