Yesu Ndəɗətə Musa
3
Aka əngə ja ka zama inda karti, nahi nda nə Hyel, nda nja nga ka mbaɗər huɗamələm, hya fətə jigadəma kəhi təkəra Yesu nda nja səa, nda gau fərist nə jirikur nda məna nənyi jiri. 2 Cha ɗa na jiri nə ndə nda tə tabiya nyi, wi nda Musa tə ɗa na jiri nə Hyel ku pama njir Isra'ila. 3 Yesu tə ɗa na səli ndiya matsa Musa, wi nda ndər hər ki tə ɗa na səli matsa kərnya ki. 4 Aka kala ki ndə ngə tə həra, kəl ja, Hyel ngə ndə nda tə hər kala səu. 5 Musa tə ɗa na jiri wi mava ku pama njir Isra'ila nda njikə Hyel, kwa ɓwanya təkəra sənda kwa ɗa biyama. 6 Kəl ja, Kəristi ndər jiri, wi zər nda təkəra njir nəu Hyel. Ya namən ngə nənyawa nji, ma məna ta'i təkəra tsəɗufəu ana fəkər ngə məno wovi nə nga.Təɗəhimi təkəra Tar Nənyi Jiri:
7 Əngə ja, wi nda Shanguɗə Karti tə na:
“Ənya, ma hya ngatə kuraka cha,
8 ngwa hya da ɗa ka nji ɓaɓalkər wa,
wi nda hya mər ku mwali,
ku bəjir dzə kwa takəu nda wa,
9 tangnda jival kəhi tə dzə ɗa ga nda la'a nda mi yo məra,
madangə la'atə nda sənda ya mər ku fa fwaɗəkumənyi.
10 Nacha gwa'atə ya mər huɗətla na nda na zamin,
ngə ya na, ‘Mada sakamani ɗufwa nda kwa tyati,
ya a da nda zəndə laku ɗa wa.’
11 Ya ɓwanya na səmfəla ku huɗətla ɗa.
‘A da nda kwa gwa ku ɓəlsar ɗa pa'a wa.’ ”
12 Gəla ma ja, ka zama, ngwa mada ndə zhang ku pama hi da ɗana səpəla'a, ndara ɗufəu nə tar nənyi jiri, nda kwa gwa'atə cha kwa sharnyi dagəryi nə Hyel nda na pi wa.
13 Kəl ja, hya tsətə nyi ɗufəu nə kərnəhi kala pəchi, kəda ga cha ɗa njo nga nyi ənya, tsa səpəla'a da shandənyi kər nə mada zhang ku huɗahi cha mərtə ɗufwa hi ɓaɓaləu. 14 Aka ma məna ɗa na jiri tsa'a ku udiya, məno nənyi jiri nə Hyel tsa'atsa'a wi nda məna təka nənyi jiri nda, məno uya dəhə sənda nə Kəristi. 15 Wi nda nja na,
“Ənya, ma hya ngatə kuraka cha,
ngwa hya da mərtə ɗufwa hi
ɓaɓal wi nda hya mər
ku mwali nda wa.”
16 Nanda ka wa ingə tə ngatə kuraka cha ga tlə mwalya? A da nanda nda Musa tə həbiya ku hə'i Masar nda ngə ma? 17 Ya ana wa inda Hyel tə mər huɗətla fa fwaɗkumnya? A da na nji'inda tə mər səpəla'a, nji'inda dza nda tə ngya ku takə ma? 18 Ya ana wa inda Hyel tə səmfəla ənda a da nda kwa gwa ku ɓəlsar nyi macha a nanda inda tə ngyar nəu nya cha wa? 19 Aka ənga, a la'atə mən ənda a da nda nau gwa ku ɓəlsar nyi wa, aka tar nənyi jiri.