Tsa'atsa'a Mar Hyel
5
Sakan ja, mangə mərtə mən tə nji tsa'atsa'a mar Hyel təwa jirikur, a uyatə mən piyarɗufəu na Hyel təwa Tlakən mən Yesu Kəristi. 2 Təwa nyi ngə məna uya gwa ku papa'akur nyi nə məno ngya kwa na, təwa jirikur kəmən, məno mər hirgyaɗi ku fəkər na ənda məno da uya mbaɗə kəmən ku səlir Hyel. 3 A da kəl ngə tanyi wa, kəl nda məno mər hirgyaɗi ku ɓwaɓwatə kəmən, aka zəndətə mən ɓwaɓwatə kwa shili na mbiyahuɗəu, 4 mbiyahuɗəu kwa gwa'atə Hyel kwa dləukər namən nda kwa nə mən fəkər. 5 Fəkər ngə da kwa ɗa ka sə ɓwa'atanyi wa, aka Hyel pəu mən tə nyida nyi ku ɗufwa mən təwa Shanguɗə Karti, nda cha nə mən.6 Aka ku bəji nda a ndər hagwa mən chi da wa, tə bəji tsa'atsa'a Kəristi tə tah aka namən njir mər səpəla'a. 7 Dzau nja uya ndə nda kwa i cha tah, aka ndə tsa'atsa'a. Kəl ja, cho nau ɗa vanyi ndə tah, aka ndə dur. 8 Kəl ja, Hyel tə char nyida nyi nə mən, aka tsəu mən njir mər səpəla'a Kəristi tə tah ka mən! 9 Yau, mangə mərtə mən tənji tsa'atsa'a tə lya Hyel təwa mashi Kəristi, jiri, cho dləuya mən tsa huɗətlar Hyel təwa nyi! 10 Ɗakaɗa, njir mər dawa na Hyel mən, ya dəhə ka ənga cha ɓatliya pama mən na Hyel təwa tər zər nyi ya, abiyakata sakanə nda nja ɓatliya pama mən ka Hyel ya? Cho dləuya mən aka ana pi cha! 11 A da wuɗəkənyi ngə wa, kəl ja, məna kwa mər hirgyaɗi aka sənda Hyel tə mərtə təwa Tlakən mən Yesu Kəristi, nda ɓatliya pama mən ka Hyel.
Adamu ana Kəristi
12 Səpəla'a tə səgwa ku dunəya təwa ndə zhang nacha ngə Adamu, ya səpəla'a nyi tə shili na tah. Aka ənga, tuku madawa kwa tah, aka madawa mərtə səpəla'a. 13 Səpəla'a da ku dunəya təvi nja shili na gadlagadla, kəl ja, a da njo jiga səpəla'a tangnda pa'a gadlagadla da wa. 14 Kəl ja, dəhə ka ənga, tah tə səm təlkur təkəra nji fwatə ku bəjir Adamu, tsa'a yatə bəjir Musa, ma'a təkəra nji'inda pa'ada ɓəlnda tsaubar wi nda Adamu tə məra.
Adamu nacha ngə ba'adar Kəristi nda kwa shili. 15 Kəl ja, ga'ar Hyel nga, pam cha tsa bikə Adamu. Jiri cha ənda nji ɗang tə kuɗa təkəra bikə Adamu. Kəl ja, ɗanghali Hyel ndiyatə 'ualkur, ya əngə tanyi tsəu, ga'anyi nə nji ɗangəu təwa farbikə nda tə shili təwa ndə zhang, Yesu Kəristi. 16 Ya pam da, ku pama ga'ar Hyel ana bikər ndə zhang nda. Aka nəuma nda tə nəu hir bikə Adamu nda, nacha ngə nəumar tah, kəl ja, ga'ar Hyel mərtə mən tsa'atsa'a ma nyi, madangə a mərtə mən səpəla'a 'ualəu. 17 Jiri cha, ənda təwa bikə Adamu, tah tə ghəya səm təlkur təkəra dəhə nji. Kəl ja, nəna təlkur a da cha səu, ma nja məməlatə na nda ndə zhang Yesu Kəristi tə shili nə wa! Dəhə ndə nda tə dləutsi bwaɓkur ga'ar papa'akur Hyel ya uyatə cha ngya tsa'atsa'akur, nacha tsəu cho mər təlkur aku pi təwa Kəristi.
18 Aka əngə ja, wi nda bikə Adamu zhang tə shili na nəumar tah nə dəhə nji, əngə tsəu nda Kəristi tə mər sə zhang nda Hyel kwa i, tə mərtə dəhə nji tsa'atsa'a mar Hyel, ga nənda taɗər pi. 19 Wi nda nji ɗang tə ɗa ka njir bikə təwa tar nəu nya Hyel nə ndə zhang, əngə tanyi tsəu, nji ɗang tə ɗa tsa'atsa'a mar Hyel təwa nəu nya Hyel nə ndə zhang.
20 Sənda gwa'atə nja shili na gadlagadla Musa nacha ngə, ga bikə biya tə babal. Kəl ja, ku sakanda səpəla'a tə tsaka, kəl ɗanghali Hyel kwa ndiya tsaka. 21 Aka ənga, wi nda bikəu tə səm təlkur təwa tah, əngə tanyi tsəu ɗanghali Hyel kwa səm təlkur nyi sakana təwa tsa'atsa'akur, cha kwa yi na mən ya ku pi nda ba'anawa təwa Yesu Kəristi Tlakən mən.