Naya nda ndəradəgal wi nahi, ya kwa tsəfə nə njirawawa'a njir nəuwa nda ku pama hi ka ya tsətə hi ɗufəu. A la'a təya ɓwaɓwatə nda Kəristi tə sa, ya yo uya mbaɗə ku səli nyi ma tə chabiyadza. 2 Hya ɗa ka njir ɓəla dangal nda Hyel tə tsau ku cha hi. Ngwa hya da mər wi nja chiu hi kwa na tuku wa, kəl ja, aku ikur kəhi wi nda Hyel kwa i. Əngwa hya mər ka sənda hyo uya kwa wa, kəl nda ana hirgyaɗi aka mər tlər nə Hyel. 3 Ngwa hya gwa'a cha gyalkur nə nji'inda ku cha hi wa, kəl nda hya ɗa ka sər dlədləɓa. 4 Təwa ənga, ma Dəgalər Ndər Ɓəla tə da chabiyadza, hyo dləutsə pahuɗə kər nə səli, nda a do ɗəzə pa'a wa.

6 Aka ənga ja, hya tashiya kərnəhi mar Hyel nda na dəhə gyalkur, aka ga cha har hi gi ku bəji nda cha i ti. 7 Ngya nyi ma na dəhə sənda kwa wendə hi nə Hyel, aka nacha ngə ndər ɓəla hi. 8 Hya ngya na ɓəla, hya ɓatliya kərnəhi. A nə ndər dawa kəhi sərtakəu kwa ghərti wi ləvari, cho gwa'a ndə nda cho ɗinya. 9 Hya ta'ita'i ku jirikur kəhi, ngwa hya nənyi laku nə sərtakə wa, aka a zəndətə hi alenya njir nəu nda ku dəhə dunəya kwa sa chulkə ngəna ɓwaɓwatəu. 10 Kəl ja, ma hya sa ɓwaɓwatə nə zər bəji kushiu, Hyel nə dəhə ɗanghali, nda nga hi ka hya ɗana səli ba'anawa təwa Kəristi Yesu, cho ɓəla mərtə hi nyinyinyi, cho tsakətə hi dunama, cho chiya hi. 11 Gyalkur ngya tə ngyangyanyi nənyi ba'anawa! Aɗəmja.