7
Manda mərtə mən tənji alkawal dəhə sə'ingə ja ka bazhi ɗa nda yo nyida, mən chinda kərnəmən məna ɗa chichinyi tsa dəhə sənda kwa mərtə dza mən ndara shanguɗə kəmən dyadyaɓəu, mən nyabiya kartikur kəmən təwa ləvər Hyel.Hirgyaɗi Bulus
2 Char ea ma ənda kwa nyida ea hi, a ea zandə nyi sə nə madawa wa, ana ea da vangula nə madawa wa, ya ana ea ɗiya madawa wa. 3 A da bikə ngə yo mba təkəra hi ma yo na əngə wa, wi nda a wurtə ya nar hi, eo nyida hi gagaɗa, nda mada eo tah ndara eo mbə kə'i hi. 4 A dləukərtə ya nahi gagaɗa, ya yo wovi na hi, aku dəhə ɓwaɓwatə kəea hya tsətə ea ɗufəu, hirgyaɗi ɗa a ɓəlinyi da wa.
5 Aka nda ea shili Makidoniya ana ea uya ɓələsar wa, mada a bar ea sha kəl ɓwaɓwatəu, a biya janə kəpala ka alenya nji, ku ɗufwa ea tsəu janə ləvəra.a 6 Kəl ja, Hyel nda kwa fəɗufəu nə nji'inda ɗufwa nda tsəya dza, tə fətə ea ɗufəu na shilir Titus. 7 A da shili nyi tanyi ngə tə fətə ea ɗufəu wa, ma'a mafakə nda cha shili nə ənda hya tsətə nyi ɗufəu. Nar ea tə cha ənda hyo i la'a ɗa gagaɗa, ana huɗətla kəhi gagaɗa, ana ənda hya ɗəngha ɗa, nga tsakətə ɗa hirgyaɗi matsa nda parang.
8 Mada kainau nda ya tsəfətə hi nda tə tliya huɗahi a da yo ɗəngha wa, madangə a ɗəngha təya nda ya ngatə huɗahi tlati, kəl ja, nə zər bəji kushə tanyi. 9 Kəl nda ja, sakana yo ngatə hirgyaɗi, a da ka ya gwa'atə huɗa hya tla wa, kəl nda ka huɗətla kəhi tə gwa'atə hya shar ngya kəhi, aka mərtə hi huɗətla wi nda Hyel kwa i, aka ənga na ea mərtə hi bikə wa. 10 Aka huɗətla nda Hyel kwa i kwa gwa'atə ndə kwa sha shili da Hyel nda kwa shili na mbəɗa, ya a da kwa shili na macha naya zəndə ya wa, kəl ja, huɗətla nə dunəya kwa shili na tah. 11 Ndzam ma sənda huɗətla nda Hyel kwa i tə yiya kuhi. Cha gwa'atə tlər tsa'anyata, ana chim ka həbiya kərnəhi ku bikəu, cha gwa'atə huɗətla, cha gwa'atə ləvəra, cha gwa'atə chima, cha gwa'atə mbadzəa, a ɓatliya təhi hya la'a nja ɓu nji tsa'atsa'a. A char tə hi ənda a bikə da tsa hi ku dəhə sə'ingə wa. 12 Aka ənga, a da ya tsəfə kainau nda ka ndə nda mər bikəu, ndara ndə nda nja mərtə nyi bikə wa, a təvəra ənga ya tsəfə ga ya char hi mar Hyel ənda kwa nyida ea hi gagaɗa. 13 Nacha ngə sənda tsətə ea ɗufəu.
A da tsəɗufəu tanyi wa, ba'aka ənga ea kwa mər hirgyaɗi gagaɗa aka chul hirgyaɗi nda Titus ni, aka dəhə hya vala ku pibiya ɗufwa cha. 14 Aka dəkar nyi təya ənda yo wovi na hi, ya a da hya na'a kuzhi wa. Jiri tanyi ea dəkə nə hi, ya əngə tanyi wovi kəea nə Titus tə ɗa jiri. 15 Nyida nda Titus kwa nyida hi kwa tsaka ma dəhə sakanda cha ɗənghatə ənda hya nəu nyacha, ga dləutsə nyi na səli gagaɗa. 16 Yo ngatə hirgyaɗi sakana aka dləukərtə ya nahi gagaɗa.