Kainau nə Njir Ibrani nja tə tsəfə nə dzuku njir nəu Kəristi inda njir Yahuda nda ku ɓwaɓwatər məndza'u. Ndər tsəfə na tə tsətə nyi fwal nə njir nəu ana chul ənda nda char jirikur kənda ənda Yesu Kəristi nacha ngə vəlvəlnya batəbatər ndə nda Hyel tə chabiya tə babal. Təkəra ənga cha ndəra a kəra sənda jiri tsa'a makərəu: (1) Yesu nacha ngə zhinyi nda Zər Hyel, nda tə dlədləɓətə kəriwa nda vəlvəl atsa Ada təwa ɓwaɓwatə nda cha səsə'uti. Wi ngə tə cha Zər Hyel, Yesu tə ɗa 'ual matsa njir mətakər nə Ɗəɗəmər Alkawal, ana chama i'i, ana Musa təkərnyi. (2) Hyel na kərnyi tə chabiya tə babal ənda Yesu nacha ngə fərist, nda 'ual a matsa fərist inda ku Ɗəɗəmər Alkawal. (3) Təwa Yesu ndə nda na jiri kwa uya mbəɗa tsa səpəla'a, ləvəra, ana tah; Yesu tsəu, nda Gau Fərist, kwa shili na dləuya nda jirijiri, nda sakanda njo mər nyi təwa hatəmachi na sərshishi aku lakur nəu Hyel nə njir Ibrani.

A təwa char ba'ada na jirikur nə alenya nji nda wawa'a ku labar njir Isra'ila (səlirma 11) ndər tsəfə tə nga nji'inda kwa kəratsən ənda nda ngya ku jirikur ba'a ya tə bəji batəbata, ana nda chitə lya nda tə Yesu, ana nda səsə'uti kala ɓwaɓwatə ana məndza'u nda kwa nau shili təkəra nda. Nja udiya kainau na ana ɓwanya nda kwa shili na dəma na təɗəhimi.