3 A usaku tə ya Hyel nə ya kwa mər tlər nənyi ana ta zhang na, wi nda tə ka jival ɗa tə ɗaka məra, wa'atanyi ya kwa ɗənghatə nghə ku pətlənya ɗa. 4 Ma ya ɗənghatə nda ka tiwi na sələm, kəl ya kwa chim ya la'a ngha ga ya nyi na hirgyaɗi. 5 Kwa ɗənghatə ya jirikur jiri ngha, chul jirikur nda aji nghə Loyis ana ama nghə Yunis ni, zəndətə ya təkəɗəu, ma'a nakə a da kə ni. 6 Aka əngə ja, ya kwa ɗənghatə nghə ga'ar Hyel nda cha nənghə bəji nda ya fəkə nghə cha ya tə nda, ka ghəzandzənyi hu'u. 7 Aka Hyel da nə mən shanguɗə nə ləvər wa, kəl nda shanguɗə nə gyalkur, nyida, ana nə ɓu kərnəmən.

8 Aka əngə ja, ngwa ka ngatə kuzhi tsa ɓwanya təkəra Tlakən mən, ndara tsa ya naya nda ku jarum ka Kəristi wa, kəl nda ka ɗa ku huɗa njir sa ɓwaɓwatə tə nyar Mafakə Mənakəu, wi nda Hyel tə nə mən dunamar məra. 9 Nacha ngə tə dləuya mən ga nga mən, ka ga məna ɗa ka nji karti, a da ka tlər kəmən wa. Kəl ja, ka sənda ku jigadəma nyi, ana ɗanghali nyi, cha dləuya mən təwa Kəristi Yesu təvi nja mər dunəya. 10 Ya sakana chabiya mən tə cha təwa shilir Ndər Dləuya mən Kəristi Yesu, nda tə hənda tah, ga chabiya mən lakur pi nda ba'anawa tə babal, təwa Mafakə Mənakəu. 11 Ya ngə Hyel tə tabiya ɗa ka ga ya ɗa ka ndər bəzə mafakəu, changhabal, ana ndər dlədləɓə Mafakə Mənakə nə nji. 12 Nacha na gwa'atə yo sa ɓwaɓwatə ku jarum, kəl ja, dəhə ka əngə a da yo ngatə kuzhi wa, aka zəndətə ya ndə nda ya nənyi jiri. Tsau nyi tə ya dəhə səu ku cha cha, ya zəndətə ya cho nau ɓəlati, ba'a tə pəchi nda Kəristi kwa ɓəla shili.

13 Ka gəzəya ɓwanya jiri ngə ya dlədləɓətə nghə nga, cha ɗa ka ba'ada nə ngha, ana ka ngya ku jirikur ana nyida nda ku Kəristi Yesu. 14 Ka ɓəla jiri durdur ngə Hyel tə tsau nghə təwa gyalkur Shanguɗə Karti ngə ku ɗufwa mən nga.

15 Zəndətə kə madawa tə hə'i Asiya ngya ɗa ti, ma'a ka Fijelus na Hamajenis.

16 Ga Tlakə ngatə təhuɗər Onisforus ana njir ki nyi, aka zhaka ɗang tanyi cho usa ɗa kwa fətə ɗa ɗufəu. A da cha ngatə kuzhi na ənda ya ku jarum wa, 17 kəl ja, nda cha dzəva vu Roma, cha gwa'a ɗa taɓə ɓiti ku pəla kəl nda cha nda uya ɗa. 18 Ga Tlaka ngatə təhuɗə nyi ɗəmja tə pəchi nda Kəristi kwa ɓəla shili ti. Kərnghə zəndətə chul vala ɗa nda cha vala ɗa vu Afisa.