2
Aka ənga ja, təkəbiya ma dzə na dəhə pəla'akur, tla gəzhi, dəmənkur, ndahuɗə ana kala chul ngəl dza. 2 Ɗa ma wi nguli dizəu, hya nyida ɓwanya Hyel, wi nda nguli dizəu kwa chim 'ua, təwa əngə hyo həa ya hyo uya mbəɗa, 3 ma'a wurtə hi ɗar papa'akur Tlakəu.Nahi ngə Nji Karti nə Hyel
4 Shili ma da Tlakəu, nacha ngə hangu hər nda na pi nda nja ngyari, kəl ja, Hyel tə tabiya nyi ga hətə səli nyi. 5 Nahi tsəu wi hangu hər nda na pi, nda njo fəu ku hər Mbwa'alə Hyel chulkə nə shanguɗəu. Hyo ɗa ka njir mər tlər fərist karti, ya hyo hatəmachi chulkə nə shanguɗəu nda Hyel kwa dləutsi, təwa Yesu Kəristi. 6 Aka likatəkatə tə na,
“Anə ya tabiya tə hangu nda na səli,
ga fiya vu Sihiyona,
ya dəhə ndə nda tə nənyi jiri nə hangu
ngə a da cho sa kuzhi wa.”
7 A nə hi, nahi nda tə nənyi jiri, hangu hər ngə ana səli gagaɗa, kəl ja, anə nji'inda pa'a kwa nənyi jiri,
“Hangu nda njir hər tə həyati,
nacha ngə hangu nda tə ndiya na sakəda.”
8 Ya tsəfətsəfə nyi cha tsəu,
“Nacha ngə hangu nda
kwa gwa'atə nji kwa tləhi,
kwa gwa'atə nda kwa dla.”
Nda tləhi aka a da nda dləukər ɓwanya Hyel wa. Kəl ja, nacha ngə sənda Hyel tə ɓatliya ka nda. 9 Kəl ja, nahi nji ɗəmɗəm nə Hyel hi, ya njir mər tlər fərist nə təl, njir hə'i karti nə Hyel, nji'inda nə Hyel, nda nja ɗəmtsə kanda bəzə sər məngəl inda Hyel tə məra, nda tə ngabiya hi ku kutla zəbiya tə vimbəlmbəla, nda kwa mbəl gagaɗa. 10 Ɗakaɗa a da hi nji'inda nə Hyel wa, kəl ja, sakana ɗatə hi ka nənyawa nji, ɗakaɗa a da hyo zəndə təhuɗə Hyel wa, kəl ja, sakana a uyatə hi təhuɗə nyi. 11 Ka bazhi ɗa nda yo nyida, ma'a ki kəhi da ku dunəya nə wa, ya mihiɓi hi, təkə ma na mwaɓər ndəkurndə nda kwa pa na ɗufwa hi. 12 Hya ngya na mənakəkur ku pama nji kəla nəu Hyel, mada nda kwa har ənda nji ɗimi hi, kəl nda kwa la'a mənakəkur kəhi nda kwa hətə nyi səli nə Hyel ku bəji nda cho shili ti.
Səlir Njir Gəla Nji
13 Aka səlir Hyel, hya ɗa kəriwa nə dəhə njir gəla nji, ndara təl nda kwa səm təlkur təkəra dəhə nji, 14 ndara shal inda təl tə ɗəmtsə ka nda ɓu nji'inda kwa mər səɗimi, ana nda faliya nji'inda kwa mər sə mənakəu. 15 Aka Hyel kwa i hya mər sə mənakə ga hya bəgəya nji kəla zəndə səu, nda kwa pə ɓwanya kəla kər. 16 Hya ngya wi nji dimu, kəl ja, ngwa hya mər tlər na dimukur kəhi ka hya mbuya ɗimikur nə wa, kəl nda hya ngya wi mavi'i Hyel. 17 Hya hətə səlir madawa, hya nyida njir nəuwa, hya ləvər Hyel ana hya hətə nyi səli nə təl.
Mavi'i
18 Nahi mavi'i hya nəu nya tlakən hi ana həsəli, hya mər sənda nda nahi a da kəl manda kwya'a wa, kəl ja, ma'a manda dza'u. 19 Aka sər fal cha ma ndə tə səsə'utə ɓwaɓwatə təkəra sənda a da bikə nyi wa. Kəl nda ka nda cha ndər nəu Hyel 20 Kəl ja, ma nja dəgə hi təkəra bikə kəhi, ngə hya səsə'utə ya, mi zhar nda hyo uya? Kəl ja, ma hya səsə'utə ɓwaɓwatə təkəra mər sə mənakəu, Hyel kwa səkə hi papa'akur. 21 Aka əngə Hyel tə nga hi, aka Kəristi tə sa ɓwaɓwatə ka hi, ga ngya hi hya nəu dərpənyi ga cha ɗa ka ba'ada nə hi.
22 “A cha mər bikə mada kushə wa,
a nja uya gəzhi ku nya cha wa.”
23 Nda nja ngəliya nyi, a nacha ɓəlakə nda na ngəl wa, nda cha sa ɓwaɓwatəu, a nacha gwa'a cha kibiya təwa nənda ɓwaɓwatə wa, kəl ja, cha fətəkər na Hyel nda kwa mər nəuma na jiri. 24 Nacha təkərnyi cha hətə səpəla'a kəmən ku dza cha gyatə taməngəla, aka ga məna ɗa tətənyi nə səpəla'a məna ɗana pi nə tsa'atsa'akur. Təwa takasə nyi hya uya mbəa. 25 Ɗakaɗa sasanyi hi wi kətəng inda sa tsa laku, kəl ja, sakana ɓəltə nji nahi ka hya nəu ndər ɓəla kətəng nda ndər ɓəla pya hi.