2
Ka zama, nda ya shili ka ya dəkar hi sə ɗəwaɗəwa nə Hyel, a da ya shili na nau ɓwanya ndara dəma wa. 2 Aka a ɓatliya təya ku ɗufwa ya nda ya kə'i hi ənda yo far na madami kəl Yesu Kəristi, ndə nda nja kukwanda. 3 Nda ya shili da hi a dunama ɗa da wa, yo ləvəra ana dzədzi ual'ualəu. 4 Dlədləɓə ɗa ana Mafakə ɗa nə hi, a da ɓwanya pətə nə dəma wa, kəl ndara ya ngya ka dunamar Shanguɗə Hyel. 5 Ya mər ənga, tsa hya da ba'a fə jirikur kəhi təkəra dəmar ndəu, kəl ka gyalkur Hyel.Dəmar Hyel
6 Dəhə ka ənga, ma ya gu pama njir nəu inda na dunama ku jirikur yo ɓwanya na dəma, kəl nda a da chul dəma nə bəji nə ndara nə nji təltəl nə bəji nə nda gyalku rnyi kwa wur wa. 7 Dəma ngə yo ɓwanya təkər nga nacha ngə dəmar Hyel nda tə ɗəwa, dəma nda cha ɓatliya təvi nja mər dunəya ka ga mən uya səli. 8 Kəl ja, a nji təltəl nə dunəya nə da ngabiya wa, macha a ngabiya tə nda a da nda kwa nda kukwanda Tlakə kəmən nda na səli wa. 9 Nacha nda likatəkatə tə na,
“A ndə da ta la'a ndara ngatə wa,
ya ndə da jigadəma nyi tə harə
sənda Hyel tə ɓatliya
ka nji'inda kwa nyida nyi wa.”
10 Kəl ja, Hyel tə chabiya mən dəhə sə'ina təwa Shanguɗəu. Aka Shanguɗə ngə kwa gwa'abiya dəhə səu, ma'a sə'inda dzau tsa ngabiya təkəra Hyel. 11 A ndə nda kwa zəndəbiya jigadəmar ndə wa, kəl ndara shanguɗə kərnyi sənyi, ya ndər zəndəbiya jigadəmar Hyel da wa kəl ndara Shanguɗə Hyel sənyi. 12 A dləutsətə mən Shanguɗə Hyel a da nə dunəya wa, aka ga məna zəndə sə mənakə inda Hyel tə nə mən ga'a.
13 Eo ɓwanya təkəra sə'ina, a da na dlədləɓə nda hya'atə ku dəma ndə wa, kəl nda hya'atə ku Shanguɗəu, təwa dəkəbiya sə'inda nə Shanguɗə anə nji'inda nə Shanguɗəu. 14 Kəl ja, nji'inda pa'a da ku Shanguɗə da kwa uya jiri nda hya'atə tsa Shanguɗə Hyel wa. Ma nda kwa ngati, kəkəngkur cha nənda, a da nda kwa ngabiya wa, aka kəl nji'inda ku Shanguɗə ngo ngabiya sənda Shanguɗə kwa cha. 15 Ndə nda Shanguɗə Hyel kwa nəu na cha kwa nau tlanda nəuma təkəra madami, kəl ja, ndər nau tlanda nyi nəuma da wa. 16 Wi nda likatəkatə tə na,
“Wa zəndə jigadəma Tlakə
pəlakər dlədləɓə nə nya?”
Kəl ja, namən, jigadəma kəmən wi nə Kəristi.