Mahi'i ana Shili
3
Wi ngə tanyi tsəu, nahi mahi'i ɗəuɗəuwa hya ɗa kəriwa nə shili kəhi, aka macha alenya shili da ku huɗa nda nda pa'a tə nənyi jiri nə ɓwanya Hyel, ngya kəhi kwa nau gwa'atə nda kwa nənyi jiri, mada a da nja ɓwanya nənda wa, 2 nda kwa la'a ngya kəhi chaməu ana kwya'akura hi, nda kwa sha. 3 Ngwa ɓatlə kəhi da ɗa biyabibiya tə kumur dzə wi ka ləməkər, ha bəjingha, ana dzaki inda nja kwa ɗəl na kwaba 'ual wa. 4 A təvəra ənga, əngwa ɓatlə kəhi cha ɗa nə ɗufəu, wi ka kwya'akur, həyakər nda na səli nə Hyel ya a da kwa wur wa. 5 Aka əngə mahi'i karti inda kwa ləvər Hyel ga fəkər da cha haaɗa tə ɗa gumaguma, təwa ɗa na kəriwa nə shili kənda. 6 Wi Saratu, cha mər sənda sal nyi Ibrahim kwa i, cha nga nyi tlakəu. Ya nahi, ku'i nyi hi ma hya mər sənda tsa'atsa'a, ya a da hya ngatə ləvər wa. 7 Nahi shili tsəu, əngə tanyi hya ngya na mahi'i kəhi na jigadəma mənakəu, hya ngabiya ənda a dunama da tsa nda wi nəkə hi wa. Hya la'a səli kənda aka sə zhang hi ku ga'ar taɗər pi nda Hyel tə nə hi. Hya mər ənga tsa vanya sə da katə pətlənya kəhi.Ɓwaɓwatəu aka Mər Mənakəkur
8 Udiya nyi, dəhə hi hya ɗa na jigadəma zhang, hya ngatə təhuɗər kərnəhi, hya nyida kərnəhi, hya char ɗufəu nə vala dza, a da na həkər wa. 9 Ngwa hya ki ɗimikur na ɗimikur wa, ndara hya kibiya ngəl na ngəl wa, kəl ja, hya kinda na papa'akur. Aka nacha ngə sənda nja nga mən kari, ga hya uya fa'aki papa'akur. 10 Aka likatəkatə tə na,
“Macha kwa ikə ka ngatə məsəɗakəkur pi,
ya kwa i kə ka la'a bəji mənakəu,
ka gəlatə kyara ka tsa ɗimikur
ana nya ka tsa tla gəzhi.
11 Ngyar mər səɗimi,
ka mər sə mənakəu.
Gwa'a piyarɗufəu na dəhə ɗufwa ka.
12 Aka lya Hyel tyakə tanyi təkəra
njir mər sə tsa'atsa'a,
ya hima cha fwang tanyi
kwa səhimi da pətlənya kənda.
Kəl ja, Hyel da kwa i nəɗə
njir mər ɗimikur wa.”
13 Sakanə ja ya, wa ngə kwa takasiya hi macha hirgyaɗi tsa hi ka hyo mər sə mənaka? 14 Kəl ja, mada hya sa ɓwaɓwatə təkəra mər sə mənakəu, Hyel kwa səkə hi papa'akur. Ngwa hya ɗəngha wa, ya ngwa hya ləvər wa. 15 A təvəra ənga, hya hətə nyi səli nə Kəristi ku ɗufwa hi ka Tlakən hi, hya ɓatliya wa'atanyi ka hya wum nə kala ndə nda tə jau hi təkəra fəkər nda hi ni, 16 kəl ja, hya mər nyi sam ku səli nda a ɗufwa hi da kwa char hi ənda zandə təhi sə wa. Aka ma nja ngəliya hi, nda kwa sa kuzhi manda la'a ngya mənakə nda hyo ngya aka nə Kəristi hi. 17 Hya ɗənghatə ənda bəliya hyo sa ɓwaɓwatə təkəra mər sə mənakəu, macha sənda Hyel kwa i nga, tsa hyo sa ɓwaɓwatə təkəra mər səɗimi. 18 Aka Kəristi tə tah ka səpəla'a zhaka zhang, ndər mər sə tsa'atsa'a tə tah ka nji mər səpəla'a ga cha shili nahi da Hyel, cha tə ku dza, kəl ja, cha hya'atə na pi ku shanguɗəu.
19 Cha bəzə mafakə a nə mambəl inda ku jarum, 20 nji'inda tə ngyar nəu nya Hyel ɗəɗəməu ku bəjir Nuhu, Hyel tə səsə'u nda ku bəji nda Nuhu kwa ɓatlə param. Ku bəji nda, nji chisə tanyi tə mbəɗə ku ɓiti nda. 21 Ɓiti nda nacha ngə ba'adar baɓtisma, ya təwa əngə hyo uya dləuya sakana, a da ka chinda hiɗa dzən hi wa, kəl ja, təwa gədi Hyel na ta zhang təwa hya'atər Yesu Kəristi ku hwa. 22 Sakana, Kəristi təratə gya huɗamələm, ya a tə ngya cha tə chisəma Hyel. Dəhə chama, njir gəla nji, ana njir gyalkur a fiya tənji da kiɗa gyalkur nyi.