3 Fal ngya tə nə Hyel Adanya Tlakən mən Yesu Kəristi! Aka təwa təhuɗə nyi cha nə mən taɗər pi təwa hya'andə Kəristi ku hwa. Sakana məno ngya kəmən na fəkər. 4 Ya uyatə mən sər fa'aki nda nja piya ka mən kya huɗamələm, tangnda a do yiɗa, kikila, ndara zhazhə wa. 5 Sər fa'aki nga nəkə hi nga, nahi nda Hyel tə ɓəlatə hi təwa jirikur kəhi, gyalkur Hyel kwa ɓəla hi kəl pəshi nda hya dləutsə dləuya, nda kwa chabiyadzə ku bəji batəbata.

6 Ɗa ma na hirgyaɗi təkəra sə'inga, madangə ana huɗətla hi nə zər bəji kushəu, aka dəhə chulkə dzəa ana ɓwaɓwatəu. 7 Sə'ingə kwa ɗa nahi ga cha char təkəɗəkura jirikur kəhi. Aku hu'u nji kwa dzar bəjingha kwa nda ɗana səli, əngə tanyi nja dzətə jirikur kəhi tsəu, nda tə ndiya bəjingha nda kwa səwa, ya ma jirikur kəhi tə ta'i na dunama təwa dzə ɗanghəu, cho shili nahi fal ana səli tə pəchi nda Yesu Kəristi kwa chabiyadzə nə dəhə dunəya. 8 Hya kwa nyida nyi madangə a hya ta la'a nyi wa. Madangə a hyo la'a nyi sakanə wa, hya kwa nənyi jiri, ya hya kwa mər hirgyaɗi gagaɗa nda a ndə da kwa nau dəkəbiya wa. 9 Aka dləuya kəhi ngə hya kwa dləuwa, nda nacha ngə sənda gwa'atə hya ɗana jirikur ku cha.

10 Nəna dləuya nacha ngə njir mətakər tə gwa'a nda gwa'abiya sənda cha təkər mənakəu, ya nda bəzəya takər təkəra ɗanghali dləuya nda Hyel kwa nə hi. 11 Nda gwa'a nda zəndəbiya ndara nawa sə'ingə kwa ɗa ana ənda cho ɗa. Ku bəji nda Shanguɗə Kəristi kwa ɓwanya ku ɗufwa nda kwa cha ənda Kəristi kwa sa ɓwaɓwatə ana chul səli nda kwa nəuwahi. 12 Sə'ingə nja chabiya nda nga, a da ka vala kərnənda ku bəji kənda wa, kəl nda kə'i hi. Hyel chabiya tə sə'inga. Njir mətakər ɓwanya tə təkəri, ya sakana ngatə təhi Mafakə Mənakə nga nda nja bəzə təwa gyalkur Shanguɗə Karti nda nja sətə səya kya huɗamələm. Ma'a Chama Hyel kwa gwa'a nda ngabiya chul ngəna səu.

13 Aka əngə ja, ɓatliya ma ɗufwa hi ka tləra, hya ɓəlatə kərnəhi. Hya fətə dəhə fəkər kəhi təkəra ɗanghali nda kwa shili nə hi, ma Yesu Kəristi tə chabiyadzə nə dunəya. 14 Aka ɗa tə tuku hya ngya wi nguli Hyel nda kwa nəu nyacha. Ngwa tsəu hya ɓəl yo ngya kəhi nda haaɗa nda, ka hya nyabiya sə'inda ɗufwa hyo i ku bəji nda hi ku tar zəndə nda wa. 15 A təvəra ənga, hya ɗa ka nji karti ku dəhə sə'inda hyo məra, tang wi nda Hyel nda tə nga hi ndə karti. 16 Aka tsəfətsəfə nyi cha, “Ɗa ma ka nji karti aka naya karti ya.”

17 Ma hyo pətlənya hyo nga nyi “Ada,” nacha ngə kwa mərtə nyi nəuma nə kala ndə tsa'atsa'a na sənda cha məra, aka a da cho tazhira wa. Aka əngə ja, hya wurandə ngya kəhi na ləvəra ku ngyar mihiɓikur kəhi ku dunəya na. 18 Aka zəndətə hi ənda Hyel ngə tə pəliya hi tsa ngya jwajwa'a nda hya fa'atə ki nə tsa jival kəhi nda. Ya zəndətə hi a da na chulkə sə'inda kwa səwa nja pəliya hi wi ka azurfa ana bəjingha wa, 19 kəl ja, ana mashi Kəristi nda na səli 'ualəu, nda zər gam Hyel durdurəu, nda pa'a na mbwar kəti. 20 Hyel tə tabiya nyi təvi nja mər dunəya, kəl ja, cha chabiya nyi ku bəji batəbatə na aka sakəda hi. 21 Təwa nyi ngə hya nənyi jiri nə Hyel, nda hya'andə nyi ku hwa ga nənyi səli, təwa ənga jirikur kəhi ana fəkər kəhi tə ɗa ku Hyel.

22 Sakanə ja, ma wurtə hi ɗa chichinyi təwa nəu jiri nda hi ni, ya ɗatə hi ku nyida jirijiri ka alenya njir nəuwa, hya nyida kərnəhi ja tsa'anyata ana dəhə ɗufwa hi. 23 Aka ɗatə hi ka taɗər nji wi nguli dizəu nə Ada nda pa'a kwa tah, təwa ɓwanya Hyel nda ba'anawa. 24 Wi nda ɓwanya Hyel tə na,