3 Təwa jirikur ngə məna dləukər ənda Hyel tə ɓatlə dunəya ana ɓwanya. Sənda njo la'atə biya ku sənda a njo la'a wa. 4 Təwa jirikur ngə Habila tə hatəmachi mənakə nə Hyel matsa nə Kayinu. Təwa ənga cha ɗa ndə tsa'atsa'a mar Hyel, ku bəji nda Hyel tə ngatə mənakə nacha ana hatəmachi nyi. Ya təwa jirikur ngə tsəutanyi kwa ndəra madangə a tətə cha.

5 Təwa jirikur ngə nja hətə Anuhu na pi, nacha gwa'atə a da cha ɓə na tə nənyi wa; a da nja uya nyi wa, aka Hyel na kərnyi ngə tə hətə nyi. Aka təvi nja hətə nyi nja na nacha ndə nda kwa nənyi hirgyaɗi nə Hyel cha. 6 Ma a jirikur da wa a ndə da kwa nau nənyi hirgyaɗi nə Hyel wa, aka dəhə ndə nda kwa yada cha tuku cha nənyi jiri ənda a da cha ya cho nənyi zhar nə nji'inda kwa gwa'a nyi tsa'anyata.

7 Təwa jirikur ngə Nuhu, ahir nda Hyel tə ɓwanya təkəra sənda a da nja la'a gwadagə wa, ana chamər ɗufəu cha ɗa na ləvər Hyel cha ɓatlətə param dəgal ka cha dləuya njir ki nyi. Təwa jirikur cha gwa'atə nja mərtə nyi nəuma nə njir dunəya, nacha tsəu cha ɗa ndər fa'aki nə ngya tsa'atsa'a nda njo uya təwa jirikur.

8 Nda nja nga Ibrahim, təwa jirikur ngə cha təra kyatə mbwa nda kwa nda ɗaka sər fa'aki nyi, madangə a da cho zəndə ba nda cho ma'i tə wa. 9 Təwa jirikur ngə cha liya ki tə hə'i alkawal wi mihiɓi tə hə'i nda a da nənyi wa; cha ngya ku madləɓa, ya əngə tanyi Ishaku ana Jakop nji'inda tə ɗa ka njir fa'aki alkawal nda kə'i cha. 10 Aka cha mər chulkə ngə na ngya ana fəkər ənda cho la'a mələm nda Hyel na kərnyi ngə tə səya hya cha, ya nacha ngə ndər ɓatlə ana həra.

11 Jirikur ngə tə gwa'atə Ibrahim tə uya zər, madangə haltə cha, ya Saratu tsəu mala kəla ya cha. Cha ɗa na jiri ənda Hyel kwa nyabiya alkawal nyi. 12 Aka ənga, təwa ndə zhang na, madangə wi tətənyi cha, jul nyi tə yatədza ɗang gagaɗa wi sasəlga kya huɗamələm ana wi məshishi'ua nya fa'a.

13 Dəhə nji'ina tə ɗana pi təwa jirikur ku bəji nda nda kuɗa. A da nda dləutsə sə'inda Hyel tə mər alkawal alkawal nyi wa, kəl ja, la'atə nda kwa shili naɗəu, a ngatə tə nda mənakə na la'a, nanda tsəu nda ɓwanya təkər tə babal ənda nanda mihiɓi nda, a da nda hyanjir hə'i tə dunəya wa. 14 Nji nda kwa na ənga kwa ndzam ənda nda kwa ɗana uya nəkənda na hə'i. 15 Macha kwa jiganda dəma təkəra mələm nda nda ngyar yahi cho nda ɗa nda kwa uya lakur ɓələu. 16 A təvəra ənga, nda fətə ɗufwa nda təkəra mələm nda ndiya mənakəu, nacha ngə huɗamələm, nacha gwa'atə Hyel do ngatə kuzhir na ənda nacha ngə Hyel kənda wa. Aka a ɓatliya tə cha mələm ka nda.

