3 A nə hi təya sənda ndəɗə na sakəda ana sənda nja na'a, ənda Kəristi tə tah aka səpəla'a kəmən wi nda likatəkatə tə na, 4 ənda nja haɗəyanyi, cha hya'atə ku hu pəshir hanyi makərkunyi, wi nda likatəkatə tə na, 5 ana ənda cha chabiyadzə nə Kefas ana nə kwabəmətlə inda. 6 Ahir nga, cha chabiyadzə nə njir nəu ndəya gharəu tufu atə bəji zhang, tsə'u tanyi badəgal nji'inə na pi ba'a sakana, kəl ja, alenyi kuɗəti. 7 Ngə cha chabiyanyi dzə nə Yakubu ana dəhə kə'i changhabal, 8 ana atə udiya nyi, cha chabiyadzə na'a tsəu, naya nda nja yah tə bəji nda pa'a da ɗa.

9 Aka naya ngə kushə ku pama kə'i changhabal, a da ki ma'a nja nga ɗa changhabal wa, aka a nənyi təya ɓwaɓwatə nə njir nəu Hyel. 10 Kəl ja, ɗanghali Hyel nga gwa'atə ya ɗa wi nə ya na, ya ɗanghali nda cha char ɗa da ɓwa'atanyi wa. Aka a mər təya tlər ndiya nda dəhəu, kəl ja, a da naya wa, kəl nda ɗanghali Hyel nda tsa'a naya. 11 Nda naya, ndara nanda, nənə ngə sənda eo bəza, ya nacha ngə sənda hya nənyi jiri.

12 Macha njo bəzə ənda nja hya'andə Kəristi ku hu ya, mangə alenya nji kwa na a hya'atər nji kuɗəkuɗə da wa? 13 Macha a hya'atər nji kuɗəkuɗə da wa, a Kəristi da hya'atə ku hu ndani wa. 14 Ya macha Kəristi da hya'atə wa, ɓwa'atanyi mafakə nda ea bəza, əngə tanyi ma'a jirikur kəhi tsəu. 15 Matsa ngə ma'a, eo ɗa ka njir tla gəzhi nyandəla Hyel, aka ea ɓwanya təkəra cha ənda cha hya'andə Kəristi ku hwa, ya a da cha hya'andə nyi wa, macha vəlvəl ngə a hya'atər nji kuɗəkuɗə da wa. 16 Aka macha a hya'atər nji kuɗəkuɗə da wa, a da nja hya'andə Kəristi ku hu ndani wa. 17 Ya macha a da nja hya'andə Kəristi ku hu wa, a sakədar jirikur kəhi da wa, ya tsə'uta hi ku səpəla'a kəhi. 18 Macha ənga, nji'inda kuɗə ku nənyi jiri nə Kəristi sati. 19 Macha kəl ka ngyar dunəya tanyi ngə fəkər kəmən da Kəristi, kwa kina nji ngatə təhuɗə kəmən matsa dəhə nji.

20 Kəl ja, jiri a hya'andə tənji Kəristi ku hwa, yar tangərma ku huɗa nji'inda kuɗa. 21 Mangə təwa ndə ngə tah tə səgwa ku dunəya, əngə tanyi tsəu hya'atər nji kuɗəkuɗə ku hu təwa ndəu. 22 Wi nda dəhə nja kuɗə ku Adamu, əngə tsəu dəhə nji tə ɗa na pi ku Kəristi. 23 Njo hya'andə dəhə nji ku hwa, tangərma Kəristi, ana macha da shili, njo hya'andə nji'inda nənyi. 24 Ahir nga batəatər bəji kwa shili, ma cha nənyi təlkur nə Hyel Ada, ahir cha wazənda dəhə gyalkur ana dunamar nji təltəl. 25 Aka tuku cho səm təlkur kəl nacha fəu njir dawanyi da kiɗa hya cha. 26 Batəbatər ndər dawa nda njo tsəya, nacha ngə tah. 27 Aka Likatəkatə tə na, “Hyel tə fəu dəhə sə da kiɗa hya cha.” Ma nja na “Dəhə səu,” da kiɗa cha, a da char dəhə ka Hyel na kərnyi nda tə nənyi gyalkur nə Kəristi wa. 28 Ahir cha mər ənga, kəl Zər təkərnyi kwa ɗa da kiɗa Hyel nda fiya dəhə sə da kiɗa cha, ga Hyel ɗa ka dəhə səu.

