8 Tangərma cha na, “Hatəmachi ana lə ga'a, lə ga'a nə sə ngingya ana lə ga'a ka səpəla'a a da ko gwa'a wa, ya a do nənghə hirgyaɗi wa.” (Madangə gadlagadla kwa gwa'a nja mər nda). 9 Ngə cha na, “Janə ya, ya shili ka ya mər sənda ko i.” Cha far na tangərmanyi ka ga cha kukuya mətləkunyi. 10 Aka Yesu Kəristi mər tə sənda Hyel kwa i, a mərtə mən tə nji ka nji karti təwa hatəmachi na dza kərnyi zhaka zhang tanyi.

11 Ba'aka saka nga fərist kwa ta'i ka mər tlər nyi nə həsəli; cha kwa hatəmachi inda pa'a kwa hənda səpəla'a atə vanyi atə vanyi. 12 Kəl ja, ku bəji nda Kəristi tə handa təmachi zhaka zhang tanyi ka səpəla'a, cha ngyata nyi tə chisəma Hyel. 13 Fwatə tə bəji nda cho səka bəji nda njo mərtə njir dawa nyi ka təmbəl pə hya cha, 14 aka təwa hatəmachi zhang cha mərtə nji'inda nja mərtə ka nji karti tsa'atsa'a, ba'anawa.

15 Shanguɗə Karti ma'a char mən tə sə təkəra sə'inga. Tangərma cha na:

18 Ya ma nja farbikə tsəu hatəmachi ka səpəla'a da wa. 19 Aka əngə ja ka zama, manə kwa nau mən gwa ku Vi nda Ndiya na Kartikur gangkər təwa mashi Yesu, 20 təwa taɗər laku nda na pi nda nja mbəɗiya bang nə mən təwa miɗi nda, nacha ngə dza cha. 21 Ya manə uyatə mən dəgalər gau fərist təkəra ki Hyel 22 Əja, məna shili ləhə dza Hyel ana ta zhang ku təkəɗər jirikur. Ana ɗufwa mən nda nja dzəvəya ga chinda tsa jigadəmar səpəla'a ana dza mən nda nja chinda na ɓiti ɗyaɗyanghəu. 23 Mən gəzəya fəkər nə məno bəzə nə ɓaɓaləu, aka nacha nda tə mər alkawal ndər jiri cha. 24 Kəl məna ɓəla kərnəmən ənda məno tsəkutə kərnəmən ka məna char nyida ana mər tlər mənakəkur. 25 Ngwa məna da ngyar daɓədzə kəmən wi nda alenya nji tə tsəl na mər wa, kəl ja, mən tsətə nyi ɗufəu nə kərnəmən, məna tsakətə mər ənga wi nə hyo la'a ənda pəchi ngə ɗatə ləhəu.

26 Ma məna biyama na mər səpəla'a ana ikur kəmən, ahir a zəndətə mən jiri, tsəu sakədar hatəmachi ka səpəla'a da wa, 27 kəl nda nəuma nda na ləvəra ba'a hu'u nda ndiya na kwakwaɗəkur nda kwa nginda njir dawa Hyel. 28 Kala ndə nda tə ngyar gadlagadla Musa kwa tah a da na təhuɗə wa, ma nji mətlə ndara makər tə dləukəri. 29 Hyo har ya a ɓwaɓwatə da kwa ndiya ɗa 'ual nə ndə nda tə həyatə Zər Hyel, tə mərtə mashi alkawal nda tə chinda mən dyadyaɓəu, ndə nda tə ngəngəlnda Shanguɗə Karti ma? 30 Aka a zəndətə mən ənda Hyel tə na, “Kisəkur na'a nga; na ya kwa kya,” ana tsəu, “Tlakə kwa mərtə nyi nəuma nə nənyi na nji.” 31 Sər ləvər cha gagaɗa ndə gwa ku cha Hyel nda na pi.

32 Hya ɗənghatə hanyi inga təra yahi ahir nda hya dləutsə vimbəlmbəla, ku bəji nda hya ta'i ta'iu ku dzəa ana ɓwaɓwatə nda manə hi. 33 Alenya bəji nja kwa ngəl hi ana ɗa məndza'u nahi tə babal; alenya bəji tsəu hya kwa ta'i kə'i nji'inda tə sa chulkə ngə na ɓwaɓwatəu. 34 A ngatə təhi təhuɗər nji'inda ku jarum, ətsəu a mərtə hi hirgyaɗi nda nja dləuya kar kəhi, aka a zəndətə hi nahi təkərnəhi ənda hyo ɗana uya sə'inda ndiya mənakə kwa ngya ba'anawa.

35 Aka əngə ja, ngwa hya da vakənda dunamar fəkər nda hi nə wa; aka zhar nyi kwa ɗa bwaɓu. 36 A kiti hya səsəutə aka ma bəji nda hya mərtə sənda Hyel kwa i, hyo dləutsə sənda cha hətə salkur salkurnyi.

37 Aka ku bəji kushi tanyi,

39 Kəl ja, a da mən ku huɗa nji'inda tə ɓəl yahi ga kuɗə wa, kəl nda ku huɗa nji'inda tə nənyi jiri ga mbəɗa.