Ba'ada na Ibrahim
4
Mi məno na təkəra Ibrahim jival kəməna? Mi sənda cha ngabiya təkəra jirikura? 2 Macha mərtə tənji Ibrahim tsa'atsa'a na Hyel aka sənda cha məra, cho nda uya sər wovi ni, kəl ja, a da mar Hyel wa. 3 Likatəkatə tə na ya, “Ibrahim tə nənyi jiri nə Hyel, ya aka jirikur nyi Hyel tə dləutsə nyi ka ndə nda tsa'atsa'a.” 4 Ndə nda tə mər tləra njo kinda nyi wazəba nyi, ya a da ga'a nda nənyi nji wa, vituku nyi nda. 5 Kəl ja, nji'inda a da ta'i təkəra tlər kənda wa, ya nda nənyi jiri nə Hyel nda kwa mbəɗandə njir mər bikəu, jirikur kənda kwa mərtə nda tsa'atsa'a mar Hyel. 6 Nacha ngə sənda Dauda tə chari, nda cha ɓwanya təkəra hirgyaɗi ndə nda Hyel tə dləutsə aka ndə nda tsa'atsa'a, a da ka sənda ndə tə mər wa. 7 Nda na, “Njir papa'akur ngə nji'inda nja farbikə kənda, nji'inda nja zhazhinda səpəla'a kənda. 8 Ndər papa'akur ngə ndə nda a Tlakə do tsəfə bikə nyi wa.”9 Chul hirgyaɗi ngə Dauda tə ɓwanya təkər ngə ya, nə nji tlatla bədzang ngə səkənda ya? A da wa! Ma'a nji kəla tla bədzang. Aka ngatə tə mən ənda Likatəkatə tə na, “Ibrahim tə nənyi jiri nə Hyel, aka jirikur nyi Hyel tə dləutsə nyi ka ndə nda tsa'atsa'a.” 10 Ku bəji manə ngə nja nga Ibrahim ndə nda tsa'atsa'a? Ahir tlanda nyi tənji bədzang zəma aa təvi nja tlanda nyi? Təvi nja tla bədzang nənyi, a da ahir tla bədzang wa. 11 A hi ngə nja nda tla bədzang nənyi. Ga cha chari ənda aka jirikur nyi, Hyel tə dləutsə nyi ka ndə nda tsa'atsa'a təvi nja nda tla bədzang nənyi. Aka ənga Ibrahim ngə Adanya dəhə njir nənyi jiri nə Hyel, ya Hyel dləutsə nda tə ka nji tsa'atsa'a, madangə a da nja tlanda nda bədzang wa. 12 Ya nacha ngə tsəu Adanya nji'inda nja tlanda nda bədzang, kəl ja, macha jirikur tsa nda wi nə Ibrahim təvi nja tlanda nda bədzang.
Nja Dləutsə Alkawal Hyel təwa Jirikur
13 Nda Hyel tə hətə nyi salkur nə Ibrahim ana nyandəla cha ənda cho nənda dəhə dunəya, cha mər ənga, a da aka Ibrahim tə nəubiya gadlagadla wa, kəl ja, aka cha nənyi jiri nə Hyel, aka ənga Hyel tə dləutsə nyi ka ndə nda tsa'atsa'a. 14 Macha sənda Hyel tə hətə salkur salkurnyi nja kwa nənyi nə nji'inda kwa nəubiya gadlagadla, a sakədar jirikur da wa, ya salkur nda Hyel tə hətə, ɗatə ka sə ɓwa'atanyi. 15 Kəl ja, tar nəubiya gadlagadla kwa tla huɗa Hyel, aka dəhə mbwa nda a gadlagadla da wa, a tar nəubiya gadlagadla da wa.
16 Aka ənga ja, alkawal ta'itə təkəra jirikur, ga alkawal Hyel ɗa ngyangyanyi ka ga'ar Hyel nə dəhə nyandəla Ibrahim, a da kəl anə nji'inda nəubiya gadlagadla wa, kəl ja, anə nji'inda tə nənyi jiri wi nda Ibrahim tə nənyi jiri tsəu. Aka Ibrahim ngə Adanya dəhə njir nənyi jiri, 17 wi nda Likatəkatə tə na, “A fiya nghə təya ka Adanya jul nji ɗanghəu.” Aka ənga, nja mərtə nyi alkawal nə Ibrahim nda nənyi jiri nə Hyel nda kwa fəunyi pi nə ndə nda tah, ya nacha ngə ndə nda kwa mərtə sənda a da wa, cha ɗa a da.
18 Ibrahim tə nənyi jiri ngə cha fəkər, madangə a səda gwa'atə cha fəkər wa, ana ənga cha ɗa Adanya jul nji ɗanghəu, wi nda Likatəkatə tə na, “Nyandəla kə kwa ɗa ɗang wi ngə tə ɗangkura sasəlga.” 19 Aku bəji nda fa nyi ɗatə ləhə dza gharəu, kəl ja, a jirikur nyi da təutə madangə a haltə cha tsa yah wa, ya Saratu tsəu halti. 20 A cha təkə na jirikur nyi wa, ya a cha kəpal alkawal nda Hyel tə mərtə nyi wa, jirikur nyi tə tsakətə nyi dunama ana gyalkur, cha fal Hyel. 21 Ɗufwa cha chatə nyi tə pa'a ənda Hyel kwa mərtə sənda cha hətə salkur salkurnyi. 22 Nacha nga gwa'atə Ibrahim, təwa nənyi jiri, “Hyel tə dləutsə nyi ka ndə nda tsa'atsa'a.”a 23 Ɓwanya nə kwa na ənda, “Nja dləutsə nyi ka ndə nda tsa'atsa'a,” a da tsəfətsəfə nyi ka cha sənyi wa. 24 Tsəfətsəfə nyi cha aka ma'a namən nda njo dləutsə ka nji tsa'atsa'a, nji'inda nənyi jiri nə Hyel nda hya'andə Yesu Tlakən mən ku hwa. 25 Aka Hyel tə sətə Yesu ka nja tsəya nyi aka səpəla'a kəmən, ngə nja hya'andə nyi ana pi aka ga nja mərtə mən tsa'atsa'a mar Hyel.