Vala aka Njir Nəuwa
16
Sakan ja, a təkəra tsəm sə ka njir nəuwa, hya mər wi nda ya nar nyi nə njir nəu Hyel inda vu Galati. 2 Pəshir tangərmar hanyi nə kala sukəu, madawa həbiya vanyi sə ku kwaba nda cho uya cha fiya, tsa'aka ma ya shili a tsə'u njo ngya ka tsəm sə səkə wa. 3 Ma ya shili, yo daɓiya nji'inda hya ɗəmtsə na tsəfətsəfər kainau, nda kwa char ənda a dləukərtə nji nanda, ka nda təra na ga'a kəhi yi Urshalima. 4 Macha tsa'atsa'a tanyi na'a tsəu ya ma'i, yau ba'a nda ləbiya ɗa.Gədi
5 Ma ya yi Makidoniya, yo shili da hi, aka tahə Makidoniya yo ma'i. 6 Kustanyi yo səkardzə kushə kə'i hi, ndara tsəu mən həbiya vuya, ga hya nau vala ɗa tsa'a yatə mbwa nda yo gwa'a ma'i ti. 7 A da yo i ya la'a hi sakanə tanyi ba'a tərabiya wa, chim ɗa ya səkardzə ka hi, ma Tlaka i. 8 Kəl ja, yo ta'i hi Afisa, kəl pəchir Pentikos, 9 aka a mbəɗiya ɗa tənji laku bang ka ya mər tlər mənakəu, madangə njir dawa ɗa ɗanghəu.
10 Ma Timtawus tə shili ngwa hya da tlənda shanguɗa cha wa, aka tlər Tlakə ngə cho məra tang wi nda yo məra. 11 Ngwa mada ndə zhang da ngyar dləu nyi wa, hya səu nyi ku laku na piyarɗufəu ga cha ɓəl shili da ya, yo səkə nyi nanda ka alenya njir nəuwa.
12 A təkəra zamən mən Apolos, a gədi nyi təya tsa'anyata cha yi da hi ka alenya zama, kəl nda a da cho i ma'i sakan wa, kəl ja, cho tsəu yi macha uya laku.
13 Ngya ma na ɓəla, hya ta'i na jiri ku jirikur, hya ɗa na tsəɗufəu, hya ɗa na dunama. 14 Hya mər dəhə sə ku nyida.
15 A zəndətə hi ənda njir ki Istifanus ngə tangərmar nji'inda dləutsə Yesu vu Akaya, ya a nənyi tə nda kərnənda nə mər tlər nə nji'inda nə Hyel. Yo gədi hi ja ka zama, 16 hya nənyi kərnəhi nə chul nji wi inga, nji'inda kwa daɓəkər ku mər tləra, ya kwa mər nda tlər nda. 17 Ngatə təya məsəɗakə na shilir ka Istifanus, Fartunatus ana Akaikus, aka shili kənda hənda tə chim nda yo chim ya la'a hi. 18 A tsətə ɗa tə nda ɗufəu tang wi nda nda tsətə hi, tuku hya la'a səli kənda.
Bulus tə Udiya na Usa
19 Njir nəu nda tə hə'i Asiya kwa usa hi. Akila na Bəriskila kwa usa hi 'ual'ual ku Tlakəu, əngə njir nəu inda kwa daɓədzə ku ki kənda. 20 Dəhə ka zama inda tangna kwa usa hi. Hya usar kərnəhi na gaɓədzə karti.
21 Naya Bulus nə tə tsəfə usa inə na cha ya.
22 Shi'u ngya təkəra dəhə ndə nda pa'a nda kwa nyida Tlakəu. Maki Tlakəu shili!
23 Papa'akur nə Tlakə Yesu ngya tsa kə'i hi.
24 Nyida ɗa nə hi dəhə ku Kəristi Yesu. Aɗəmja.