Kainau Bulus nə
Filimun
Usa
1
Hya'atə tsa Bulus, ndə nja fəu ku jarum a təkəra bəzə mafakə Yesu Kəristi, ana zamən mən Timtawus, a yada Filimun bazhi mər tlər kəea nda eo nyida, 2 ana kwamən mən Afiya ana Arkibus bazhi mər tləra, daɓə dəhə njir nəu inda kwa daɓədzə ku ki ngha.3 Papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi ngya tsa'a na hi.
Nyida ana Jirikur Filimun
4 Dəhə bəjir pətlənya ɗa, wa'atanyi ya kwa pətlənya ana usaku Hyel aka ka. 5 Aka kwa uya ya mafakə təkəra jirikur ngha aku Tlakə Yesu ana nyida nda ko cha nə dəhə nji'inda nə Hyel. 6 Gədi ɗa, nacha ngə daɓəkər kəmən kə'i kə ku jirikur kwa gwa'atə ko ngabiya mənakəkur nda mən nə ku daɓəkər ka Kəristi. 7 Zama, nyida nghə tə gwa'atə ɗa hirgyaɗi gagaɗa, ana tsəɗufəu. Aka ɗufwa nji'inda nə Hyel ɗa tə twas təwa ngha.
Gədi aka Onisimus
8 Aka ənga, madangə ku Kəristi kwa nau ya nənghə tsaubar ka mər sənda tsa'atsa'a, 9 dəhə ka ənga aka nyida nda yo nyida ngha, a ndiya ɗa tə vi ya gədi ngha. Naya Bulus ndə halhala, ya sakana ku jarum aka Yesu Kəristi. 10 Yo gədi nghə ka ngatə təhuɗə zər ɗa Onisimus, nda ya ɗa ka ada nyi ku Kəristi bəji nə ya ku jarum na. 11 Ɗakaɗa a sakəda nyi da nə nghə wa, kəl nəchanə ja, sər sakəda cha nə ma.
12 Jan yo ɓəlandə nyi yada ka, na cha nda dəhə ɗufwa ya tə cha. 13 A i tiya ya nda gəzəya nyi bəji nə ya ku jarum aka bəzə Mafakə Mənakə na, aka cha vala ɗa tə nya ngha. 14 Kəl ja, a da ya i ya mər madami a da na zəndəkur nghə wa. Tsa mənakəkur nghə da ba'a ɗa wi sər tuku, kəl nda sənda ko i.
15 Kustanyi nacha ngə tə gwa'atə hya təkə nə zər bəji kushəu, ka kə dləutsə nyi hya ngya ba'anawa. 16 A tsə'u cha mava nghə tanyi wa. A ndəɗə tə cha mava, aka kuvanghə ndər nəu cha nda njo nyida. Kwa nyida nyi ya gagaɗa, ya zəndətə ya ko ndiya ɗa nyida nyi wi kuvanghə ndəu ana ndə nda tə nənyi jiri nə Tlakəu.
17 Aka əngə ja, macha bazhi mər tlər ɗa ka, dləutsə nyi wi nda ko dləu ɗa. 18 Macha ndara vanya bikə da cha mərtə nghə ndara ko nəu nyi məl vanya səu, fəkər təkəra ya. 19 Naya Bulus ngə kwa tsəfə kainau nə na cha ya, yo kinda ngha. (A da ya kwa ndər təkəra ənda ka uya taɗər pi ku Kəristi təwa ɗa wa.) 20 Əja zamə ɗa, matikuɗi, mərtə ɗa mənakəkur na aka Tlakəu. Tsətə ɗa ɗufəu ku Kəristi.
21 A nənyi tə ya jiri ko mərtə sənda ya gədi, ndiya matsa ngə ma'a, nacha nga gwa'atə ya tsəfətə nghə kainau na. 22 Əsəkəu, yo i ka ɓatliya ɗa vi mihiɓi, aka yo fəkər təwa pətlənya kəhi Hyel kwa ɓəlandə ɗa shili da hi ɗəɗəwu.
Bulus tə Udiya na Usa
23 Abafaras, ndə nda ku jarum na ya aka Yesu Kəristi kwa usa ngha. 24 Əngə ma'a Markus, ana Aristakus ana Dimas ba'a Luka dəhə nda bazhi tlər ɗa inga.
25 Papa'akur Tlakə Yesu Kəristi ngya na shanguɗə kəhi dəhəu.