Təɗəhimi nə Njir Gəna
5
Njir gəna ngatə ma ja, tiwi ma hya ləlla aka ɓwaɓwatə ɗimi nda kwa shili təkəra hi. 2 Gəna kəhi yiɗa ti, ləkutə durdur kəhi i'i tsəu, mərɗəkə ɗənya ti. 3 Gəna kəhi vuya ɗinya ti, vuyavuya nga nacho ɗa ka matauli təkəra hi, nda kwa ɗənya kumər dza hi wi hu'u.a Aka hya ngyata hi ka tsəm ngəna nə kərnəhi aku bəji batəbatə na. 4 Hya ngyar ki njir mər tlər ku fa kəhi. Ngatə ma! Wazəba kənda ngə hya ngyar ki ngə kwa lələ təkəra hi nə Hyel. Tiwi nji'inda tə mərəya hi sakədar fa kəhi həyatə Hyel Tlakə Ndər Gyalkur nda kya huɗamələm. 5 Hya ngyata hi ka waha ana waɓi ku gəna a tə dunəya na. Hya kwa ngaltə kərnəhi ka pəchir nəuma, wi hahaldi nda nja ngaltə ka pəchir tla wulya. 6 Nji'inda pa'a da na bikəu hya tlanda nda nəuma ga kuɗənda nda, nji'inda pa'a kwa i kibiya.Ngya na Səsə'ua
7 Aka ənga ja, ka zamə ɗa, ngya ma na səsə'ua, ba'a tə bəji nda Tlakə Yesu kwa ɓəla shili ti. Ndzamar ma ndər zwa nda kwa səkə par tləka ana par batəbata, cha kwa ngya na səsə'ua kwa səkə bəji nda fwakə kwa ɗa ti, cho dzugwa mərəya sənda cha zwa nda. 8 Əngə tanyi ja, hya ngya na səsə'ua, ngwa ləvəra da səya hi wa, aka shilir Tlakə ɗa tə ləhəu.
9 Ka zamə ɗa ngwa hya da jiganya təkəra kərnəhi wa, ma a da wa njo mərtə hi nəuma. Aka jan ndər nəuma ta'i ku nyavi. 10 Ka zamə ɗa, ɗənghatə ma njir mətakər inda ɗaka bəzə mafakə ku tləmər Tlakə nda. Hya fiya nda ja ka sər ba'ada, hya ngya na səsə'u ku ɓwaɓwatəu. 11 Hya zəndə ja, nji'inda tə səsə'utə ɓwaɓwatəu, na nda ngə na hirgyaɗi. A ngatə təhi chulkə səsə'u nda Ayuba tə səsə'ua, hya la'a ənda Tlakə tə mərtə nyi mənakəkur ku udiyar jwaməu. Aka Tlakə tsəu, ndər təhuɗə təkəra nji cha, ndər ɓəla.
12 Sənda tə ndiyavi dəhə ja ka zamə ɗa, nacha ngə ngwa hya da səmfəla na Hyel ma hya kwa mbandər wa. Ngwa hya da səmfəla na mada huɗamələm, mada hə'i, madami səsənyi wa. Wuɗəkər sənda hya kwa na, nacha ngə kəl ndara sənda ah, hya na ah, sənda a'a tsə'u, hya na a'a. Tsa Hyel da səya hi na bikə ku nəuma nyi.
Pətlənya ku Jirikur
13 Vanya ndə da kwa sa ɓwaɓwatə ku pama hi ya? Kəl cha pətlənya nə Hyel. Vanya ndə da na hirgyaɗi ya? Kəl cha fal Hyel na miya. 14 Vanya ndə da ku pama hi na shiləkə ya? Kəl cha nga wawa'ar njir nəuwa nda pətlənya təkəra cha, nda shashiya nyi na mal ku tləmər Tlakəu. 15 Ya pətlənya nda nja mər ku jirikur kwa mbandə ndər shiləkə nda; Tlakə tsəu kwa mbandə nyi, macha mərtə cha səpəla'a tsəu, Tlakə kwa farbikə nyi. 16 Aka ənga ja, dəkəbiya ma səpəla'a kəhi nə kərnəhi, ana hya pətlənya ka kərnəhi ga hya uya mbəa. Pətlənya nə ndər mər sə tsa'atsa'a, gyalkur kwa, ya kwa mər sakəda. 17 Iliya, ndə cha wi namən tanyi, cha pətlənya na jiri tsa'anyata, ənda ngwa para da təɗə tya'a wa, ngə par tə ngyar təɗə fa makər na manyi. 18 Kəl ngə cha ɓəla pətlənya səkəu ənda para təɗa, ngə para təɗa, sə zwazwa tə tsa ga ɗa.