29 Sakan ja, macha a hya'atər nji kuɗəkuɗə da wa, kami njo mər baɓtisma ka nji kuɗəkuɗa? Macha a da njo hya'andə nji kuɗəkuɗə pa'a wa ya, mya gwa'atə njo mər baɓtisma nə nji aka nda? 30 Ya kami eo fə kərnəea ku təmachi kala bəja? 31 Jiri ka zama, ku nya tə ya kala pəchi, tang wi nda yo mər hirgyaɗi təkəra hi ku Kəristi Yesu, Tlakən mən. 32 Mi zhar nda ya uya ku nda ya pa na sərshishi pəla'a vu Afisa nda? Macha a nji kuɗəkuɗə do hya'atə wa, “A mən səm mən sa, aka əzəkəu məno kuɗa.” 33 Ngwa nji da shandə hi kər wa, ngya na nji pəla'a kwa səwandə ngyar mənakəkur. 34 Hya jigadəma təkəra sənda tsa'atsa'a, hya ngyar mər səpəla'a, aka alenya nji da ku pama hi nda pa'a kwa zəndə Hyel, ya na ənga ga ya nə hi kuzhi.

35 Vanya ndə kwa nau jawa, Aman ngə njo hya'andə nji kuɗəkuɗa? Ana chul dzə manə nda kwa biya? 36 Ndə kəkəng! A sənda ka tləkəya do tsə wa, kəl nacha tah. 37 Ya a da sənda ka tləka ngə təkəɗər sənda kwa tsə wa, kəl ja, chuli tanyi nga, nda nə uhi nda vanya chuli paməu. 38 Kəl ja, Hyel kwa nənyi dzə wi nda cha ɓatliya, kala chuli na chul ngyakəngya nyi. 39 A dəhə kumər dzə da sə zhang wa, nji na chul nəkənda, sərshishi na chul nəkənda, eakə na chul nəkənda, kalfi tsəu na chul nəkənda. 40 Əngə tanyi tsəu, dzər huɗamələm, ana dzər dunəya, kəl ja, səlir huɗamələm pam matsa nə dunəya. 41 Səlir pəchi paməu, hya ka sasəlga tsəu paməu, ya mada sasəlga ma'a pampam ənda nda kwa mbəla.

42 Əngə tanyi na hya'atər nji kuɗəkuɗa, dzə nda nja tləkəya kwa yiɗa, kəl ja, cho hya'atə na nda kwa ngya ba'anawa. 43 Njo tləka na tar səli, njo hya'andə na səli, njo tləka ku təutətəutəkur njo hya'andə na gyalkur. 44 Njo tləka ku ndəkurndəu, njo hya'andə na dzə nə shanguɗəu.

Macha dzə nə ndəkurndə da, dzə nə shanguɗə da tsəu. 45 Əngə cha tsəftsənyi, “Tangərmar Adamu tə ɗa ndə nda na pi,” kəl ja, batəbatər Adamu tə ɗa na shanguɗə nda kwa shili na pi. 46 A da shanguɗə ngə tə ghəya shili wa, kəl nda ndəkurndəu, ahir nga shanguɗəu. 47 Ndə nda tangərma nə hə'i cha hya'atə ku bərbər, mətləkunya ndə tsəu hya'atə kya huɗamələm cha. 48 Ənda ndə nda nə hə'i, əngə tanyi nji'inda nə hə'i, ana ənda ndə nda səya kya huɗamələm, əngə tanyi nji'inda nə huɗamələm. 49 Tang wi ngə mən pabiya da ndər dunəya, əngə tanyi tsəu məno pabiya da ndər huɗamələm.

50 Yo nar hi ka zama, a kum na mashi da kwa uya gwa ku təlkur Hyel wa, ya a sənda kwa yiɗa da kwa fa'aki sənda pa'a kwa yiɗa wa. 51 Səya ma himi ngwa ya par hi sər məngəl, a da dəhə məno kuɗə wa, kəl ja, njo shabiya mən dəhəu, 52 aku bəji kushəu, wi məchi li, a tə bəjir tələm batəbata. Aka njo mbəɗə tələm, nji kuɗəkuɗə kwa hya'ati nji kəla yiɗa, ya njo shabiya mən. 53 Aka tuku kəl dzə nda kwa yiɗa tə handzə nda pa'a kwa yiɗa, nda kwa tə tsəu kwa handzə nda pa'a kwa tah. 54 Ma dzə nda kwa yiɗa tə handzə nda pa'a kwa yiɗa, nda kwa tə tsəu tə handzə nda pa'a kwa tah, saka ngə ja, sənda nja tsəfətə kwa ɗa jiri ənda, “A kura tənji tah ga ndasənya nyi.”

58 Aka əngə ja ka zamə ɗa nda yo nyida, hya ta'i na jiri. Ngwa hya ngyar vanya sə dzədzandə hi wa. Hya nənyi dəhə kərnəhi wa'atanyi nə tlər Tlakəu, aka a zəndətə hi a tlər kəhi nə Tlakə da ɓwa'atanyi wa.