Bazhikur na Dunəya
4
Mi sənda gwa'atə hya kwa guhi ka pah ku pama kərnəhi ənga? A da huɓursə ɗimi nda kwa pah ku ɗufwa hi ngə tə gwa'atə ma? 2 Hya kwa gwa'a səu, ya a da hya kwa uya wa. Hya kwa tsa ndəu ana ndahuɗəvi, ya a da hya kwa uya sənda hyo chim wa. Hya kwa pah ana guhi, ya ba'a saka nga a da hya kwa uya wa, aka ana hya gədi tsa Hyel wa. 3 Mada na hya gədi ma'a, a da hya kwa uya wa, aka hyo gədi na jigadəma ɗimi ku ɗufwa hi, kəl sənda kwa nənyi məsəɗakəkur nə dza hi tanyi. 4 Njir kasali! A hya zəndə ənda mər bazhikur na dunəya ya, mər dawa na Hyel nda ma? Aka dəhə ndə nda kwa i mər bazhikur na dunəya a ɗa tə cha ka ndər mər dawa na Hyel. 5 Hyo la'a wi ɓwanya Hyel nda tsəfətə nji ku likatəkatə nda ngya tə ka səu ɓwa'atanyi ya? Nda tə na, “Shanguɗə nda Hyel tə fiya nya ta mən nda, kwa mər sələkəkur gagaɗa.” 6 Kəl ja, ɗanghali nda Hyel tə char mən ndiya tə dunamar ɗimikur ngə nya ta mən nga. Tang wi nda tsəfətə nji ku likatəkatə Hyel, “Hyel kwa guhi nji'inda kwa bu kərnənda, kəl ja, cha kwa char nyi ɗanghali nə nji'inda kwa tashiya kərnənda.”7 Aka əngə ja, nənyi ma kərnəhi nə Hyel. Hya təkə na sərtakəu, nacha tsəu cho hwi tsahi. 8 Shili ma ləhə dza Hyel, nacha tsəu cho ɗa ləhə dzən hi. Chinda ma kərnəhi ja njir mər səpəla'a, hya chinda ɗufwa hi, nahi njir kər mətləu. 9 Ləlla ma, hya mər sə'ingwa hya tiwi na sələm, gyaɗi kəhi cha sha ka tiwi, hirgyaɗi kəhi tsəu cha ɗaka sə'ingwa. 10 Tashiya ma kərnəhi mar Tlakəu ga cha har hi gi.
Mbakənyi Bikəu nə Ndəu
11 Ka zamə ɗa, ngwa hya da mba jwam ku dza kərnəhi wa. Aka ma ndə nda tə mba jwam nə zamə nyi, ndara cha mbakənyi bikəu, anə gadlagadla Hyel nda cha kwa mba. Ma ndə nda tə mbandzə nyi jwam nə gadlagadla tsəu, a da cha ndə nda kwa nəu sənda gadlagadla tə na wa, kəl nda ndə nda kwa səwandi. 12 Hyel ngə sənyi na gyalkur nə nənyi gadlagadla nə nji, kwa mər tə nda nəuma. Nacha ngə sənyi na gyalkur mbəɗandə mən tsa tah, ya nacha ngə tsəu na gyalkur nə kuɗənda mən. Aka əngə ja ya, nakə wa kə tatlər mərtə nyi nəuma nə kuvangha?
Ngwa Hya da Wovi wa
13 Ngatə ma ja nahi nji'inda kwa na, “Ənya ndara əzəkəu ea kwa təra kyaku vanya mələm, ea ki hənda fa tangnda na shafəli, eo fa'a zhar.” 14 A da hya kwa zəndə sənda kwa ɗa zəkə wa! Kwa zəndə hi pya hi ya, tang wi salpar cha nda ndə kwa la'a ənda cha kwa ɗəza, kəl ja, səkardzə kushiu a sa ti. 15 A kitə hyo kina na, “Ma Tlakə tə i, ga ngya mən na pi, eo mər sənənna ana səndannda.” 16 Kəl ja, hya kwa wovi ana həkər. Ya dəhə həkər kəhi nga bikə cha. 17 Aka əngə ja, dəhə ndə nda tə zəndə mər sənda mənakəu ya ngə a da cha mər wa, səpəla'a cha nənyi.