17 Təwa jirikur Ibrahim, ku bəji nda Hyel tə dzə nyi, cha hya'atə ka cho handa təmachi na Ishaku, zər nda Hyel tə mərtə nyi alkawal. 18 Madangə Hyel tə nar nyi “Təwa Ishaku ngə njo jiga nyandəla ka.” 19 Ibrahim tə jigadəma ənda Hyel kwa nau hya'andə ndə tətah. Təwa ba'ada məno nau na cha dləutsə Ishaku ku tah. 20 Təwa jirikur Ishaku tə səkə nyi papa'akur nə Jakop ana Isuwa təkəra ngya kənda biyama. 21 Təwa jirikur ngə Jakop, ku bəji nda cho tə ti, cha səkə nyi papa'akur nə kala nguli Yusufu, cha hətə nyi səli nə Hyel tə bəji nda cha kasətə kərnyi tə zəwa nyi. 22 Təwa jirikur Yusufu ku bəji nda kaɗə cha tah, cha ɓwanya təkəra biyar njir Isra'ila ku Masar, ngə cha nənda tsaubar təkəra ɗihi nyi.

23 Təwa jirikur amanya Musa tə ɗəwanda nyi nə hya makərəu ku bəji nda nja yah nyi, aka nda la'a nyi gumaguma, ya a da nda ngatə ləvər gadlagadla təl wa.

24 Təwa jirikur ngə Musa nda cha həa, a da cha i nja na nacha zər kwar fir'auna cha wa. 25 Cha tabiya cha sa ɓwaɓwatəu tsa'a na nji'inda nə Hyel, atsa cho ngatə məsəɗakəkur səpəla'a nə bəji kushiu. 26 Cha hətə həyatəvi nda njo mərtə nyi ka Kəristi sə dəgal cha nda na səli matsa gəna nda vu Masar, cha fətə li tə wazəba nda biyama. 27 Təwa jirikur cha biya ku Masar, a da cha ngatə ləvər huɗətla təl wa; cha səsəutə aka cha la'a ndə nda pa'a njo la'a. 28 Ana jirikur cha ghəya Ladər Dləgəlnda, ətsəu cha uchitə mashi tə nyaki tsa chama kuɗə nguli tangərma da kuɗənda nguli njir Isra'ila.

29 Ana jirikur njir Isra'ila tə tərabiya ku Fa'a Dəzəu wi ngətə ndə kwa ma'i tə hə'i ul'ula; kəl ja, aku bəji nda njir Masar tə gwa'a mər ənga nda sa tə fa'a.

30 Təwa jirikur ngə ɓangtili mələm Jariko tə dla ahir nda njir Isra'ila tə ɓa mələm nda hanyi məɗəfa.

31 Təwa jirikur ngə Rahap zawar nda tə mbəɗa, aka cha dləutsə njir gwa'a hya mələm, aka ənga, a da nja tsəya nyi ka nji kəla ngatə ndər wa.

32 Mi yo kina na səka? A da ya na bəji ka yo ɓwanya təkəra Gidiyon, Barak, Samson, Jafta, Dauda, Sama'ila ba'a njir mətakər wa. 33 Təwa jirikur nda kwasə təlkur i, nda mər tlər tsa'atsa'a, ya ngə nda uya sənda nja mər alkawal alkawalnyi nda. Nda haɗənda nya ləvari i'i, 34 nda chiya hu'u gəɗəgəɗa, ga mbəɗə ku nya katsakər. Nanda nda təutətəutəkur kənda tə sha ka dunama. Ana nji'inda tə ɗana dunama ku pah, nda gədlənda ləvaləva nə hə'i pampam. 35 Mahi'i tə dləutsə nji kuɗəkuɗə kənda nda nja hya'andə ku hwa. Nja nənyi ɓwaɓwatə nə alenya nji ngə nda ngyar dləukər na dimukur nda njo nənda, ga nda uya ngya nda mənakə ahir nja hya'andə nda ku hwa. 36 Alenya nji'inda tə sa dəga ana həyatəvi, alenya nji tsəu nja mbiya nda na dzəra lyang ga fəu nda ku jarum. 37 Nja vəvakənda nda na hangu, nja tlaunda məɗatsəu na zaratu, nja kuɗənda nda na katsakər. Nda kwa zhuli na chi kətəng ana nə kua dzən nda. Nda ngya ku tari, nja izza nda, ana nja ɗa məndza'u na nda. 38 A dunəya da ki ka nda kwa ngya kwa wa. Nda kwa zhuli tə takəu ana dəgəl i. Nda kwa hanyi ku tləl ana ka'u.

39 Dəhə nji ingə Hyel tə ngatə mənakə na jirikur kənda, kəl ja, dəhə ka ənga a mada ndə zhang da dləutsə alkawal nda wa. 40 Hyel tə ɓatliya sə mənakə ka mən. Ya kəl tsa'a namən ngə cho nyabiyadza.