Səhimi da Ɓwanya Hyel
2
Tuku məna gəziya jiri nda məna ngatə ɓaɓaləu, atsa məna da tyatə tsa laku. 2 Mafakə nda nja nə mən təwa chama i'i ngya tə vəlvələu, ya kala ndə nda tə tyatinda ndara cha ngyar məra, kwa dləutsə wazəba nyi tsa'atsa'a. 3 Nacha gwa'atə ma məna ngyar dləuya dəgal na, a da məno uya mbəɗa wa. Dləuya nda Tlakə Yesu təkərnyi tə bəzəya tangərma, ya nji'inda tə ngatə natə ənda vəlvələu. 4 Hyel tsəu tə chabiya dləuya nyi təwa sər muniya, sər məngəl ana səshinshin pampaməu, ana ga'ar Shanguɗə Karti nda nja təkə wi nda cha kwa i.Nja Mərtə Yesu wi ka Zamə Nyi
5 A da nə Chama ingə nja tsau bəji nə kwa shili nə məno ɓwanya təkər nə wa. 6 Kəl ja, vanya mbwa da nda vanya ndə tə ɓwanya təkəri:
“Mi sənda ndə təkəri
nda tsa'aka ko jigadəma təkəra cha,
ndara zər ndə nda ko ɗəngha nacha?
7 Ka mərtə nyi kushi matsa Chama i'i
ka hətə nyi səli ana dəgalkur
8 ya ngə ka fiya dəhə səu da kiɗa cha.”
Aku fiya nda Hyel tə fiya dəhə səu da kiɗa mən, a da cha ngyar vanya sə nda a da namən ngo gəla wa, madangə sakana a da məno la'a wa. 9 Kəl ja, Yesu ngə ndə nda məno la'a nda nja mərtə nyi kushi matsa chama i'i, sakana mbanda nyi tənji kər nə səli ana nə dəgalkur aka sa tə cha ɓwaɓwatər tah, aka təwa ɗanghali Hyel Yesu tə tah ka səpəla'a dəhə nji.
10 Hyel, nda ka cha ana təwa nyi nja ɓatlə dəhə səu, tə i cha shili na njir nəu ɗang shili ku səli. Ya tsa'atsa'a tanyi cha mərtə Yesu gau kəla bikəu, təwa ɓwaɓwatə nda cha sa, nda tsa'atsa'a ka shili na nda da dləuya kənda. 11 Aka nacha nda mərtə nda karti ana nanda nda nja mərtə karti nguli Ada zhang nda, aka ənga Yesu do ngatə kuzhi tsa nga nda zamə nyi wa. 12 Cha na,
Yo bəzə tləm nghə nə ka zamə ɗa;
a mar daɓədzər njir nəu yo na miya fal nə ngha.
13 Ana tsəu cha na,
“Yo nənyi jiri.”
Əsəkəu cha na,
“Janə ya ka ngulisha'a nda Hyel tə na'a.”
14 Manda ngulisha'a inda ku kum na mashi nda, nacha tsəu cha ɗa na dzə wi nəkənda aka təwa tə nyi ga cha tsəya sərtakəu, nda na gyalkur tah ku cha cha. 15 Kəl ja, Yesu tə mbəɗandə dəhə nji'inda tə ngya ku mavakur təwa ləvər nda nda kwa ləvər tah. 16 Ya vəlvəl a da kə'i chama ngə cha vala wa, kəl nda nyandəla Ibrahim. 17 Aka ənga tuku kəl cha ɗa wi ka zamə nyi aku dəhə səu, aka ga cha ɗa ka gau fərist ndana təhuɗəu ana jiri təwa tlər nda cho mər nə Hyel, ga cha ɗa ka sər hatəmachi nda kwa hənda bikə təkəra nji. 18 Aka nacha təkərnyi cha sa ɓwaɓwatəu ku bəji nda nja dzə nyi ti, ya cho nau vala nji'inda nja dza.