Bulus ana Apaolos Mavi'i Kəristi
3
Ka zama, bəji nda ya kə'i hi a da ya nau ɓwanya nə hi wi nji'inda na Shanguɗə Hyel wa, kəl nda wi nji'inda nə dunəya, wi nguli dizəu ku nəu Kəristi. 2 'Ua tanyi ngə ya nə hi a da ɗəfə wa, aka a da hya ɗa ka kwasə ɗəfə gwadagə wa. Ya ba'a sakana a da hya ɗa wa, 3 aka tsə'utanyi jigadəmar ndəkurndə ku hi. Mangə tsə'uta hyo mər sələkəkur nə kərnəhi, hya kwa pa kərnəhi, tsə'uta hi na jigadəmar ndəkurndə ndani, ya hyo mər sə wi njir dunəya. 4 Aka ma cha vanya ndə kwa na, “Naya nə Bulus ya,” vanya ndə tsəu, “Naya nə Apolos,” a da jigadəmar ndəkurndə ngə ma?5 Wa ngə Apolos ngə ma'a? Ya wa ngə Bulus nga? Na ea mavi'i Hyel inda hya nənyi jiri nə Mafakə Mənakə təwari tanyi ina. Kala ndə ku pama ea kwa mər tlər nda Tlakə tə nənyi. 6 Naya, ya tləka ku ɗufwa hi, ngə Apolos tə tsa'a ɓiti, kəl ja, Hyel ngə kwa gwa'atə cho həa. 7 A ndər tləka ana ndər tsa'a ɓiti da vanya sə wa, sənda ndəya dəhə nacha ngə Hyel nda kwa handi. 8 Ndər tləka ana ndər tsa'a ɓiti, tlər zhang ngə nda kwa məra. Ya kala ndə kwa uya wazəbar tlər nyi. 9 Aka kya'a ea njir mər tlər Hyel ea. Nahi tsəu fah Hyel, hər Hyel tsəu.
10 Ya mər tlər na ga'a nda Hyel tə na'a, a səya təya hyavi wi ndər nau həra. Sakana alenya nja kwa sərnya. Kəl ja, madawa ngə tə sərnya hər na, kəl cha mər nyi ana sənam. 11 Aka a vanya ndə da kwa nau səya vanya hyavi pamə matsa nda nja səya wa, nacha ngə Yesu Kəristi. 12 Ma vanya ndə tə sərnya hyavi nga ana bəjingha, ndara azurfa, ndara hangu daɗədaɗa, ndara ana wua, ndara ana sar ndara chiva. 13 Pəshir nəuma, hu'u kwa chabiya sənda nja hər ni. Aka njo dzə tlər kala ndə na hu'u. 14 Ma sənda ndə tə hər tə ta'i, cha kwa uya wazəba. 15 Kəl ja, ma sənda ndə tə hər tə ngi kəɗətsəu, cha kwa mər asar gagaɗa. Cha kwa uya mbəɗa, kəl ja, wi ndə nda tərabiya tahə hu'u.
16 A da hya zəndə ənda nahi Mbwa'alə Hyel hi ana ənda Shanguɗə Hyel kwa ngya ku hi ma? 17 Madawa tə səwandə Mbwa'alə Hyel, Hyel kwa səwandə nyi, aka Mbwa'alə Hyel mbwa dzəvədzəvənyi ngə, ya nahi ingə Mbwa'alə nga.
18 Ngwa madawa shakər nə kərnyi wa. Macha vanya ndə kwa la'a wi dəma nyi da, wi nda njir dunəya kwa la'a, cha ɗa ka ndə kəkəng ga cha ɗa na dəma nə jirijiri. 19 Aka dəmar njir dunəya kəkəngkur ngə a mar Hyel. Wi nda cha tsəfətsəfə nyi ku likatəkata, “Cho səya njir dəma ku kwakunakur kənda.” 20 Ana tsəu, “Tlakə zəndətə ənda jigadəmar njir dəma sə ɓwa'atanyi.” 21 Aka ənga ngwa madawa da bukər nyi na vanya ndə wa! Aka madami nəkə hi nga. 22 Mada Bulus, ndara Apolos, ndara Bitrus, ndara dunəya, ndara pi ndara tah, mada'a sə'inda sakana ndara sə'inda biyama, dəhə nəkə hi inga, 23 nahi tsəu nə Kəristi hi, Kəristi tsəu nə Hyel cha.