Ngyar Njir Nəu Kəristi
4
Ma'a Kəristi sa tə ɓwaɓwatə ku dza cha, hya hətə chulkə ngya nyi, hya ɓatliya ɗufwa hi hya mbabiyadzə ku sa ɓwaɓwatəu, aka kala ndə nda sa ɓwaɓwatə ku dza, təkətə cha na səpəla'a ndani. 2 Tuku cha dləukər Hyel gəla nyi ku udiya ngyar dunəya nyi, kəl ja, a da na mwaɓər ndəkurndə wa. 3 Ɗakaɗa a wurtə hi ɗahurnda bəji 'ual gagaɗa ku mər sənda nji kəla nəu Hyel kwa məra. Hya ɗahurnda bəji kəhi tə mbwar mər shushu'ukur, nəu mwaɓər dza, wi na mbadla, ladər sa sə sasa ana həsəli nə katəu. 4 Sakana, nji kəla nəu Hyel kwa mər məngəl ənda tsəu hyo daɓəkər ka nda ku mər səɗimi wa, nda kwa pə ɓwanya ɗimi təkəra hi. 5 Kəl ja, nda kwa da wum nə Hyel nda kwa mər nəuma nə madawa təkəra sə'inda nda məra, nji'inda na pi ana nji kuɗəkuɗa. 6 Nacha gwa'atə nja bəzə Mafakə Mənakə ma'a nə nji kuɗəkuɗa, tsa'aka madangə wurtə nji tlanda nda nəuma ku dza wi nə alenya nji, nda kwa nau ɗa na pi wi ngətə Hyel na pi.7 Ɓələr dəhə sə ɗatə ləhəu, gəlatə ma kərnəhi, hya ngya na ɓəla, ma'a da wa a da hyo nau pətlənya wa. 8 Matsa dəhə səu, hya nyida kərnəhi na ta zhang. Aka nyida kwa mbuya səpəla'a ɗang gagaɗa. 9 Hya ngyar ki kəhi wung nə kərnəhi, a da na huhuni wa. 10 Madawa ku pama hi dləutsətə ga'a pampam nə shanguɗə tsa Hyel. Mər ma tlər na ga'a inga ka mər tlər nə alenya nji. Təwa ənga hyo nau mərtə tlər na ga'a nda nja nə hi tsa'atsa'a. 11 Ndə nda kwa bəzə Mafakəu, tuku cha bəzə Mafakə nda səya tsa Hyel, ndə nda kwa vala alenya nji, cha mər na dunama nda Hyel tə nənyi ka ndawa tləra. Nja mər ənga aka fal Hyel təwa Yesu Kəristi. Nacha ngə na səli ana gyalkur ba'anawa. Aɗəmja.
Ənda njo Mbahuɗə ku Ɓwaɓwatəu
12 Ka bazhi ɗa nda yo nyida, ngwa hya da mər məngəl na iza'ur ɓwaɓwatə nə dzə nda kwa uya hi, wi taɗər sə ngə kwa ɗa na hi wa. 13 A təvəra ənga, mər ma hirgyaɗi, aka dzə inə ngə kwa mərtə hi sə zhang ka Kəristi ku ɓwaɓwatəu, aka ga hya ɗa nyinyinyi na hirgyaɗi ma səli nyi tə chabiyadza. 14 Njir hirgyaɗi hi ma nja ngəl hi aka hi njir nəu Kəristi, aka Shanguɗə Hyel nda na səli kwa ngya tsa'a ka hi. 15 Mada hya sa ɓwaɓwatə ja, ngwa cha da ɗa a təkəra tsa ndəu, həl, pu'ikur, ndara nji'inda kwa ha nya nda ku ngyar alenya nji wa. 16 Kəl ja, a da cha sər kuzhi ma ndə tə sa ɓwaɓwatə aka cha ɗa ka ndər nəu Kəristi wa, kəl ja, hya fal Hyel aka nji kwa nga hi na tləmər Kəristi. 17 Bəji ɗatə nda njo ghəya mər nəuma nə nji, ya nji'inda nə Hyel nja kwa ghəya nə tangərma. Ma nja ghəya namən ja ya, aman cho udiya na nji'inda pa'a tə nənyi jiri nə Mafakə Mənakə nda səya tsa Hyella? 18 Wi nda likatəkatə tə na,
“Ma tə ɗa dzau nə njir mər sə tsa'atsa'a
nda uya mbəɗə ya,
mi kwa ɗa na nji kəla zəndə Hyel,
njir mər səpəla'a?”
19 Aka ənga, nji'inda kwa sa ɓwaɓwatəu təkəra sənda Hyel kwa i, nda maka mər sənda tsa'atsa'a. Nda fəu pya nda ku cha Hyel nda tə mər nda, ndə nda pa'a kwa ɓələnda alkawal.