Yada nji'inda Hyel tə ɗəmətsi, ga nyidatə ana nji'inda kwa ngya ku ɓəla nə Yesu Kəristi.

2 Ga Hyel cha nə hi təhuɗəu, nyida, ba'a piyarɗufəu bwaɓu.

3 Ka bazhi ɗa nda yo nyida, nda chim ya, ya tsəfətə hi təkəra uya mbəɗə kəmən, nə ya la'a a ɗatə tsa'atsa'a ya tsəfə nə hi ana ya tsukutə hi ka hya ta'i na dunama təkəra jirikur nda Hyel tə taɓəu nyi ku cha nji karti. 4 Aka alenya nji pəla'a da tə tləɗəu kərnənda gu pama hi. Nda kwa gwa'a nda shandə ɗanghali nə Hyel ka lakur mər səpəla'a. A wurtə nji tladanyi nəuma nə chul nji ingə ɗəɗəməu, aka nda ngyar Yesu Kəristi nda wurəkər Təl kəmən ana Tlakən mən.

5 Madangə kwa zəndəbiya hi sə'ingə dəhəu, kwa i ya ya ɓəla ɗənghatə hi ənda Tlakə tə mbəɗandə njir Isra'ila ku cha njir Masar, dəhə ka ənga cha nda kuɗənda alenya nji'inda ngyar nənyi jiri ku pama nda. 6 Hya zəndə ənda Hyel tə mbiya alenya chama inda tə ngyar mbwa nda nja nənda gyalkur təkəri, ga bəzəu nda go mbwar kutla, njo səkə bəjir nəuma na nda. 7 Əngə tsəu njir hə'i Sodom ana Gomora ka alenya mələm inda tə ɓandə nda tə məra, nda nənyi kərnənda nə kasalikur ana həyakur. Nda ɗa ka ba'adar nji'inda kwa sa ɓwaɓwatə ku hu'u nda ba'anawa.

8 Əngə tanyi nji ingə tsəu təwa shi'uni kənda, nda səwandə dza nda. Nda həyatə gyalkur Hyel, ga pə ɓwanya ɗimi təkəra njir huɗamələm. 9 Mada Mika'ilu nda dəgal təkəra chama Hyel i'i ma'a da tə mər əngə wa. Aku bəji nda, nda ndo kəpal na sərtakə təkəra dza Musa, a kərnya Mika'ilu da uya dunama ngəl ana pə ɓwanya ɗimi wa. Wur sənda cha na, “Tlakə na kərnyi tsə ngha!” 10 Kəl ja, nji'inda kwa pə ɓwanya ɗimi təkəra dəhə sənda pa'a nda ngabiya, kəl sə'inda nda kwa ngatə ku dzanda, wi ka sərshishi inda pa'a kwa jigatə dəma, nacha ngə chul sə'inda kwa kuɗənda nda.

11 Sər təhuɗə na nda! Nda nəu lakur Kayinu. Aka gwa'a zhar nda mər chul bikə nda Bala'am tə məra, nda kuɗə tsəu təwa tlə mwali chul nə Kora.

12 Ma nji'inə kwa səm sə kə'i hi ku ladər nə nyida, a kuzhi da wa. Wi njir ɓəla nda kəl kərnənda nda kwa zəndi. Wi ləmbəkə nda gyang kwa ha, ya a par da kwa wa. Wi wu inda pa'a kwa ya bəjir hyapuchi, wi wu inda nja dlanda dəhə ka ngilangha nda, ya a tə pa'apa'a. 13 Wi dəl nda kwa mər məlləm nda, sər kuzhi inda nda kwa məra, chabiyatədzə wi mburum. A səda təkə nda na sasəlga inda kwa zhuli ɓwa'atanyi wa, nji'inda Hyel tə fiya nda mbwar kutla nə ba'anawa. 14 Ma'a Anuhu ndə nda məɗəfəkunya nyandəla Adamu, tə pə ɓwanya mətakər təkəra nji'ina ənda, “Jan Tlakə kwa shili na dlama chama karti nyi, 15 aka cha mər nəuma nə madawa. Cho chabiya nyi nə nji'inda pa'a ku lakur Hyel səɗimi inda nda məra. Cho hwaɗəbiya dəhə ɓwanya ɗimi inda njir mər səpəla'a tə pə təkəra Hyel.” 16 Nji'ina kəl jiganya ana gwa'a bikər alenya nji. Səɗimi tanyi ngə ku jigadəma kənda. Nda kwa shakər nə nji təwa pə ɓwanya məsəɗakə aka gwa'a zhar nə kərnənda.

17 Kəl ja ka bazhi ɗa nda yo nyida, ɗənghatə ma sə'inda ka changhabal Tlakən mən Yesu Kəristi tə na kwa ɗa. 18 Nda par hi bəra, “Aku batəbatər bəji, alenya njir pə ɓwanya həyatəvi kwa shili, nda kwa nəu sənda mwaɓər dza nda kwa i, sə'inda a da lakur Hyel wa.” 19 Nanda ingə kwa təkə pama nji. Nda kwa nəu kəl jigadəmar kərnənda, aka Shanguɗə Karti nə Hyel da ku ɗufwa nda wa.

20 Kəl ja, nahi ka bazhi ɗa nda yo nyida, chiya ma kərnəhi ku jirikur karti. Hya pətlənya ku Shanguɗə Karti. 21 Hya ngya ku nyidar Hyel, hyo səkə təhuɗə Tlakən mən Yesu Kəristi, ndə nda kwa yi na mən ku pi nda ba'anawa.

22 Char ma təhuɗə nə nji'inda na kəpal ku ɗufwa nda. 23 Hya dləuya alenya nji tsa hu'u hya mbəɗandə nda. Hya char nyi təhuɗə nə alenya nji, kəl ja, hya mər na sənam, hyo həɗə tsa ləkutə inda nda səwandə na tlər ɗimi kənda.

24 Fal ngya tə ka ndə nda na gyalkur ɓəlatə hi tsa hya da dla, ana cha chabiya hi mar səli nyi nji'inda pa'a njo uya na sər ngəla ana hirgyaɗi dəgaləu. 25 A nənyi tsəu, nacha nda Hyel Ndər Dləuya mən, təwa Tlakən mən Yesu Kəristi, səli, təlkur, dəgalkur ana gyalkur nda ngya ka nənyi, a tə ghəyar bəji, ana sakana, ana ba'anawa! Aɗəmja.