4 Hya'atə tsa Yohana ana tsa shanguɗə məɗəfa nda mar dzəga təlkur Hyel yi nə daɓədzər njir nəu nda ku mələm pampam məɗəfa, inda tə hə'i Asiya. Papa'akur ana piyarɗufəu nə hi, hya'atə tsa ndə nda sakana, ndə nda ɗakaɗa ana ndə nda kwa da shili. 5 Ana hya'atə tsa Yesu Kəristi nda kwa pə sənda njo dləukəri, yar tangərma ku huɗa nji'inda kwa hya'atə ku hwa, ndər mər təlkur təkəra nji təltəl nə dunəya.

Nacha ngə ndə nda kwa nyida mən, ga dləuya mən tsa səpəla'a kəmən təwa pənda mashi nyi. 6 Ngə cha mərtə mən ka njir təlkur ana fərist ka məna mər tlər nə Hyel Ada nyi, səli ana gyalkur ngya tə nənyi ba'anawa! Aɗəmja.

7 Janə cho shili ku ləmbəkəu, ya kala li kwa la'a nyi, ma'a nji'inda tə dzavənyi, ana njir dunəya kwa sə'ingu nyi. Əngə kwa ɗa! Aɗəmja. 8 “Naya ngə tangərma ana batəbatənyi, ndə nda ɗakaɗa, ana sakana, ana ndə nda kwa da shili,” ənghwandə Hyel Tlakəu Ndə Ndiya na Gyalkur.

9 Naya Yohana, zamən hi, ya bazhi daɓəkər kəhi ku ɓwaɓwatəu, təlkur ana mbahuɗə səsə'ua, nda nəkəmən ku Yesu. Nja gədlənda ɗa ya tə Patmos hə'i nda dəl dəgal tə ɓandi, aka mafakə ɓwanya Hyel nda ya bəza, ana ɓwanya jiri nda ya pə təkəra Yesu. 10 A tə Pəchir Tlakəu^a, Shanguɗə tə maɗətə ɗa, kəl ya ngatə kurakə biyahi ɗa 'ual'ual wi papam. 11 Kurakə nda tə na, “Tsəfətə dəhə sə'inda ka la'a ku likatəkata ka sətə nyi nə daɓədzər njir nəu nə mələm məɗəfa, nanda ingə, Afisa, Simirna, Birgamus, Tiyatira, Sardisu, Fildalfiya ana Laudikiya.”

12 Ngə ya sha ka ya la'a nda wa ngə kwa ndər naya, ngə ya la'a chaka'i təkəsə məɗəfa, 13 aku pama chaka'i təkəsə məɗəfə inda kəl janə vanya ndəu wi Zər Ndəu. Cha handzə ləkutə dzəgamə səya kwa'a tə yir hya cha, ga mbabiya hatla cha na gyarakən nda kwa mbəl wi bəjingha. 14 Kəra cha ana shishi nyi pərtə tyal wi pərpa'ua, lya cha wi kyara hu'u, 15 hya cha wi ndzə nda nja fətəbiya ga kəkəɗənda, kuraka cha wi ɓiti nda kwa hwi. 16 Cha gəziya sasəlga məɗəfa ku chisəma cha, ana katsakər nda na hira cha mətlə kwa səm gagaɗa kwa biya ku nya cha. Huɗəma cha kwa mbəl wi pəchi tankər.

17 Nda ya la'a nyi ngə ya dla ma nyi wi ndə tətah. Kəl ja, ngə cha hatə ɗa chisəma cha, cha na, “Ngwa ka da ləvər wa, naya ngə tangərma naya ngə batəbatənyi. 18 Naya ngə na pi! Ya ɗaka tah, kəl ja, jan ya na pi nda ba'anawa, ya gyalkur tsa ya təkəra tah ana mbwar ngya njikə mambəl. 19 Aka əngə ka tsəfəbiya sənda ka la'a sakana, ana sənda kwa ɗa biyama. 20 Janə sənda sasəlga məɗəfə inda ka la'a ku chisəma ya nda, ana chaka'i təkəsə nə bəjingha məɗəfə inda təkəri, sasəlga məɗəfə inda, chama daɓədzər njir nəu nə mələm məɗəfa inga, chaka'i təkəsə nə bəjingha məɗəfə inda tsəu, daɓədzər njir nəu nə mələm məɗəfə inga.”